Read abua Jọn 6 Bible Online

Jọn 6 - abua bible

Jọn 6

¹Ịphen phọ reten, kụ ạJizos ạḅeeny Ọphiiny aGalili ọta bọ mọ Ọphiiny ạTaibirias.

²Kụ aḍiboom aḍita awe ọdaph nyọdi, loor ịiḍaany phọ bịdi ọmiin bọ ọdi aḍighi yogh bọ loor bụphe úmoon bọ.

³Kụ ạJizos ạsiiny ạnyu ẹeḅaraph kụ ọdi rꞌạbumatuan phọ ọdi ọrologhu ude.

⁴Mẹkar rẹkpul olhe ẹyaal ạbuo aJu phọ dị oghol mọ ẹyaal ọphel otene.

⁵Mem dị ạJizos aphogh bọ akitonom ạmiin ni ḍiboom aḍita awe dị rotu ọteeny ọdi, kụ ọdi apuru Filip mọ, “Koko bọ ika eḍien, pịdi awe phọ ạbuen ole?”

⁶Ọdi ạḅem ịphen phọ olegheriom ologhi aFilip. Ọdi rꞌaloor ọdi alegheri ni ịpe ọdi kaḍighi.

⁷Kụ aFilip mọ, “Eḍien ịyal okuron ipoḍi asilva kẹ́kasian dị bịdi koonemanaan.”

⁸Ọnon ọnyo ạmatuan phọ, dị oghol mọ Ạndru, umor phọ aSaimon Pita, ạḅeni nyọdi mọ,

⁹“Oniin ọony odi ni sịen, dị ạmoogh oogh iiḅoghoḍi ạbred, rꞌịyal ina, kụ ịphen phọ kesi ḍighen esi ạbuen phọ?”

¹⁰Kụ ạJizos ạḅem mọ, “Ịḅeni awe phọ ọrologhu ude.” Pạ phọ atuboom ạroogho ạrol li, kụ alephiri ạnmuny phọ ọrologhu bọ ude phọ ụghiom ni oogh ọonir.

¹¹Kụ ạJizos ạsighe iiḅoghoḍi ạbred phọ, kụ rọngo ḍịseph Ẹnaan kụ adiemi bụphe ọrologhu bọ ude phọ, kụ ạḅile ạsighe ina phọ ạtuugh adiemi, tọrobo ịlo oye phọ ạwa.

¹²Mem dị bịdi molhe ẹpherogh, ọdi ạḅeni bụmatuan phọ ọdi mọ, “Ịson ipoḍi phọ. Kémeera rꞌẹnum ephe.”

¹³Kụ bịdi ọson oomo ipoḍi oogh iiḅoghoḍi ạbred phọ olhe bọ osugheeny kụ omuzeḍi ḍioph rꞌịyal ạrigiel.

¹⁴Kụ bụphe ọmiin bọ ịiḍaany phọ ạJizos aḍighi bọ ụḅem mọ, “Ọkar igey ni, ọphon phọ kụ oyil phọ oguanaan bọ mọ katu ni sịen aḅirini phọ.”

¹⁵ẠJizos alegheri ni mọ bịdi rọwa ọsighe ẹekpara ekpeḍien oḍighinom ọno ọdaam ẹmha, kụ ogina ọdi ạḅile ni ạghi sịphe ẹeḅaraph phọ bịn ạrol.

¹⁶Mẹteeny dulhe kụ ạbumatuan phọ ọdi ọḍua osoor osi ẹpe ọphiiny phọ

¹⁷kụ oḍigh oghuugh rọḅeeny ogheel ạKapaniom. Mekpereghian ni, kụ ạJizos kőḅula.

¹⁸Loor oboom oghim dị rakim, oologh amite ni.

¹⁹Mem dị bịdi mọzoghi oogh mụghumo odiiny itobi, bịdi ụmiin ni Jịzos dị arelhe ạnyu ạmuum mọ ratu ọteeny oghuugh phọ ạbidi, kụ aruugu asiph bịdi.

²⁰Kụ ọdi ạḅeni bịdi mọ, “Mị ni. Kékiilaan.”

²¹Kụ ịḅeeraan ni bịdi ọsighe ọdi ọsaany sịphe oghuugh phọ: kụ egina amem bịn oghuugh phọ asul esiḍia phọ bịdi rọki bọ.

