Read abua Iiḍighi 25 Bible Online

Iiḍighi 25 - abua bible

Iiḍighi 25

¹Kụ ạFestos roru rosi pạ eelhe phọ, ịraar aḍughul-otu reten, kụ ạḍua Sizaria ạghi Jeruselem.

²Kụ ạbuo ạrumhu ariil ạrikia phọ rꞌikpolom awe ạbuo aJu phọ ọgba iilogh phọ bịdi osiph bọ Pọl ọḅeni Fẹstos.

³Kụ bịdi ọoḅereghian nyọdi mọ aḍighi bụno iiḅi, ameeraam mọ oḅulemi Pọl ẹphen Jeruselem, loor esi dị bịdi ụwa ghan ọmoogh eepoogh okori ọdi eten oghiigh.

⁴ẠFestos ạphagharanaan bịdi mọ, “Loor esi dị ạPol odi bọ ikoli phọ ẹpe Sizaria, kụ mị rꞌaloor ạmi kạnuun bọ ni aḅula ẹpe,

⁵ạbuo ạrumhu phọ anyina ụdaph ịmi ọghi ẹpe ọgba ịkaraph phọ ạPol aḍighi bọ!”

⁶ẠFestos rọrolan rꞌạbidi esi ọphaanya mọ ḍioph aḍughul-otu, kụ ọdi aḅula ẹpe Sizaria, kụ ḍio phọ etum bọ pạ ọdi ạrolom ạgada ịiruen phọ, kụ arom mọ ọsighe Pọl aru.

⁷Kụ mem dị ạPol aru asi bụo aJu phọ ọḍua bọ Jeruselem oru ụmeregha ni okoom nyọdi ọgbaaghi ịikpara iilogh ọḅamaghi ẹmhu ọdi, kụ ạri bịdi útue ụgba umitiom ụlogh ephigh.

⁸Kụ ạPol ạgba rạpelaam ẹmhu ọdi kụ ạḅem mọ, “Mị úḍighi ịyaar dị ẹpioman esi iilogh ạbuo aJu phọ rꞌOtu Ịiḅereghi phọ rꞌuwo eelhe phọ aRom.”

⁹Kụ ạFestos ạwa ghan ọmoogh aḍiiḅi aḍien esi ạbuo aJu phọ kụ ạḅem mọ, “Nạ rạwa ni ọghi aJeruselem kụ ọrol ọghaaph aḍighiton phọ ạna ghisigh ạmi ḍụghum?”

¹⁰Kụ ạPol ạḅem mọ, “Mị úmeera. Mị rạwa ni dị uwo eelhe phọ aRom kụ kạghaaph ḍighiton phọ ạmi. Ịsiphe kụ ịkpe ọrol ọghaaph aḍighiton phọ. Mị ụ́pioman bụo aJu phọ, ịdipho nạ alegheri bọ ni.

¹¹Eru dị mị ạka ologh dị ẹkpianaan oghiigh ạmi, pọ mị úkel omugh; kụ eru dị ịpe bịdi rụgbaanaan bọ ịmi ítu igey, pọ oye ólho dị kụsighe ịmi ạngo bịdi. Mị mạsighe ḍighiton phọ ạmi rạkiomaan Siza uwo eelhe phọ aRom.”

¹²Kụ ạFestos rozu rụru bụo oroma phọ ọdi, kụ ạphagharanaan mọ, “Nạ mạsighe bọ ḍighiton phọ ạna ạghiomaan Siza, pọ nạ kạki ni kꞌaSiza phọ.”

¹³Asiḍughul-otu reten, kụ Ọdaam Ạgripa rꞌaBanisi oru ẹpe Sizaria ọmagh ạFestos mọ, “Nạ masi.”

¹⁴Bịdi mọrol pạ ịbadi asiḍughul-otu kụ ạFestos ạgba ḍighiton phọ ạPol ạḅeni ọdaam ẹmha phọ mọ, “Oniin oye dị ạFeliks ạlhogh ikoli odi ni sịen ḍịghaagh ạmi.

