Read abua Iiḍighi 24 Bible Online

Iiḍighi 24 - abua bible

Iiḍighi 24

¹Oogh aḍughul-otu reten, kụ Ạnanayas uwo ẹmhu oyil ạrikia phọ rꞌabuniin ikumoor awe rꞌoniin ọgbaam iilogh dị oghol mọ ạTatulos ọghi osi Sizaria, kụ ọmeera ghisigh ạFeliks ọdaam eelhe phọ, ọgba iilogh phọ ạbidi ọḅamaghi ẹmhu ạPol.

²Kụ rọmagh ọnyo-ikoli phọ, kụ ạTatulos ạgba ịḅel ạsiagba phọ ạḅamaghi ẹmhu ạPol. Ọdi mọ: “Fẹliks, oboom oboom, ẹdaam olegheri ịyaar phọ ạna kụ ịngo iyoor ẹepho esi ịbadi ạsia, kụ ịbadi ạraraar dị ẹkpe onmeeghi monmeeghi yogh, pịdi igey ẹrolonaan we eelhe phọ ẹphen.

³Onmeeghi ạraraar phọ nạ ranmeeghi bọ oomo amem rꞌoomo arikpisi ịḅeeraan ni iyoor iboom. Yoor ọkar ri rọseph nyịna mọ nạ raḍighi ni igey.

⁴Mị ụ́wa ophiemi amem ạna iboom. Mị rạaḅereghian nyịna mọ zuumaam ni ạnaghan ẹphurukpu ịphen yoor kọgba bọ.

⁵Yoor ụwa ọmiin mọ oye phọ ọphon aḍighi ni ooto rꞌosooromineen esi aghuḍum ạtorobo ạbuo aJu oomo areelhe phọ. Ọdi kụ oḍiemiom otul aweye ạNazeret.

⁶Ọdi ạwa kẹn ni ọopu Otu Ịiḅereghi phọ; ịduon kụ iḍighi kụ yoor osiph bọ nyọdi. [Yoor ụwa ni ọdaph iilogh phọ ayoor kụ osoph ịiruen ọḅam ẹmhu ọdi,

⁷kụ aLisias ogbogh ọnyo ẹgham mọ aru rꞌigbagbaar ọdi kụ uziton iyoor nyọdi ạar.

⁸Kụ ạḅem mọ bụphe ọgbaam bọ nyọdi sịagba phọ oru ghisigh ạna kụ ọghaaph.] Nạ ạmaar ạaḅeghion ikpo ọnhu ạsiagba phọ ọdi aphogh, nạ kạmiin ni ịpe eru bọ igey phọ.”

⁹Kụ ạbuo aJu phọ uḍighan aani ni ọgba iilogh phọ ọḅamaghi ẹmhu ọdi, kụ ọḅem mọ ạsiagba phọ ạTatulos ạgba bọ igey ni.

¹⁰Kụ ọdaam eelhe phọ aphighemi ḍịghaagh ạḅeni Pọl mọ ạgba aani, kụ ọdi amiigh mọ: “Mị malhegheri ni mọ esi ịbadi ạsia dị meten nạ kụ oogboom ịiruen eelhe phọ ẹphen. Ịduon kụ iḍighi kụ ẹḅaal bọ ni ologhi ạmi ọgba ọphelaam ẹmhu ạmi ghisigh ạna.

¹¹Ịduon nạ kạmiin bọ ni rꞌaloor ạna, ke̋pel ḍioph rꞌịyal aḍughul-otu dị meten kụ ẹdi mị ạghi ẹpe Jeruselem ooseeny Ẹnaan.

¹²Ạbuo aJu phọ ụ́miin dị oye rꞌạmi rọogbanaghian ọnhu pạ Otu Ịiḅereghi phọ, ḅịle mị rạkpuughiom we ịlo asighiton sịphe phọ, mꞌarubughotu phọ, ḅịle mꞌịnon ariisi.

¹³Kụ bịdi kẹn kótue ọgba omitiom iilogh phọ bịdi usiph bọ ịmi.

