Read abua Iiḍighi 18 Bible Online

Iiḍighi 18 - abua bible

Iiḍighi 18

¹Ịphen reten kụ ạPol ạḍua Ạtens ạghi Kọrint,

²kụ ạmiin oniin ọlo aJu dị oghol mọ Ạkuila. Ụmar nyọdi ẹpe Pọntos. Pụruku ọdi rꞌạPrisila ạnir ọdi ọḍua ni Itali oru, ịdi eḍighi bọ ạKlodios uwo ẹmha phọ aRom mạlhogh ologh mọ oomo ạbuo aJu ọḍuaghu Rom. Kụ ạPol ạghi asi kꞌạbidi,

³ịdi eḍighi bọ ọdi rꞌạbidi ọḅoph oniin ọdo oḍighi ọkologh ghan arukpe ọloghoḍiom arugbogo, kụ arughan bịdi oḍighi ghan oḍighi phọ.

⁴Kụ ọdi ạagbaghanaan ghan sịphe obughotu phọ tọrobo aḍio ophooghian, ạkpaariom ghan mọ ạbuo aJu rꞌạbuo aGris omeeraam.

⁵Mem mọ ạSailas rꞌaTimoti ọḍua bọ Masidonia oru osi, ạPol ạkuom oomo amem ọdi ọghaaph ghan adom mọ ḅịle rꞌoḍeenaan ghan ạbuo aJu mọ ạJizos kụ aMesaya phọ.

⁶Mem dị bịdi okitonaan oronyon nyọdi, kụ ọdi ạakpa ịisaar aruwol ọdi kụ ạḅeni bịdi mọ, “Ịḅaal anyina ẹrol rụmhu anyina! Ologhi ạmi apooph ni. Emiigh kꞌạnyiidipho mị kakiton asoman ruuruen phọ.”

⁷Rọḅem bọ ịduon phọ, kụ ạḍua ạghi kꞌooruen dị oghol mọ ạTitios Jọstos, dị rakueni ghan Ẹnaan. Otu ọdi atuman obughotu phọ.

⁸Kụ ạKrispos, uwo ẹmhu obughotu phọ, rꞌoomo kꞌọdi umeeraam ni Ọmoogh-we phọ. Ịbadi ạbunon ạbuo ạKorint dị ọnaghan bọ dom mọ umeeraam aani ni, kụ owurogh bịdi mụum.

⁹Ḍiniin aḍughul, kụ ạPol ạmiin uḍien dị Ọmoogh-we phọ rạḅeni ghan nyọdi mọ, “Kákiilaan mun! Kạaph ni ạghiom, úḅoorian ghan!

¹⁰Mị odianaan ni rꞌạna. Oye lọ kaḍighi nyịna ịyaar ólho. Ịbadi awe ạmi odi ni sịen ẹmha phọ ẹphen.”

¹¹Kụ ọdi ạrol ẹpe phọ lhạ rꞌạpakiri, ạtughemi ghan we phọ ọghaaph phọ Ẹnaan.

¹²Mem dị ạbuo ịtooghi aRom ọma Galio mọ aḍighi uwo ẹmhu Ạkaya, ạbuo aJu phọ ụḅoph ni ọnhu osiph Pọl ọsighe ọghi otu ịiruen,

¹³kụ ọḅem ghan mọ, “Oye phọ ọphon rạkpaariom ghan we mọ oghueni Ẹnaan reten dị ẹgbatanaan rꞌiilogh phọ.”

¹⁴ẠPol rạwa ọghaaph, kụ aGalio ạḅeni bụo aJu phọ mọ, “Eḍighi ḍighiton ḅịle mꞌosoor ologh, pọ mị muler ri loor ịnaghanan inyina.

¹⁵Kụ eḍighi bọ ịikonoghian ikpo ọnhu rꞌasiḍien, rꞌiilogh anyina, pọ nyina kụ ịiḅeghion ni ephogh. Mị úgbiom ologhi osoph ịiruen ọdo asighiton phọ ịphen.”

¹⁶Kụ ọdi aphorogh bịdi sịphe ạdol ịiruen phọ.

¹⁷Kụ aḍita phọ ạbidi omeleghuom Sostenis, uwo ẹmhu obughotu phọ, okuphogh dị abuugboom ịiruen phọ ọmiin ni. Kụ aGalio óphogh ịphen phọ ọlogh elegh.

¹⁸ẠPol ạḅile ni ạrolan bụo ạsiosi phọ ịminighan aḍughul-otu, kụ rọḅeni mọ ọmaar ọrol, kụ ạpham Prịsila rꞌẠkuila ọghimom ạSiria. Tụtu koḍigh oghuugh ẹpe Kenkria, ọdi aghula ni ẹmhu ọdi, loor iikunya phọ ọdi maghunyian bọ.

¹⁹Rosul Ẹfesos, kụ ạPol ạgbatanaan Prịsila rꞌẠkuila ạghi aḍigh obughotu phọ ạagbaghanaan rꞌạbuo aJu phọ.

²⁰Kụ ọḅeni mọ ọdi ạrol ebianam, kụ ómeera.

²¹Rọḅeni mọ bịdi ọmaar ọrol, kụ ạḅem mọ, “Eḍighi ni ịtooghi Ẹnaan, pọ mị kạḅile ni aḅula ẹphen.” Kụ ọdi aḍigh oghuugh ạḍua Ẹfesos.

²²Rosul Sizaria, kụ ọdi ạghi Jeruselem aphogh bụo ạsiosi phọ kụ ạḍua asi Ạntiok.

²³Rọrol ẹpe mọony amem, kụ ạḅile amiigh erelhe phọ ạḍua ẹmha ạgba ẹmha reelhe aGaletia rꞌaFrijia, ạkparami ghan iloghi ạbumatuan phọ.

²⁴Kụ Ạpolos, ọlo aJu dị ọmar Ạleksandria, aru ẹpe Ẹfesos. Ọdi oye dị ạmaar ọghaaph, alegheri ni igey Ạḍinya Iigbia phọ ạḅile ghan ạtughemi.

²⁵Ụtughemi ni nyọdi eten Ọmoogh-we phọ, kụ uwaloor ọdi ạghologhol li esi oḍighi phọ. Mem lọ ọdi rạkaaph, ạkaraghi ghan ạtughemi ịlo ạJizos, kụ ọlo ọdi phọ alegheri ịlo ewurom ạmuum mọ ạJon bịn.

²⁶Ọdi amiighom ọghaaph rꞌạkpo ologhi sịphe obughotu phọ. ẠPrisila rꞌẠkuila ọnaghan bọ ụsighe ni nyọdi ọloghoma, kụ ọmaaghi Emoom Eten Ẹnaan phọ oḍeenaan mọ ọdi ạmaar alegheri.

²⁷Ạbuo ạsiosi phọ ọmiin bọ mọ meḍigh ologhi Ạpolos ọḅeeny ọghi Ạkaya, ụkparami ni ologhi ọdi, kụ ọge ḍịnya ọghiom bụmatuan phọ mọ ọghereghom ni nyọdi. Ọdi asi bọ, ạloghonaan ni iboom ḍịghaagh bụphe mọtuan bọ ḍịseph Ẹnaan phọ omeeraam.

²⁸Rꞌịikpo kụ ọdi ạagbaghanaan ghan alher bụo aJu phọ, kụ ạḅeni ghan ạkpaariom aḍereghinaan sịphe Ạḍinya Iigbia phọ, mọ ạJizos kụ aMesaya phọ ni.