Read abua Iiḍighi 26 Bible Online

Iiḍighi 26 - abua bible

Iiḍighi 26

¹Ạgripa ạḅeni ni Pọl mọ, “Mọngo nyịna eepoogh mọ kạaph aani.” Kụ ạPol asele ḍịghaagh phọ ọdi, kụ ạgba ọphelaam ẹmhu mọ:

²“Nạ Ọdaam Ạgripa, mị akpetaan ni ooḅi owol dị mị ạmeera ghisigh ạna kụ ọgba ọphelaam ẹmhu ạmi rodon, ọmaaghi ạraraar phọ ịpe ạbuo aJu phọ ọtu bọ kụ rụgbaghaghaam bọ ịmi,

³ịdi eḍighi bọ nạ ạkar ri ạtolan dọl rꞌeḍighinom ịyaar ạbuo aJu phọ. Ịduon kụ iḍighi kụ mị rạaḅereghian ni nyịna mọ ler ri rụru ạnaghan ịphen mị kạgba bọ.

⁴“Oomo ạbuo aJu phọ olegheri ni rọozo aghuḍum mọ mị ạrolom bọ weye phọ ạmi rꞌẹpe Jeruselem emiigh kꞌẹghoroghor ạmi kụ ẹteeny nyịidipho.

⁵Ịdipho bịdi olegheri bọ ni — lọ bịdi komeeraam ni ọgba omitiom — mị uḍighan otul aFarisi phọ olhom bọ opu bụnon sịphe ooko ghan iilogh ạbuo aJu phọ.

⁶Kụ nyịidipho mị ạmeera sịen ịlo kokori osoph ọoruen ụngo ịmi esi oḍuom ologhi phọ mọ Ẹnaan kemuneni ni ịpe ọdi aguanaan bọ bugbogh ạburude phọ ayoor.

⁷Ḍioph rꞌịyal arughunughun phọ ayoor oḍuom ni ologhi mọ komuneni ni oguan phọ, kụ ọtu bọ rọoḅereghi Ẹnaan ḍughul rꞌootaany. Ye phọ, eḍighi ni iikia iboom dị bụo aJu phọ ọtuan oḍuom ologhi phọ ọphon kụ ruḅoroghom ịmi. Uḍighi ika kụ nyina ghụn ni kụ ímeeraam bọ mọ Ẹnaan reḅerion ghan ni bụlo momuughu?

⁹“Mị rꞌaloor ạmi ụutughian ni mọ ẹkpe ni eenan ạbulo rokol ghan ḍien phọ ạJizos ọpo ạNazeret phọ.

¹⁰Ịphen kụ ịdi mị ạkar bọ ni aḍighi ẹpe Jeruselem. Ạbuo ạrumhu ariil ạrikia phọ ụngo ni ịmi ịikpo dị mị asiphi ni ịminighan aweye Ẹnaan ạkasaghiom otu ikoli. Mem lọ osophonaan bịdi erugh aḍuugh, mị kụ ụlogh ghan ịiphaghamiom.

¹¹Ẹgba amem mị ụmiine ghan ni bịdi pạ oomo arubughotu phọ ạbidi ạwaam ghan mọ bịdi oghel omeeraam mọ ạbidi. Uphin ghan ologhi ạmi igey dị tụtu mị ạghi ghan ni rạmha ịnon areelhe ọmiine ạbidi.”

¹²“Mị ụtuan ni ịduon phọ kụ rạki Dạmaskos rꞌịikpo phọ ạbuo ạrumhu ariil ạrikia phọ ụngo bọ ịmi.

¹³Ye phọ, rẹteeny ogbo ootaany, mị ạmiin ẹpe eten phọ ḍịḅaal dị ẹnmananmana epu erumuḍio phọ, dị ẹḍua kꞌạke isoorom ịmi rꞌạbuphe ụdaph bọ ịmi ekoom.

¹⁴Kụ oomo phọ ayoor omeleghu ude, kụ mị ạnaghan ẹḍogh ọnhu aHibru dị ịmagh ghan ịmi mọ, ‘Sọl, Sọl, uḍighi bọ ika kụ nạ rụgbiphoghom bọ ịmi nụun? Ẹkar ri ẹkpar dị nạ kakuph ọoka.’

¹⁵Kụ mị apuru mọ, ‘Nạ ạnhian, Ọmoogh-we?’ Kụ Ọmoogh-we phọ ạḅem mọ, ‘Mị ạJizos phọ nạ rạgbiphoghom bọ.

¹⁶Ḅetenu ạmeera. Ịduon phọ, pọ mị maganana esi ạna ọma ạna ịlo orelhenaan ạmi sidom rꞌọghaaph ịphen nạ ạmiin bọ ịlo ạmi rodon, ḅịle rꞌịdi mị kaḍeenaan nyịna.