¹⁵Kụ mem dị mị ạghi bọ Jeruselem, ạbuo ạrumhu ariil ạrikia phọ rꞌikumoor awe ạbuo aJu phọ ụgba ni iilogh ọḅamaghi ẹmhu oye phọ ọphon kụ ụḅeni ịmi mọ mị usoph ọoruen upume nyọdi.

¹⁶Kụ mị ụḅeni ni bịdi mọ ạbuo aRom ụ́moogh ẹzo ọḅogh ghan oye lọ osiph ologh bịn ọngo, tụtu bụphe ọpham bọ nyọdi ologh phọ rꞌọdi mọmerenyan ọgbaanaan.

¹⁷Kụ mem dị bịdi oru bọ ẹphen mị útoph mem, kụ ḍio phọ ạḍiphe etum bọ pạ, mị ạrolom ạgada ịiruen phọ, ạto ạngo mọ ọsighe oye phọ oru.

¹⁸Kụ mem dị bụphe rꞌọdi rọokonoghian bọ oḅetenu bọ ụ́gba ọdo ịkaraph phọ mị agbiom bọ ologhi phọ.

¹⁹Ịikonoghian phọ ạbidi iḍighi ịlo omeeraam mọ ạbidi bịn, rꞌịlo oniin oye dị oghol mọ ạJizos, dị amugh kụ ạPol rạḅem ghan mọ maḅetenu sịphe aḍuugh phọ.

²⁰Ịlo ọnaghan aḍighiton phọ ạḍien igo ni ịmi. Ịduon kụ iḍighi mị apuru Pọl mụghumo ọdi ameeraam ni ọghi aJeruselem kụ ọrol ọghaaph aḍighiton phọ ọdi.

²¹Kụ ạPol mạsighe ḍighiton phọ ạkiomaan Siza. Ọdi ạḅem mọ ọno kạtol li pạ otu ikoli phọ ẹteeny ḍio lọ kọsighe nyịno ọkiom Siza, kụ mị mạto mọ ọdi ạrol li pạ otu ikoli phọ.”

²²Kụ Ạgripa ạḅeni Fẹstos mọ, “Mị rꞌaloor ạmi rạwa ni ọnaghan aani aḍighiton oye phọ ọphon.” Kụ ọdi mọ, “Iḍue nạ kạnaghan ni ịpe ọdi kạkaaph bọ.”

²³Ḍio phọ etum bọ pạ Ạgripa rꞌaBanisi uru ni rꞌeboom eegu rꞌuduru. Bịdi rꞌaruwo ẹmhu ạbuo ẹgham mọ rꞌikpolom awe ẹmha phọ uḍigh ni sịphe otu ạsiagba phọ. Kụ ạFestos ạto ạngo mọ ạPol aru.

²⁴Kụ ạFestos ạḅem mọ, “Nạ Ọdaam Ạgripa, rꞌanyina phọ ạbuen edi bọ sịen, nyina mẹmiin ni oye phọ ọphon, ọpo oomo aḍita ạbuo aJu phọ oḍighi bọ ḍighiton phọ ọḅam ẹmhu ọdi sịen ghisigh ạmi. Ẹphen rꞌẹpe Jeruselem, rọlooghi ghan mọ ị́kpe mun lọ ọdi kạtol.

²⁵Kụ mị ạwa bọ mị ụ́miin ịyaar lọ ọdi aḍighi dị ẹkpe oghiigh ọdi. Kụ ịdipho ọdi mạsighe bọ ḍighiton phọ ọdi ạghiom Siza, mị mameeraam ọsighe ọdi ọghiom ẹpe phọ.

²⁶Mị ụ́kar ụmiin ịlo ọdi dị eganana ọge ọghiom uwo eelhe phọ aRom. Ịduon kụ iḍighi kụ mị ạtu bọ ạsighe nyọdi ạmeremi sịen ghisigh anyina, ḅịle rꞌesi ạna Ọdaam Ạgripa, pịdi mem lọ mẹeḅeghion ephogh iini mị kạmoogh ni ịyaar ọge ịlo ọdi.

²⁷Ẹtol mụdi ị́moogh ẹmhu ọtuan ọsighe ọnyo-ikoli bịn ọghiomaan aSiza, dị ụ́wa ulegheri ọdo ologh phọ dị asoor bọ.”