Read abua Jọn 9 Bible Online

Jọn 9 - abua bible

Jọn 9

¹Mem dị ạJizos arelhe raten, ọdi ạmiin ni oye dị ọmaram ikpom ariḍien.

²Kụ ạbumatuan phọ ọdi opuru nyọdi mọ, “Ọtughemia, ịkaraph ạnhian kụ iḍighi bọ ịyaar phọ ọmaram bọ nyọdi ikpom ariḍien phọ? Ịlo ọdi ḍụghum kụ ịlo ọde rꞌonhiin phọ ọdi?”

³Kụ ạJizos mọ, “Ikpom ariḍien phọ ọdi ị́moogh rọmoogh ịyaar oḍighinom ịkaraph ọdi mọ ịlo ọde rꞌonhiin phọ ọdi. Ụtuan ogananami ịikpo phọ Ẹnaan esi ọdi kụ ọmaram bọ nyọdi ikpom ariḍien phọ.

⁴Yoor koḍighi ghan iiḍighi ọpo urom bọ ịmi, sịen ke̋kpereghian bọ. Aḍughul phọ rekul li, dị oye oḍighi kátue mun aḍighi.

⁵Ịduon mị odi bọ ni sịen aḅirini phọ, mị kụ ạḍiḅaal aḅirini phọ.”

⁶ẠJizos rọḅem bọ ịphen phọ kụ ạsin ịghor sịphe ude phọ, kụ ạatoghoḍiom ọposo phọ agbul riḍien oye phọ

⁷kụ ạḅeni nyọdi mọ, “Kịa ẹpe ebaraph aSiloam aatola.” (Ẹmhu aSiloam mọ pọ “eeroma.”) Kụ oye phọ rọghi rootola bịn ạmiin eten arigheel.

⁸Kụ amatuman phọ rꞌạbuphe mọmiin ghan bọ oye ikpom ariḍien phọ dị rạlom ghan ịlom, ọḅem ghan mọ, “Ọphon ḍịen kụ kóye phọ ạrol ghan bọ ude kụ ạlom ghan bọ ịlom mọ?”

⁹Buniin ụḅem ghan mọ, “Ọphon ọdi ni.” Buniin mọ, “Ạkigh ni bịn, kọ́di.” Kụ oye phọ rꞌaloor ọdi mọ, “Mị kụ oye phọ ni.”

¹⁰Kụ bịdi opuru ghan nyọdi mọ, “Ụḅarion ika riḍien phọ ạna?”

¹¹Kụ ọdi mọ, “Oye phọ ọpo oghol bọ mọ ạJizos phọ kụ aphin ọposo agbul riḍien phọ ạmi, kụ ụḅeni ịmi mọ, ‘Kịa ẹpe ebaraph aSiloam aatola,’ kụ mị rọghi rootola bịn mị rạmiin aani bọ eten phọ.”

¹²Kụ bịdi opuru mọ, “Ọdi phọ odi ẹghen?” Kụ ọdi mọ, “Mị úlegheri.”

¹³Kụ ọsighe oye phọ ọpo eten phọ ụ́miin ghan bọ ọghiomaan Farisi phọ.

¹⁴Aḍio phọ ạḍiphe ạJizos aphin bọ ọposo phọ ạḅarionom riḍien oye phọ iḍighi ḍio ophooghian.

¹⁵Kụ aFarisi phọ ọḅile opuru oye phọ ịpe eḍighi bọ kụ ọdi rạmiin bọ eten phọ. Kụ ọdi ạḅeni bịdi mọ, “Ọdi ạsighe ọposo kụ agbul riḍien phọ ạmi, kụ mị rootola kụ mị rạmiin bọ eten phọ.”

¹⁶Buniin aFarisi phọ ụḅem ghan mọ, “Oye phọ ọphon ọ́ḍua kꞌẸnaan kụ aru bọ, ịdi eḍighi bọ ọdi ráako ghan iilogh aḍio ophooghian phọ.” Kụ ạbunon ọḅem ghan mọ, “Keḍighi ika kụ oḍighinom ịkaraph aḍighi ọdo phọ ịiḍaany phọ ịphen?” Kụ bịdi ọnhu ụ́ḅoph.

¹⁷Kụ bịdi ọḅile opuru oye phọ mọ, “Nạ rạḅem ghan ika ịlo ọdi, ịdipho ọdi kụ ạḅarion bọ riḍien phọ ạna?” Kụ oye phọ mọ, “Ọdi oyil Ẹnaan.”

¹⁸Kụ ạbuo aJu phọ úmeeraam mọ ọdi mạmoogh ghan ni ikpom ariḍien dị ọḅarion, tụtu bịdi ọmagh bụphe ọmar bọ nyọdi

¹⁹kụ opuru mọ, “Ọphon ọony phọ anyina ni ḍụghum? Nyina rẹḅem ghan bọ mọ ụmaram nyọdi ikpom ariḍien phọ, aḍighi ika kụ rạmiin bọ eten phọ nyịidipho?”

²⁰Kụ bụphe ọmar bọ nyọdi ọḅem mọ, “Yoor olegheri ni mọ ọphon ọony phọ ayoor ri, ḅịle mọ ụmaram ni nyọdi ikpom ariḍien.

