Read abua Iiḍighi 14 Bible Online

Iiḍighi 14 - abua bible

Iiḍighi 14

¹Kụ ẹpe Aikoniom, ạPol rꞌạBanabas ọḅile kẹn oḍigh obughotu ạbuo aJu phọ kụ ọghaaph dị ịminighan ạbuo aJu rꞌaruuruen phọ omeeraam.

²Kụ ạbuo aJu emeera phọ owiiliom ọnhu ruuruen phọ, kụ ọphue iloghi ạbidi esi ạbuo ạsiosi phọ.

³Abutelhedom mọ ụrol li ẹpe ḍịminighan ạdol, ọghaaph ghan ịlo Ọmoogh-we phọ rꞌạkpo ologhi. Kụ Ọmoogh-we phọ ạkparami ghan ọghaaph ạḍiseph phọ ạngoom bịdi ịikpo oḍighi yogh ịiḍaany rꞌareḍeenaan.

⁴Kụ aḍita ẹmha phọ odia, buniin oḍighan rꞌạbuo aJu phọ, buniin oḍighan rꞌabutelhedom mọ.

⁵Kụ aruuruen phọ, rꞌạbuo aJu phọ, rꞌạbuo ạrumhu phọ ạbidi, ọḅoph ọnhu ịlo ọgilaam rꞌoroḅol ạbidi ikpo.

⁶Kụ ẹdu eḍigh rụru ạbidi kụ osumughu omite Lịstra rꞌaDaabi rạmha aLaikonia rꞌịphalagbal phọ.

⁷Kụ bịdi ụrol li ẹpe phọ ọghaaph ghan ooḅi ọghaaph phọ.

⁸Ẹpe Lịstra, oniin oye ạrol li dị aḍighi ẹkugha kꞌọkuruḅaka onhiin ọdi, dị kꞌekulha kőrelhe ghan.

⁹Oye phọ ọphon ạnaghan ni ọghaaph phọ ạPol, kụ ạPol aphogh nyọdi akananaam kụ ạmiin mọ ạmoogh ni omeeraam dị kookonomom nyọdi,

¹⁰kụ amoogha mọ, “Mẹera aaleeny!” Kụ ọdi gburughutuph aḅetenu amiigh orelhe.

¹¹Kụ aḍita awe phọ ọmiin bọ ịpe ạPol aḍighi bọ ọyughuron ọnhu aLaikonia mọ, “Ạrumugh phọ meeteneghian we isooraan iyoor!”

¹²Kụ ọta Bạnabas mọ aZius, mọ ạPol aHemis ịdi eḍighi bọ ọdi kụ uwo ẹmhu ọghaaph phọ.

¹³Kụ oyil ạrikia eru phọ oghol bọ mọ aZius, ẹpe ọloghonaan bọ otu emitenom ẹmha phọ, ạsighe ịizughum rꞌipoola ireeny aanmenemi sịnam amiteghom pạ ọnhu-aḍibuo phọ, kụ ọdi rꞌaḍita awe phọ ọwa ọphighiron ẹkia ọngo abutelhedom mọ.

¹⁴Kụ mem dị ạPol rꞌạBanabas ọnaghan bọ ịphen phọ, urunyian ni ibura ạbidi loor ophin ologhi, kụ oḍigh ogbo aḍita awe phọ ọlooghi mọ,

¹⁵“We phọ! Iḍighi ika kụ nyina reḍighi bọ rạraar phọ ịphen phọ? Yoor awe ni. Yoor ọmoogh ni ḍiniin aḍizu ịdipho anyina. Yoor ọsighe ooḅi ọghaaph iruomonaan inyina, ọbo nyina ẹwile oopho ạraraar phọ ịphen ekiton esoman Ẹnaan phọ edi ghan bọ, ẹpe ẹlhem bọ kẹ rꞌade rꞌọphiiny phọ rꞌịlo esi rꞌesi.

¹⁶Gediidi, ọdi ạwile ni mọ oomo areelhe ọtuan reten phọ ịpe ạbidi,

¹⁷kụ ọ́wile bịn dị ụ́maaghi iniin ịlo aḍimite phọ ọdi. Raḍighi ghan iiḅi, odi kꞌạke rạngo ghan ọlophia, rꞌamem ẹeḍiom, kụ rịpheremi ghan inyina eḍien rꞌọḅaal ologhi.”

¹⁸Ụkpar ri kụ ikpo ọnhu phọ ịphen emirighan we phọ ọphighiron ẹkia phọ ọngo ạbidi.

¹⁹Kụ buniin ạbuo aJu dị ọḍua ẹpe Ạntiok rꞌAikoniom kụ oru, ọponyon iloghi aḍita awe phọ kụ oroḅol Pọl ikpo ọghogh ọḍuanam pạ ẹmha phọ, ogbiom ghan mọ mamugh.

²⁰Kụ ạbumatuan phọ ọmeregha oko nyọdi ọlogh ogbo, kụ aḅetenu aḅula ẹmha phọ. Kụ rẹḅaal kụ ọdi rꞌạBanabas ọḍua ọghi Daabi.

²¹Kụ ẹpe Daabi, ạPol rꞌạBanabas ọghaaph ooḅi ọghaaph phọ dị ạbuminighan awe omeeraam aani, kụ ogbi oḅula Lịstra, rꞌAikoniom rꞌẠntiok.

²²Ọkparami ghan ruwaloor ạbumatuan phọ oromoghiom mọ bịdi kụ́bile omeeraam mọ ạbidi, mọ kọmiinom ni iboom ịminimiin kụ ogbi oḍigh aani ọmar phọ kꞌẸnaan.

²³Kụ rọson ikumoor awe rosereghi sịosi ạsiosi phọ, rꞌịiḅereghi rꞌọrol ọkoony kụ ọḅogh bịdi ọngo Ọmoogh-we phọ bịdi omeeraam bọ.

²⁴Kụ bịdi okiton Pisidia ọghi osi Pamfilia.

²⁵Bịdi rọghaaph ọghaaph phọ Ẹnaan pạ Paaga kụ ọghi Atalia.

²⁶Kụ oḍigh oghuugh origheel Ạntiok, ẹpe ọḅogh bọ bịdi ọngo ḍịseph Ẹnaan ịlo oḍighi phọ ọpo bịdi mọmadan bọ.

²⁷Rosi bọ kụ ookpomoghi bụo ạsiosi phọ ọghaaph oomo phọ ạraraar phọ Ẹnaan mẹtuan bọ bịdi eḍighi yogh, rꞌịdi ọdi maghughuron eghuugh omeeraam ạngo ruuruen phọ.

²⁸Kụ bịdi ọrolan rꞌạbumatuan phọ pạ ẹmha phọ obia.