Read abua Iiḍighi 20 Bible Online

Iiḍighi 20 - abua bible

Iiḍighi 20

¹Ọyugh phọ rọpho, kụ ạPol aakpomoghi bụmatuan phọ kụ rọghaaph rọkparamiom iloghi ạbidi, kụ ạḅeni mọ ọmaar ọrol, kụ ạwile bịdi ạghi Masidonia.

²Kụ ọdi arelhe yogh ni oomo areelhe ẹpe phọ, kụ rọghaaph ịbadi ikpo ọnhu rọkparamiom iloghi awe phọ kụ ạghi asi Gris,

³kụ ạrol ẹpe phọ ịraar ụnwanyu. Kụ rạnyaaghian oḍigh oghuugh ọghi ạSiria, kụ alegheri mọ ạbuo aJu phọ roosophoghian ni nyịno, kụ agbiighiom okiton aMasidonia kụ oḅula.

⁴ASopater ọony ạPiros, ọlo ạBeria, ạdaph ni nyọdi; kụ Ạristakos rꞌạSekondos, ạbuo ạTesalonika, rꞌạGayos, ọlo aDaabi, rꞌạTikikos rꞌạTrofimos, ạbuo eelhe phọ Esia, rꞌaTimoti ọdaph aani.

⁵Bụen phọ uḍiemi ghan ni ukori iyoor ẹpe Troas.

⁶Ẹyaal ạbred phọ ọpo rọ́logh ghan bọ yist phọ reten, kụ yoor oḍigh oghuugh ọḍua Filipai. Kụ esi oogh aḍughul-otu, yoor ọghi ọteeny bịdi ẹpe Troas, kụ ọrol oḍual aḍughul-otu.

⁷Dulhe aḍio ophooghian phọ, kụ yoor ookpomoghan egina esi ịlo ọparion ạbred. Esi dị rẹḅaal ạPol kạḍua, kụ ạghaaph ọodoony ọghaaph ạḅeni bịdi, tụtu ẹteeny ogbo aḍughul.

⁸Kụ ịbadi ịtozi ịrol li sịphe osoph-ạnyu otu ẹedaneen phọ yoor ookpomoghan bọ.

⁹Kụ oniin onyugheel ọony dị oghol mọ ạYutikos ạrol li ude loor oniin eghuugh-ookuugh. Ịdipho ọghaaph phọ ạPol rạdoony bọ, bịn ạralha aḅogh nyọdi, kụ ạḍua ẹedaneen dị emuneniom ịraar ameel ude kụ ọoghophion ọsighe mọ mamugh.

¹⁰Kụ ạPol asoor ude aḅololoom aghurughi nyọdi, kụ ạḅem mọ, “Kẹ́yugh. Ọdi kőmugh.”

¹¹Rọḅile rọsiiny ẹpe ạnyu phọ, kụ ạparion ạbred ale. Kụ ọdi rꞌạbidi ụghaaphan ni iboom, tụtu ẹḅaal, kụ ọdi ạgbatanaan bịdi.

¹²Kụ bịdi ọsighe onyugheel ọony phọ ọḍuanam rꞌiboom iboh.

¹³Yoor kụ ọphur ọteeny oghuugh phọ kụ oḍigh osi Ạsos, esi dị ọma ọsaany aani ạPol. Ọdi ạtuan dị kakiton owol kụ ụḅeni bọ iyoor ịduon phọ.

¹⁴Ọdi aru bọ ụteeny iyoor ẹpe Ạsos, yoor ụsaany ni nyọdi kụ ọghi osi Mitilini.

¹⁵Rẹḅaal kụ yoor omitiom oghuugh phọ osoor ẹḅeenyom ạKios, rẹḅile rẹḅaal kụ ọghi osi Sạmos, kụ ḍio dị etum pạ kụ yoor osi Mailitos.

¹⁶ẠPol agbiighiom okiton Ẹfesos, ọbo kaabinya ghan bọ ẹpe Esia. Ọdi aagborion ni, mọ katue ni ạnuun asi Jeruselem kụ ẹteeny ḍio ạPentikost phọ.

¹⁷ẠPol ạrol Mailitos kụ arom ạghiom mọ ikumoor awe ạsiosi phọ Ẹfesos oru ọteeny nyịno.

¹⁸Bịdi roru, kụ ọdi ạḅeni mọ, “Nyina rꞌaloor anyina elegheri ni ọdo ẹeghara dị mị ịrolom bọ inyina oomo amem kꞌẹḅel aḍio phọ mị ạdaari bọ ẹda ẹphen Esia.