¹⁷Mị kạphel li nyịna rạghaagh aweye Ịzirel rꞌaruuruen phọ. Mị rarom nyịna

¹⁸ọḅarion ariḍien ạbidi, ọbo bịdi okiton esi ufiri phọ oḍigh aani ẹphalaḅaal, ọḅile ọḍua esi ịikpo phọ aSetan osoman Ẹnaan, ọbo bịdi umeeraam ịmi kụ ọmoogh ọsar ịkaraph ọwilenaan ophin aani bin erua ogbo ạbuphe mowoph bọ ọḅaalami.’”

¹⁹“Kụ nạ Ọdaam Ạgripa, esi ịduon phọ mị ụ́moogh oḅom ẹmhu ịlo ịpe mị ạmiin bọ uḍien phọ.

²⁰Mị ụphur ri ạrol Dạmaskos rꞌaJeruselem, kụ arelhe yogh oomo ạramha phọ aJudia rꞌịpe aruuruen phọ, ọghaaph ghan mọ bịdi okiton esi ịkaraph phọ ạbidi osoman Ẹnaan, ọḅile oḍighi ghan ịlo emeeraam mọ bịdi mokiton ni.

²¹Kụ esi ịphen phọ kụ ẹdi bụo aJu phọ usiph bọ ịmi pạ Otu Ịiḅereghi phọ ọwaaghi ghan ịlo oghiigh ạmi.

²²Ẹnaan kụ rịloghonaan ịmi ḍịghaagh kụ mị odi bọ ni kꞌarodon ạkaaph ooḅi ọghaaph phọ rạḅeni ghan bụbam rꞌabugbogh. Ịnon ịdi mị rạkaaph ghan ílho, omuton ịpe ariil phọ rꞌaMozis ọghaaph bọ mọ kemite ni phọ.

²³Mọ aMesaya phọ kạmiinom ni kụ ịdipho ọdi kụ kaḍighi bọ ọḅel dị koḅeton esi aḍuugh phọ, kagbeel li ạḅeni weye Ịzirel rꞌaruuruen phọ mọ ạḍiḅaal mẹteeny aani bịdi.”

²⁴Ịdipho ạPol rạgba bọ ọphelaam ẹmhu phọ ọdi kụ ạFestos amoogha mọ, “Pọl, nạ raḍigh ni ẹlaal. Iboom ịtuugha phọ ạna rẹngo nyịna ẹlaal.”

²⁵Kụ ạPol mọ, “Fẹstos oboom oboom, mị ẹlaal ráḍigh. Mị rạkaaph ni ịpe eru bọ ịne.

²⁶Nạ ọdaam ẹmha phọ, alegheri ni ịphen phọ. Pọ kụ ịdi mị ạmoogh bọ ni oḅom ẹmhu ọghaaphom mọ. Mị ameeraam ni mọ ịlo ịphen phọ dị nạ úlegheri ílho, ịdi eḍighi bọ oomo phọ ịphen phọ ímiteghu ẹkul.

²⁷Nạ Ọdaam Ạgripa, nạ ameeraam ni ịpe ariil phọ Ẹnaan ọghaaph bọ ḍụghum? Mị alegheri ni mọ nạ ameeraam ni.”

²⁸Kụ Ạgripa ạḅeni Pọl mọ, “Nạ ragbiom ghan ologhi mọ sịen ekulha amem mọ ạmuen phọ nạ katue ni uḍighi ịmi ọnyo aKristen ḍụghum?”

²⁹Kụ ạPol mọ, “Mꞌekulha mꞌẹedoony amem, mị rạaḅereghi Ẹnaan mọ kíḍighi nyịna bịn ẹḅaram ni rꞌoomo phọ ạbuphe rọnaghan bọ ịphen phọ rodon phọ ạḍien, dị kọtol aani ịduon mị odi bọ, omuton izime phọ ịphen.”

³⁰Kụ ọdaam ẹmha phọ rꞌọdaam eelhe phọ, rꞌaBanisi, rꞌạbuphe rꞌạbidi ọrol bọ oḅerenu.

³¹Bịdi okughaan rọḍuaghu, kụ oniin ạḅeni ghan nyoniin mọ, “Oye phọ ọphon óḍighi ịyaar dị ẹkpianaan oghiigh mꞌọlogh ikoli.”

³²Kụ Ạgripa ạḅeni Fẹstos mọ, “Ọbo museere ni oye phọ ọphon, mọ ọdi kọ̋sighe bọ ḍighiton phọ rạkiom Siza.”