²¹Ịpe emite bọ kụ ọdi rạmiin bọ eten phọ, yoor úlegheri, ḅịle kẹn yoor úlegheri oye phọ ọpo ạḅarion bọ riḍien phọ ọdi. Ọdi mạmanam ni. Ipuru nyọdi. Ọdi kạgbaanaan ni ẹmhu ọdi.”

²²Bụphe ọmar bọ nyọdi ụḅem ịduon phọ, loor oghiilaan ạbuo aJu phọ, ịdi eḍighi bọ ạbuo aJu phọ mọḅoph ọnhu, mọ oye lọ ạgba amitiom mọ ọdi kụ aMesaya phọ, pọ kotoph nyọdi ogbeph sịphe obughotu phọ.

²³Bụphe ọmar bọ nyọdi ụtu ịphen phọ kụ ọḅem bọ mọ, “Ọdi mạmanam ni. Ipuru nyọdi,” phọ.

²⁴Kụ bịdi ọḅile ọmagh oye phọ ạmoogh ghan bọ ikpom ariḍien phọ omuneniom ịyal amem kụ ọḅeni mọ, “Gbạ ghan ịyaar igey aghueniom Ẹnaan. Yoor olegheri mọ oye phọ ọphon oḍighinom ịkaraph.”

²⁵Kụ ọdi mọ, “Mụghumo ọdi oḍighinom ịkaraph mọ kóḍighinom ịkaraph mị úlegheri aani. Eniin ịyaar dị mị alegheri aani ịduon: mị ụ́miin ghan eten, kụ mị rạmiin aani eten nyịidipho.”

²⁶Kụ bịdi ọḅile opuru nyọdi mọ, “Ọdi phọ ạkaraghi aḍighi ika nyịna? Ọdi ạḅarion riḍien phọ ạna ika?”

²⁷Kụ oye phọ mọ, “Mị mịḅeni ni inyina, kụ nyina ị́naghan. Uḍighi ika kụ nyina rẹwa bọ ọḅile ọnaghan phọ? Ẹkigh mụdi nyina keḍighi aani bụmatuan phọ ọdi.”

²⁸Kụ bịdi omooghaam nyọdi kụ ọḅem mọ, “Nạ kụ ạmatuan ọpo phọ. Yoor ạbumatuan aMozis.

²⁹Yoor olegheri ni mọ Ẹnaan ịghaaph ni rạraar ẹḅeni Mozis: kụ ọpo ọpo phọ, yoor úlegheri ekpisi dị ọdi ạḍua kụ aru.”

³⁰Kụ oye phọ ạḅeni bịdi mọ, “Ịphen phọ eḍighi ịikia iikia, mọ nyina ílegheri ekpisi dị ọdi ạḍua kụ aru, kụ ọdi kụ ạḅarion bọ ni riḍien phọ ạmi.

³¹Yira olegheri ni mọ Ẹnaan rẹ́naghanan ghan buḍighinom ịkaraph, kụ oye lọ rạlogh ghan eegu Ẹnaan, ạḅile raḍighi ghan ịpe ọdi rạwa bọ kụ ọdi rọnaghanan ghan.

³²Kꞌamem mọ aḅirini phọ amiigh bọ kọ̋naghan ghan mọ oye mạḅarion ghan ni riḍien oye dị ọmaram ikpom ariḍien.

³³Eḍighi ịyaar dị oye phọ ọphon ụ́ḍua kꞌẸnaan kụ aru, ọdi rꞌịyaar kátue aḍighi.”

³⁴Kụ bịdi ọḅeni nyọdi mọ, “Ụmaram nyịna ịkaraph, ookonomom nyịna ịkaraph, kụ nạ ghụn kụ rạwa ghan ọtughemi ayoor!” Kụ bịdi ozin nyọdi omitiom obughotu phọ.

³⁵ẠJizos ạnaghan bọ mọ mozin nyọdi omitiom mọ, ạwa ni nyọdi ạmiin apuru mọ, “Nạ ameeraam ni Mọony phọ Oye ḍụghum?”

³⁶Kụ ọdi mọ, “Oye phọ, ọdi phọ ạnhian? Ụḅeni ịmi pịdi mị ameeraam nyọdi.”

³⁷Kụ ạJizos ạḅeni nyọdi mọ, “Nạ mạmiin ni nyọdi phọ. Ọphon rạḅaanaan bọ nyịna kụ ọdi phọ ni.”

³⁸Kụ ọdi ạḅem mọ, “Ọmoogh-we, mị ameeraam ni,” kụ akpuḍian aaseeny nyọdi.

³⁹Kụ ạJizos ạḅem mọ, “Mị ụtuan oogbo ịiruen kụ aru bọ sịen aḅirini phọ, pịdi ạbuo ikpom ariḍien phọ ọmiin eten kụ ariḍien ạbuphe rọmiin bọ eten phọ eḅomoghian.”

⁴⁰Kụ mem dị buniin aFarisi phọ ọrol aani bọ sịphe phọ ọnaghan bọ ọghaaph phọ ọphon, ụḅeni ni mọ, “Tọ nạ rạḅem ghan mọ yoor ạbuo ikpom ariḍien aani ni!”

⁴¹Kụ ạJizos ạḅeni bịdi mọ, “Mọ nyina eten rẹ́miin, ọbo ịkaraph anyina mị́tol. Kụ nyina mẹḅem bọ mọ, ‘Yoor rọmiin ni eten phọ,’ pọ ịkaraph phọ anyina edi ni.”