¹⁹Mị aḍighi ghan bọ oḍighi ạngo Ọmoogh-we phọ rꞌoomo osooromi aloor rꞌizin, ghạlamo ịdipho ạbuo aJu phọ oosophoghian bọ ni ụmiine ịmi.

²⁰Mị ịyaar ạsuo ụ́booghi ghan ọghaaph rꞌọtughemiom anyina esi ogbo, rꞌọḍua ghan otu ọgba otu. Mị oye ụ́gbatan ghan.

²¹Mị ụkpaariom aḍeenaan ghan bụo aJu rꞌaruuruen phọ mọ okiton esi ịkaraph phọ ạbidi osoman Ẹnaan, omeeraam Jịzos Kraist Ọmoogh-we phọ ayira.

²²Nyịidipho nyina rẹmiin ni mọ Uwaloor Iigbia phọ murorori ịmi ạsighe rạki Jeruselem. Mị úlegheri ịlo kimiteghunaan ịmi ẹpe phọ. Ịdi mị alegheri,

²³Uwaloor Iigbia phọ rụphur ghan ịmi rụru tọrobo ẹmha mọ ikoli rꞌịminimiin rikori ni ịmi.

²⁴Kụ mị ụ́sighe ghuḍum mọ ạmi ụmaghami ịyaar, ọbo mị arue akureri oḍighi phọ, ạmadan sidom mọ ạJizos Ọmoogh-we phọ urom bọ ịmi mọ mị uḍeenaan ooḅi ọghaaph ịlo ạḍiseph phọ Ẹnaan.

²⁵“Mị marelhe yogh ni ogbo anyina ọghaaph ịlo ọmar phọ kꞌẸnaan, kụ nyịidipho mị alegheri ni mọ rꞌọnyo anyina kạ́miin mun ghisigh ạmi.

²⁶Ịduon kụ iḍighi kụ mị ạkar bọ rịḅeni inyina rodon phọ ạḍien, mọ mị ụ́upuph esi ịḅaal oomo awe.

²⁷Mị ụ́booghi ogbononomi oomo arigbiom mọ Ẹnaan ọḅeni anyina.

²⁸Igona loor anyina rꞌesi oomo aḍita phọ ạbuphe Uwaloor Iigbia phọ mạḅogh bọ ạlogh rạghaagh phọ anyina. Nyina abukoriom ạbuo ạsiosi phọ, Ọmoogh-we phọ ạsighe bọ ịḅaal phọ ọdi kụ aghoom.

²⁹Mị alegheri ni mọ mị rọḍua, ilhom ịnam keḍigh ni sịen ogbo phọ anyina kụ kẹ́nmaanaan iyool-ịga phọ.

³⁰Amem retu ni dị abuniin komite ni sịen ogbo phọ anyina, kụ ọgbaaghi ọkpe, ịlo ookeleghi ạbumatuan phọ ọsighe.

³¹Esi ịduon phọ igona loor, kụ ẹghiom ghan ologhi mọ rꞌizin ni ḍughul rꞌootaany mị úsoph ghan mem ọtughemi oomo phọ anyina esi ịraar ạsia.

³²“Kụ nyịidipho mị rịḅogh inyina kạngo Ẹnaan, rꞌọghaaph ạḍiseph phọ ọdi. Ọdi kụ katue iphophe inyina ạngoom erua dị oomo ạbuphe mowoph bọ kodian ole.

³³Mị úpoghogha silva mꞌagol mꞌibura ọnon oye.

³⁴Nyina rꞌaloor anyina elegheri ni mọ mị ụsighe ghan ni rạghaagh ạmi kụ ạwaam rạraar dị mị rꞌạbuphe rꞌạmi ọrolan bọ kọtolom.

³⁵Mị miḍeenaan inyina ịbadi areten mọ ẹkpianaan ni okumuan ghan ọloghonaan ạḍighaagh bụphe ịnyaam mọ ílho bọ, rꞌọghiom ghan ologhi ikpo ọnhu Ọmoogh-we phọ ịdipho ọdi rꞌaloor ọdi ạḅem bọ mọ, ‘Iboh kꞌẸnaan edianaan bụphe rọngo bọ epu bụphe rọboor bọ.’”

³⁶ẠPol roseere ọghaaph phọ, kụ ọdi rꞌạbidi okpuḍughian ọoḅereghi.

³⁷Kụ oomo phọ ạbidi rꞌemoghi kụ oghurughi orum mọ kụ ọkpunogh ọnhu ọdi.

³⁸Ọto phọ ạbidi ạkar ạrol sịphe ikpo ọnhu phọ dị ạghaaph bọ, mọ bịdi nyịno kọ́miin mun phọ, kụ bịdi ororori nyọdi osiemi ẹpe oghuugh phọ.