²²Ẹḅaal bọ ḍịroor phọ, awe phọ ọrologhu bọ ẹpe ẹḅeenyom ọphiiny phọ ụmiin ni dị oniin oghuugh bịn asugha pạ phọ. Bịdi ulegheri ni mọ ạJizos óḍigh aani oghuugh phọ ạbumatuan phọ ọdi omitiom bọ, mọ ạbumatuan phọ ọdi bịn kụ ụḍua.

²³Ịnon arughuugh ịḍua ni Tạibirias eru esul esiḍia dị etuman esi phọ Ọmoogh-we phọ ạsighe bọ ạbred phọ kụ rọngo ḍịseph Ẹnaan kụ aḍita awe phọ olhe bọ.

²⁴Mem dị awe phọ ọmiin bọ mọ ạJizos rꞌạbumatuan phọ ọdi pạ úlho, bịdi uḍiku ni rughuugh ọghi ẹpe Kạpaniom ọwa ghan Jịzos.

²⁵Mem dị awe phọ ọmiin bọ Jịzos ẹpe ẹḅeenyom ọphiiny phọ, bịdi upuru ni nyọdi mọ, “Rạbai, nạ uru ẹphen phọ pụr amem?”

²⁶Kụ ạJizos mọ, “Mị ạkar rịḅeni ghan inyina mọ nyina ị́tuan ịiḍaany phọ nyina ẹmiin bọ, nyina ịtuan eḍien phọ nyina ele bọ ịpherogh inyina kụ rịwa ghan bọ ịmi.

²⁷Kẹ́tuan ghan mun eḍien phọ ẹpe kẹḅor bọ, ịtuan ghan eḍien phọ ẹpe kẹtol bọ ẹteeny ghuḍum kꞌagee-pọ phọ kụ ekumuan ghan. Eḍien phọ ẹphen Ọony phọ Oye kụ kịngo inyina, ịdi eḍighi bọ Ẹnaan Ọde phọ mạlhogh nyọdi elegh.”

²⁸Kụ bịdi opuru nyọdi mọ, “Yoor koḍighi aani ika kụ oḍighi ghan iiḍighi phọ Ẹnaan?”

²⁹Kụ ạJizos mọ, “Oḍighi phọ Ẹnaan rẹwa bọ mọ iḍighi ghan phọ ọphon mọ imeeraam nyọpo ọdi arom bọ.”

³⁰Kụ bịdi mọ, “Nạ kaḍighi eeghe ịiḍaany dị yoor kọmiin bọ kụ omeeraam nyịna? Nạ kaḍighi eeghe?

³¹Ạburude ạburude phọ ayira ule ghan mạna ẹpe ẹdala phọ, ịdipho ọge bọ sịphe ạḍinya iigbia phọ mọ, ‘Ọdi ạsighe kꞌạke eḍien kụ ạngo bịdi mọ ole.’”

³²Kụ ạJizos ạḅeni bịdi mọ, “Mị ạkar rịḅeni ghan inyina, mọ eḍien phọ aMozis ịngo bọ inyina kéḍien dị ẹḍua kꞌạke kụ eru. Ọde phọ ạmi kụ rạngo ghan bọ ọkar eḍien phọ ẹpe ẹḍua kꞌạke eru.

³³Eḍien phọ Ẹnaan rẹngo ghan bọ, pọ ọpo ạḍua bọ kꞌạke kụ aru, ọdi kụ rạngo ghan bọ aḅirini phọ ghuḍum.”

³⁴Bịdi ọmagh nyọdi mọ, “Oye phọ, ụngo ghan iyoor eḍien phọ ẹphen phọ oomo amem.”

³⁵Kụ ạJizos mọ, “Mị kụ eḍien aghuḍum mọ. Tọrobo oye lọ aru ụteeny ịmi, ọkoony nyọdi kásiph mun. Oye lọ umeeraam ịmi, ạmuum ọphughol nyọdi kạ́pu mun kꞌagee-pọ.

³⁶Mị mịḅeni ni inyina mọ nyina mịmiin ni ịmi kụ kémeeraam.

