Read abua Iiḍighi 19 Bible Online

Iiḍighi 19 - abua bible

Iiḍighi 19

¹Ạpolos odi ni ẹpe Kọrint, kụ ạPol akiton rạmha ạnyu phọ aru asi Ẹfesos, kụ ạmiin buniin ạbumatuan,

²kụ apuru bịdi mọ, “Uwaloor Iigbia phọ isoorom ni inyina mem mọ nyina emeeraam bọ?” Kụ bịdi mọ, “Eeye, yoor kọ̋naghan ghan mọ Uwaloor Iigbia odi ghan ni.”

³Kụ ọdi apuru mọ, “Iwur inyina mụum mọ ika?” Kụ bịdi mọ, “Uwur iyoor mụum ewurom mọ ạJon.”

⁴Kụ ạPol mọ, “ẠJon awurogh ghan mụum bụlo mokiton esi ịkaraph, kụ ạḅeni ghan weye phọ mọ omeeraam Jịzos, nyọpo ratu bọ ọman phọ ọno.”

⁵Kụ mem dị bịdi ọnaghan bọ ịphen phọ, kụ owur bịdi mụum esi aḍien phọ ạJizos Ọmoogh-we phọ.

⁶Kụ ạPol ạḅam rạghaagh ọdi rụmhu ạbidi, kụ Uwaloor Iigbia phọ asoorom bịdi, kụ bịdi ọḅa ọnon ọnhu dị ụ́naghan kụ ọghaaph ịpe Ẹnaan egananami bọ.

⁷Kụ ụghiom ni ḍioph rꞌịyal awe.

⁸Esi ịraar ụnwanyu ọdi aḍigh ghan pạ obughotu phọ ạghaaphom rꞌạkpo ologhi ạaḅeghion ghan ạkpaariom ịlo ọmar phọ kꞌẸnaan.

⁹Abuniin ạbuo ịgbagharan phọ úmeeraam, kụ ọghaaph ghan ịkaraph ịlo Emoom Eten phọ, ogbo aḍita phọ. Kụ ạPol ạwile bịdi, ạgbatan bụmatuan phọ, kụ ọghi ghan ẹpe otu ịtuugha phọ ạTairanos ọmoogh ghan ruupuruan.

¹⁰Kụ ẹrol ịduon phọ esi ịyal ạsia, tụtu oomo ạbuo aJu rꞌạbuo aGris phọ orugh bọ eelhe phọ Esia, ọnaghan ọghaaph Ọmoogh-we phọ.

¹¹Ẹnaan ịtuan ghan ni Pọl eḍighi yogh ịikia ịiḍaany.

¹²Ụsighe ghan sịpokisi rꞌinyoraam, dị ạPol ạḅogh aani, bịn ookonomom rẹezegh ophoroghom ịkaraph aruwaloor.

¹³Abuniin ạbuo aJu, dị oghiraan ghan ophorogh ịkaraph aruwaloor, ọnya aani ghan oghol aḍien ạJizos Ọmoogh-we phọ oḍighi yogh ịiḍaany. Bịdi ụḅeni ghan ịkaraph aruwaloor phọ mọ, “Mị ạsighe ḍien ạJizos phọ ọpo ạPol rạkaaphom ghan bọ, rịḅeniom inyina mọ imite.”

¹⁴Oḍual ạnmuny oye dị oghol mọ aSkiva, uwo ẹmhu oyil ạrikia phọ, kụ uḍighi bọ ịphen phọ.

¹⁵Kụ ọkaraph uwaloor phọ ạḅeni bịdi mọ, “Mị alegheri ni Jịzos, ạnaghan ịlo ạPol, kụ nyina phọ — ạbuanhian?”

¹⁶Kụ oye phọ ọpo ọkaraph uwaloor phọ odi bọ ẹmhu phọ, aphooph azuom bịdi kụ ạkpar apu, tụtu bịdi oḍighima yogh rạraar oghilighu rꞌẹdaḅa omite pạ otu phọ.

¹⁷Oomo ạbuo aJu rꞌạbuo aGris phọ orugh bọ ẹpe Ẹfesos ọnaghan bọ ịphen phọ, aruugu asiph ni bịdi, kụ oophughemi ḍien ạJizos Ọmoogh-we phọ.

¹⁸Ịbadi ạbudi omeeraam uru ni sịphe ogbo phọ oghonono kụ ootuma ịkaraph dị bịdi moḍighi yogh.

¹⁹Kụ ịbadi ạbudi ọtuugha ghan bọ ịiḍaany phọ ọsighe yogh rịnya phọ ạbidi oru ọsuughi nịan pạ ogbo aḍita awe phọ. Ogbi bọ ikpoki dị oghoom rịnya phọ ịman oogh ọonir ipoḍi asilva.

²⁰Areten phọ ịphen kụ ịdi ọghaaph Ọmoogh-we phọ aphoph aaleghaan.

²¹Ịphen reten, kụ eḍigh ologhi ạPol okiton aMasidonia rꞌẠkaya ọghi osi aJeruselem. Ọdi ạḅem mọ, “Mị ạrol ẹpe phọ, mị kạḍua ni asi Rom.”