¹⁴Mị rạ́paranaan mọ mị ạdaph ni Emoom Eten phọ bịdi oghol bọ mọ ọkaraph otul phọ kụ raaseeny Ẹnaan ạburude ạburude phọ ayoor. Kụ mị ạḅile kẹn ni ameeraam oomo phọ ạraraar phọ ịpe ọge bọ sịphe iilogh phọ aMozis rꞌạrinya ariil phọ.

¹⁵Bụen rụwa bọ ịmi sighiton phọ ọḅoph oniin phọ oḍuom ologhi phọ esi Ẹnaan mọ tọrobo oye, ogey rꞌọkaraph, kaḅetenu ni esi aḍuugh.

¹⁶Ịduon kụ iḍighi kụ oomo phọ amem mọ mị rạwa ghan bọ oḍighi ghan igey ghisigh Ẹnaan rꞌaweye.

¹⁷“Mem dị mị ạḍua bọ Jeruselem ibia ni kụ mị ạpham ikpoki aruomonaan weye phọ ạmi, ạḅile ạphinyon bịdi rịkia.

¹⁸Kụ mị odi raḍighi ghan ịphen phọ sịphe Otu Ịiḅereghi phọ, kụ bịdi ụmiin ịmi dị mị maḍighi ịyaar aghuḍum oselemian aloor phọ ạman. Ookpomoghan ḅịle rꞌọgbaragbara ị́tol.

¹⁹Kụ bụo aJu dị ọḍua Esia kụ oru ụrol li, kụ ọbo bịdi mutu ni ghisigh ạna ọgba ịkaraph phọ mị aḍighi bọ ọḅeni nyịna.

²⁰Pọ bụen odi bọ sịen ọghaaph ọdo ologh phọ bịdi ọmiin bọ mọ mị asoor phọ, mem mọ mị ạmeera bọ ghisigh ookpomoghan ikpolom awe phọ!

²¹Eniin ịyaar kụ ịrol dị mị ạlooghi mem mọ ọpo mị ạmeera bọ pạ ogbo phọ ạbidi mọ, ‘Rodon ụtuan mọ mị ameeraam mọ oḅetenu esi aḍuugh odi ghan ni kụ ọgba bọ sịagba phọ rọḅamaghi ẹmhu ạmi ghisigh ạna.’”

²²Kụ ạFeliks, ọpo ạmaar bọ alegheri ịlo omeeraam ạbuphe rọdaph ghan bọ Emoom Eten phọ, akpereghi ḍighiton phọ kụ ạḅem mọ, “ALisias ogbogh ọnyo ẹgham mọ aru kụ mị agbi osoph ọoruen.”

²³Kụ ọdi ạto ạḅeni uwo ẹmhu ạbuo ẹgham mọ rapogh bọ Pọl mọ ạlogh nyọdi otu ikoli, kụ ọlo ọngo ni nyọdi eepoogh ạrighiri ọdi oru ghan ọmiin, oḍighi ịlo ọdi rạwa ọngo nyọdi.

²⁴Asiḍughul-otu reten, kụ ạFeliks rꞌạDrusila ạnir ọdi, ọnyo aJu, oru, kụ ạFeliks arom mọ ọsighe Pọl oru, kụ ạnaghan ịpe ọdi ạghaaph bọ ịlo omeeraam ạJizos Kraist.

²⁵Mem dị ọdi ạghaaph bọ ịlo oḍighi aruukuan, rꞌọphamaghan aloor, rꞌaḍio ịiruen ịlo oye rꞌoye, kụ aruugu asiph Fẹliks kụ ạḅem mọ, “Ḅịle aḅula ẹpe otu ikoli phọ, tụtu ẹteeny mem lọ mị ạmoogh eepoogh kụ mị ạḅile ạmagh nyịna.”

²⁶Ọdi agbiom ghan mọ ạPol kạsighe ikpoki atiom nyịno ọman. Esi ịduon phọ, ọdi ọ́gba ghan mem ọmagh ạPol, lọ bịdi kọghaaphan ọghaaph.

²⁷Ịyal ạsia reten, kụ ạPorkios Fẹstos ạsighe esi phọ ạFeliks ạda eelhe phọ kụ ạFeliks ạtuan ni ọmoogh aḍigey aḍien esi ạbuo aJu phọ, bịn ạwile Pọl pạ otu ikoli phọ.