³⁷Oomo ạbuphe Ọde phọ ụngo bọ ịmi kụteeny ni ịmi, kụ oye lọ aru ụteeny ịmi, rꞌamem dị mị kaporogh nyọdi ílho,

³⁸ịdi eḍighi bọ mị ụ́tuan oḍighi ịpe ịḅeeraan bọ ịmi, mị ụtuan oḍighi ịpe ẹḅeeraan bọ nyọpo urom bọ ịmi kụ mị ạḍua bọ kꞌạke aru.

³⁹Ịphen kụ ịḅeeraan bọ nyọpo urom bọ ịmi mọ mị uḍighi phọ, mọ mị kútoph rꞌoniin ọnyo ạbuphe ọdi ụngo bọ ịmi, mọ ruukuna phọ mị uḅerion oomo phọ ạbidi esi aḍuugh,

⁴⁰ịdi eḍighi bọ ịphen kụ ịdi ẹḅeeraan bọ Ọde phọ ạmi: mọ tọrobo oye lọ ạmiin Mọony phọ kụ ameeraam nyọdi kạmoogh ni ghuḍum kꞌagee-pọ, kụ ruukuna phọ mị kaḅerion ni bịdi esi aḍuugh.”

⁴¹Kụ ạbuo aJu phọ omiigh ogum mọ ọdi ạtuan eeghe kụ ạḅem mọ, “Mị kụ eḍien phọ ẹḍua bọ kꞌạke kụ eru.”

⁴²Kụ bịdi mọ, “Oye phọ ọphon kụ kạ́Jizos ọony phọ ạJosef ḍụghum? Yoor olegheri ni ọde rꞌonhiin phọ ọdi. Nyịidipho phọ ịḅile iḍighi ika kụ ọdi rạḅem ghan bọ mọ, ‘Mị ụḍua kꞌạke kụ aru’ phọ?”

⁴³Kụ ạJizos mọ, “Isophe ịgum mọ anyina.

⁴⁴Oye kátue ụteeny ịmi, emuton oye lọ Ọde phọ urom bọ ịmi kụ aḍur aloghoma, kụ ruukuna phọ mị kaḅeton ni nyọdi.

⁴⁵Ọge ni sịphe ạḍinya ariil phọ Ẹnaan mọ, ‘Ẹnaan kẹtughemi ni oomo phọ ạbidi.’ Tọrobo oye lọ ạnaghanan Ọde phọ ạḅile ạtuugha esi ọdi katu ni ụteeny ịmi.

⁴⁶Mị rạ́ḅem ghan mọ oye mạmiin ghan ni Ọde phọ ekpeḍien. Ọnon oye dị mạmiin ghan Ọde phọ ólho, emuton nyọpo ạḍua bọ kꞌẸnaan kụ aru.

⁴⁷Mị ạkar rịḅeni ghan inyina mọ ọpo ameeraam bọ ạmoogh ni ghuḍum kꞌagee-pọ.

⁴⁸Mị kụ eḍien aghuḍum mọ.

⁴⁹Ạburude ạburude phọ anyina ule ni mạna phọ ẹpe ẹdala phọ kụ umuughu ni.

⁵⁰Mị rạkaaph ghan ịlo eḍien phọ ẹpe ẹḍua bọ kꞌạke kụ eru, ẹpe oye lọ ale kámugh bọ.

⁵¹Mị kụ eḍien aghuḍum mọ ẹḍua bọ kꞌạke kụ eru. Oye lọ ale eḍien phọ ẹphen kạtol li kꞌagee-pọ. Iphulupul phọ ạmi kụ eḍien phọ mị kạngo bọ, ịpe mị kạngo bọ pịdi aḅirini phọ ọmoogh ghuḍum.”

⁵²Ọghaaph phọ ọphon ạsighe ni ọgbagara ọogbaghanaan ạlogh ogbo ạbuo aJu phọ mọ, “Ika nụun kụ ẹdi oye phọ ọphon kạngo bọ iphulupul phọ ọdi mọ yira ạa?”

⁵³Kụ ạJizos ạḅeni bịdi mọ, “Mị ạkar rịḅeni ghan inyina mọ aghuḍum loor anyina kạ́tol emuton lọ nyina ạa iphulupul Ọony phọ Oye, ẹḅile ẹphughol ịḅaal phọ ọdi.