²²Kụ arom Timoti rꞌẸrastos, ịyal ạbudi rotelhe ghan dom ọdi, mọ ọghi ẹpe Masidonia, kụ ọdi ạrol eelhe Esia ebianam.

²³Mụen kụ amem dị oboom ọgbaragbara ạtuan Emoom Eten Ọmoogh-we phọ asoor ẹpe Ẹfesos.

²⁴Oniin ọlemom asilva dị oghol mọ ạDemetrios, ạlhem ghan nmụny aghuḍuul ạghighemiom obughotu um-ạke dị oghol mọ Ạrtemis. Kụ ọlem mọ ọdi ạngo ni oboom ạsuo bụo oḍighi phọ.

²⁵Kụ ọdi ạmagh bụen ọdi, rꞌạbunon ạbuo oḍighi phọ ọphon, aakpomoghi kụ ạḅeni mọ, “We phọ! Nyina elegheri ni mọ ẹelha ayira edi sịen oḍighi phọ ọphon.

²⁶Nyina rẹmiin ni kẹnaghan ịphen ạPol raḍighi bọ. Rạḅem ghan mọ ạrumugh dị ọsighe rạghaagh kụ ọkaaghiom ị́moogh ghuḍum. Maakeleghi akirion bụminighan awe, kẹ́phen Ẹfesos bịn, esugha ẹnum ọbo oomo phọ Esia ni.

²⁷Ogona ni loor! Aḍien oḍighi phọ ayira kẹpu. Ịdi etum pạ, obughotu phọ Ạrtemis oboom um-ạke phọ ayira, kạ́man mun ịyaar. Kopiemi ni igbogh phọ ọdi, um-ạke phọ oomo phọ Esia rꞌaḅirini phọ rokueni ghan bọ.”

²⁸Ọghaaph phọ ọphon ạghagh ni iloghi aḍita awe phọ, tụtu ọlooghi mọ, “Oboom oboom Ạrtemis phọ Ẹfesos!”

²⁹Kụ ọgbaragbara phọ aleeny ẹmha phọ, kụ oghughaan ọghi osiph Gạyos rꞌẠristakos, bụo aMasidonia, dị rꞌạPol orelhian ghan, ọsighe ọghi ẹpe ịgua phọ.

³⁰ẠPol ạwa ni oḍigh ịpa eghurughan awe phọ, kụ ạbumatuan phọ omirighan nyọdi.

³¹Kụ buniin ạbuo ạrumhu eelhe phọ, dị oḍighi rịghiri ạPol, oromoghiom mọ kụ́ḍaka uḍighom pạ ịgua phọ.

³²Ookpomoghan phọ ạgbaragbara ni, kụ ịilo kịrokiro esoor, kụ ogbogh opol awe phọ ụ́karaghi ulegheri ịyaar phọ ọtu bọ kụ ookpomoghan bọ.

³³Kụ ạbuo aJu phọ ọsighe Ạleksander omitiom pạ ogbo aḍita phọ, kụ ịbadi ogbiom ghan mọ ọdi kụ aseere bọ ḍien phọ. Kụ Ạleksander aphighemi ḍịghaagh ọdi mọ oḅoroghian, kụ ạwa ghan ọgba ọphelaam ẹmhu ọdi.

³⁴Rolegheri bọ mọ ọdi ọlo aJu, kụ oomo phọ ạbidi ọḅophoghan ọlooghi esi ịyal ạwa mọ, “Oboom oboom Ạrtemis phọ Ẹfesos!”

³⁵Ọgeeghia ẹmha phọ rọphoomi we phọ, kụ ạḅeni mọ, “Weye Ẹfesos! Ạnhian kụ ọdi úlegheri mọ ẹmha phọ Ẹfesos rooko ghan obughotu Ạrtemis oboom um-ạke phọ, ḅịle rꞌigbudu phọ ọdi ẹḍua bọ kꞌạke kụ ẹghar?

³⁶Ịlo ịparanaan ílho. Iḅoroghian bịn, kéḍighinom ekpom!

³⁷Ạri nyina mẹsighe we phọ ạbuen etu, dị kạ́ruḅa ni, ḅịle kẹn úufolomi um-ạke phọ ayira.

³⁸Eḍighi dị ạDemetrios rꞌawe ọlem mọ ọdi ọmoogh ḍighiton rꞌoye, pọ okunyon ni ruutu ịiruen, dị abuugboom ịiruen odi ni. Ọghi sịphe kụ oniin ạgba ạkpulughiom nyoniin!

³⁹Kụ eru dị nyina ẹmoogh ịnon ịikpalaghian, pọ eepoogh edi ni pạ ookpomoghan phọ rọḅem ghan bọ sighiton phọ.

⁴⁰Ogona ni loor, ọbo kusiph ghan bọ iyira ologh loor ọgbaragbara phọ ọphon asoor bọ rodon! Ẹmhu ọtuan kụ ọgbaragbara ílho. Ọmaar ọoḅeghion, yira kọ́moogh egey ịyaar ọghaaph.”

⁴¹Roseere ọghaaph phọ, kụ ọgeeghia phọ ạḅeni bụo ookpomoghan phọ mọ ogheleghu.