Read abua Iiḍighi 10 Bible Online

Iiḍighi 10 - abua bible

Iiḍighi 10

¹Oniin uwo ẹmhu ạbuo ẹgham dị oghol mọ ạKonilios ạrol li ẹpe Sizaria. Ọdi ạda oniin okuron awe ẹkpigh aḍita ẹgham ạbuo Itali.

²Ọdi rꞌoomo ọto kꞌọdi uḍighi ni we aruukuan dị ọlogh ni eegu Ẹnaan. Anmo ghan ni inmo bụo aJu phọ, ósoph ghan mem ọoḅereghi Ẹnaan.

³Eniin aḍio ịraar asuo ootaany, kụ ạmiin ikon, dị ọokpaany Ẹnaan aru ạmagh nyọdi mọ, “Kọnilios!”

⁴Kụ ọdi ạnmagharan aphogh, rꞌeepuph kụ apuru mọ, “Ọmoogh-we, ịduon phọ ika?” Kụ ọokpaany phọ ạḅeni nyọdi mọ, “Ịiḅereghi phọ rꞌinmo phọ ạna mẹteeny ni Ẹnaan ọdi ạsighe rạatughianam nyịna.

⁵Nụun arom we ọghi Jọpa ọmagh Saimon, ọpo ọta bọ mọ aPita!

⁶Ọdi atugh kꞌoye dị oghol mọ aSaimon, ọpo rạkponyon ghan bọ ruzu ịnam mọ. Otu ọdi odi oogbom ọphiiny.”

⁷Ọokpaany phọ ạḅeni bọ nyọdi rọḍua, kụ ạKonilios ạmagh ịyal ạnmuny-otu ọdi rꞌoniin ọnyo ẹgham, oye aruukuan dị akori ghan nyọdi,

⁸kụ ạghaaph oomo phọ ịpe emite bọ, kụ arom mọ bịdi ọghi Jọpa.

⁹Rẹḅaal ḍịeri phọ aḍio phọ bịdi oten rọki, ọtol ropogh ẹmha phọ, kụ aPita ạsiiny ạnyu otu phọ ogbo ootaany ịlo ọoḅereghi.

¹⁰Kụ ọkoony asiph nyọdi, kụ ạwa eḍien olhe. Rọsa ni eḍien phọ, bịn ạmiin ikon.

¹¹Kụ ạmiin dị okuaḍio phọ aghughuronu, kụ ọkpooghi inya aruukuna ịyaar dị ẹghigh oboom oopa ukpe ọkpaaghi rosoore sịen ade phọ.

¹²Sịphe phọ oomo ịnam inya asike, rꞌịlo rekuura sịen aḅirini phọ, rꞌịnun okuaḍio phọ ịrol li.

¹³Kụ ọdi ạnaghan ẹḍogh dị ẹḅem mọ, “Pita, ḅetenu! Kiigh ạa!”

¹⁴Kụ aPita mọ, “Ọmoogh-we, kị́duon. Kꞌekulha mị kạ̋aghan ịyaar lọ eḍighi ḅạphanya.”

¹⁵Kụ ạḅile ạnaghan dị ẹḍogh phọ ẹḅem mọ, “Ẹlo Ẹnaan mẹḅaalami, kákol ghan mun mọ ạḅaphanya!”

¹⁶Kụ emite ịduon phọ ịraar amem, bịn egina amem ọsighe oopa phọ ọphon phọ oḅulemi ẹpe kꞌạke.

¹⁷Kụ aPita odi raakia ghan ẹmhu ịpe ọdi ạmiin bọ, bịn pọrono awe phọ ạKonilios arom bọ moopuruan ọmiin kꞌaSaimon ọmeregha ọnhu-aḍibuo otu phọ.

¹⁸Kụ ọmagh opuru mọ aSaimon, ọpo ọta bọ mọ aPita, atugh ni sịen.

¹⁹APita odi ni rạatughian ịpe ọdi ạmiin bọ, kụ Uwaloor Iigbia phọ ạḅeni nyọdi mọ, “Ịraar awe rọwa ni nyịna.

²⁰Nụun asoor, ạdaph bịdi ạghi! Kạ́moogh iikia, ịdi eḍighi bọ mị kụ urom ni bịdi.”

²¹Kụ aPita asoor ạghi ạḅeni we phọ mọ, “Mị kụ oye phọ nyina rẹwa bọ. Nyina ịtu ika kụ eru bọ?”

²²Kụ bịdi mọ, “ẠKonilios oniin uwo ẹmhu ạbuo ẹgham kụ urom iyoor dom. Ọdi ogey oye dị ạlogh ni eegu Ẹnaan, dị oomo ạramha aJu phọ kụ rọkaaph ghan ni koghol. Oniin ọokpaany Ẹnaan kụ aru ạḅeni mọ ọdi arom oru ọmagh nyịna mọ tue, mọ ọno ạnaghan ịlo nạ kạkaaph.”

²³Kụ aPita ạmagh bịdi ạlogh otu ạmuneeny. Rẹḅaal kụ ọdi ạdaph bịdi ạghi, kụ buniin ạbuo ạsiosi phọ ạJopa ọdaph aani nyọdi.

²⁴Rẹḅile rẹḅaal, kụ bịdi ọghi osi Sizaria. Kụ ạKonilios maakpomoghi oomo eghun ọdi rꞌạrighiri ọdi rakori ghan bịdi.

²⁵Kụ aPita rạki osi, kụ ạKonilios ạghi akpuḍian rạda aruwol ọdi ooseeny ọdi.