⁵⁴Oye lọ ạa iphulupul phọ ạmi, ạḅile ạphughol ịḅaal phọ ạmi mạmoogh ghuḍum kꞌagee-pọ, kụ mị kaḅeton ni nyọdi ruukuna phọ,

⁵⁵ịdi eḍighi bọ iphulupul phọ ạmi eḍighi ni ọkar egey eḍien olhe, ḅịle kẹn ịḅaal phọ ạmi ọkar egey ịyaar ọphughol.

⁵⁶Ọpo ạa bọ iphulupul phọ ạmi ạḅile ạphughol ịḅaal phọ ạmi, atugh loor ạmi, kụ mị atugh loor ọdi.

⁵⁷Ọde phọ odi ghan bọ kụ urom bọ ịmi kụ mị ạtuan bọ nyọdi kụ ạmoogh bọ ghuḍum mọ. Igina phọ kẹn kụ ẹdi ọlo ạa ịmi kạtuan aani ịmi kụ ạmoogh ghuḍum mọ.

⁵⁸Ẹphen kụ eḍien phọ ẹpe ẹḍua bọ kꞌạke kụ eru. Ị́kigh ịdipho ạmana phọ ạburude ạburude phọ anyina olhe bọ, kụ omuughu bọ ni. Ọlo ale eḍien phọ ẹphen phọ kạtol li kꞌagee-pọ.”

⁵⁹ẠJizos ạghaaph ịphen phọ mem mọ ọdi rạtughemi ghan we phọ ẹpe obughotu phọ ạKapaniom.

⁶⁰Ịbadi ạbumatuan phọ ọdi ụnaghan ni ịphen phọ kụ ọḅem mọ, “Ọghaaph phọ ọphon ạkpar ịikia. Ạnhian kụ katue bọ ạnaghanan?”

⁶¹Oye nyọdi ópuru kụ ạJizos alegheri ni mọ ạbumatuan phọ ọno mọtuan ọghaaph phọ ọphon rogum, kụ apuru mọ, “Ịphen phọ reḍighi dị nyina kekiton ẹḍua esi ạmi ḍụghum?

⁶²Mem dị nyina ẹmiin dị Ọony phọ Oye ạḍua rakeel ẹpe kꞌạke phọ dị ạrol ghan bọ, nyina kẹkaaph ika nụun?

⁶³Uwaloor phọ kụ rạngo ghan ghuḍum, iphulupul phọ sụo rẹ́ngo ghan. Ikpo ọnhu phọ mị mạghaaph bọ ịḅeni inyina eḍighi uwaloor, eḍighi kẹn ni ghuḍum.

⁶⁴Kụ buniin anyina edi ni dị omeeraam ị́moogh.” (Kụ ạri ạJizos alegheri ni kꞌemiighom mọ bụphe úmeeraam bọ rꞌọpo kabool bọ nyọdi.)

⁶⁵Kụ ọdi ạghaaph ạloghom mọ, “Ịduon kụ ịdi mị ạtuan bọ ịḅeni inyina mọ oye kátue utuman ịmi, emuton ọlo Ọde phọ kụ ạngo eepoogh.”

⁶⁶Loor ịphen phọ, ịbadi ạbumatuan phọ ọdi útelhian ghan mun nyọdi.

⁶⁷Kụ ạJizos apuru ḍioph rꞌịyal ạbumatuan phọ mọ, “Nyina phọ kẹn kẹḍua aani ni esi ạmi ḍụghum?”

⁶⁸Kụ aSaimon Pita mọ, “Ọmoogh-we, yoor kọḅile ọki kꞌạnhian? Nạ kụ ụmoogh bọ ikpo ọnhu aghuḍum kꞌagee-pọ phọ.

⁶⁹Kụ yoor momeeraam ni ọḅile kẹn olegheri mọ nạ kụ Oye Aghuḍuul phọ Ẹnaan eseere bọ.”

⁷⁰Kụ ạJizos ạphagharanaan bịdi mọ, “Mịna ḍịen kụ ụma bọ ḍioph rꞌịyal phọ anyina, kụ oniin ọnyo anyina aḍighi bọ ni eru?”

⁷¹Ọdi ạghaaph ịphen phọ atiom Judas Ịskariot ọony phọ aSaimon, ịdi eḍighi bọ aJudas phọ kabool bọ nyọdi aḍighi aani ni oniin sịphe aḍioph rꞌịyal ạbumatuan phọ.