²⁶Kụ aPita ạpham nyọdi ạmeremi kụ ạḅem mọ, “Ḅetenu ạmeera! Mị phọ oye aani ni.”

²⁷Kụ bịdi rọkaaphan ni kụ aPita aḍigh ologhi otu phọ, kụ ạmiin ịbadi awe dị ookpomoghan,

²⁸kụ ạḅeni bịdi mọ, “Tọ nyina elegheri ni mọ iigbia ni dị ọlo aJu kaaḍikuan rꞌaruuruen. Kụ Ẹnaan miḍeenaan ịmi mọ kútoph oye ogbeph ukol mọ ạḅaphanya.

²⁹Ịduon kụ iḍighi kụ mị úkel bọ oru phọ, mem mọ orom bọ uruom ịmi. Kụ mị rapuru mọ ụtuan eeghe kụ nyina erom bọ iruom ịmi?”

³⁰Kụ ạKonilios mọ, “Rꞌarodon inya aḍughul-otu ọdo amem mọ ạmuen, mị odi kꞌạmi rạaḅereghi ghan ịiḅereghi ịraar asuo ootaany, bịn mị ạmiin oye dị aḍighinaan iiloghoḍian ibura, dị ạmeera esomanan ạmi,

³¹kụ ụmagh ịmi mọ, ‘Kọnilios, ịiḅereghi phọ rꞌinmo phọ ạna Ẹnaan mẹsighe ni ẹetughianam nyịna.

³²Tom ọghi Jọpa ọmagh Saimon phọ ọpo ọta bọ mọ aPita phọ. Ọdi atugh kꞌaSaimon phọ ọpo akponyon ghan bọ ruzu ịnam mọ. Otu ọdi odi oogbom ọphiiny.’

³³Ịduon kụ iḍighi kụ mị arom bọ aruom kụ nạ maḍighi bọ eeḅi atu. Kụ nyịidipho aḍita ayoor odi risigh Ẹnaan ọnaghan oomo ịpe Ọmoogh-we phọ ạḅeni bọ nyịna mọ kạaph phọ.”

³⁴Kụ aPita ạtagharan ọnhu ọdi kụ ạḅem mọ, “Pụruku mị malhoghoma mọ Ẹnaan rẹ́logh ghan oye ịiseeny.

³⁵Kụ tọrobo eelhe, oye lọ ạlogh nyọdi eegu kụ raakuan, kụ ọdi Ẹnaan kẹloghoma.

³⁶Nyina elegheri ni dom mọ Ẹnaan erom bọ we phọ Ịzirel, mọ ạJizos Kraist Ọmoogh-we aḅirini phọ mạsighe ẹepho atuomonaan bịdi.

³⁷Nyina elegheri ni iboom mọ ịpe emite bọ oomo aJudia, emiigh kꞌaGalili mem mọ ạJon awurogh bọ we mụum mọ.

³⁸Nyina elegheri ni ịpe Ẹnaan ẹsighe bọ Uwaloor Iigbia phọ rꞌịnyaam ẹngo Jịzos ọlo ạNazeret phọ. Ọdi ạḍua ghan ni ẹmha ạgba ẹmha aḍighi yogh iiḅi rꞌookonom oomo phọ ạbuphe Eru ẹeḅaghami ghan bọ. Ẹnaan ịrolonaan ni nyọdi.

³⁹Yoor kụ ụmiin bọ oomo phọ ịpe ọdi aḍighi bọ ẹpe eelhe phọ aJudia, rꞌẹmha aJeruselem, ọpo bịdi osin bọ loor oreeny phọ oghiigh.

⁴⁰Kụ ḍughul otu dị emuneniom ịraar Ẹnaan eḅeton nyọdi sịphe aḍuugh phọ, kụ emeera mọ ọdi amite ni egaan.

⁴¹Oomo aweye kụ nyọdi ụ́miin, ipel iyoor phọ Ẹnaan ẹsaḅar bọ. Yoor phọ rꞌọdi kụ ulian ọḅile ọphugholan mem mọ dị aḅetenu bọ sịphe aḍuugh phọ.

⁴²Kụ ọdi ạto ạḅem mọ yoor ọghaaph ọḅeni weye oḍeenaan ghan mọ ọphon kụ ọdi Ẹnaan meḍighi oogboom ịiruen ạngo bụdi odi rꞌạbulo momuughu.

⁴³Oomo ariil phọ ụghaaph ni ịlo ọdi, mọ tọrobo oye lọ ameeraam esi aḍien phọ ọdi kạmoogh ni ọsar ịkaraph ọwilenaan.”

⁴⁴APita odi rạkaaph ghan ịphen phọ, bịn Uwaloor Iigbia phọ asoorom oomo ạbuphe rọnaghan bọ ọghaaph phọ.

⁴⁵Kụ ẹpherogh bụo aJu phọ momeeraam bọ dị ọdaphan Pita ọḍua ẹpe Jọpa oru, esi dị monmoom aani ruuruen Uwaloor Iigbia phọ.

⁴⁶Bụen ụnaghan dị aruuruen phọ rọḅa ọnon ọnhu dị ụ́naghan koboom Ẹnaan, kụ aPita ạghaaph amitiom mọ,

⁴⁷“Oye odi ni ḍụghum, dị kamirighan mọ kúburogh we phọ ạbuen mụum, bụen Uwaloor Iigbia phọ masoorom bọ ni ịduon ayira?”

⁴⁸Kụ ọdi ạto mọ owurogh bịdi mụum esi aḍien phọ ạJizos Kraist, kụ bịdi ọoḅereghian nyọdi mọ ạḅile ạrolan bụno ịyal-ikpo aḍughul-otu.