Read abua Iiḍighi 7 Bible Online

Iiḍighi 7 - abua bible

Iiḍighi 7

¹Kụ uwo ẹmhu oyil ạrikia phọ apuru Stivin mọ, “Ịphen phọ ịne ni?”

²Kụ aStivin mọ, “We phọ, bumor rꞌạburude ạmi, ịnaghan! Ẹnaan Eghuan phọ iḍeenaan ni loor ọdi Ebraham, ogbogh ọde phọ ayira, mem dị ọdi odi ẹpe Mesopotamia kụ agbi bọ ogheel ạHaran,

³kụ ạḅeni nyọdi mọ, ‘Ḍụa pạ ade phọ ạna ạwile eghunotu phọ ạna, kụ agheel ẹpe de dị mị kaḍeenaan nyịna!’

⁴Kụ ọdi ạḍua eelhe phọ aKaldia, kụ agheel arugh ẹpe Hạran. Kụ ọde phọ ọdi romugh bọ, kụ Ẹnaan ẹsighe nyọdi esiemi eelhe phọ ẹphen nyina edi bọ.

⁵Kụ Ẹnaan ị́ngo rꞌeniin ẹda eelhe phọ mọ odiom erua. Ebraham mọony kọ̋moogh, kụ Ẹnaan iguanaan ni mọ ọdi ạmoogh eelhe phọ, ẹemara etum ẹemara.

⁶Ịphen kụ ịdi Ẹnaan ẹḅeni nyọdi mọ, ‘Ẹemara ạna kotugh ni ḍiiruen ade kụ ọtol dọl ạrebene, kụ ọmiine bịdi inya okuron ạsia.

⁷Kụ mị kasoph ni ịiruen ạngo bụo eelhe phọ ẹpe bịdi kokumu bọ. Kụ ịphen reten, kụ bịdi ọḍua kụ otu uuseeny ịmi esi phọ ẹphen.’

⁸Kụ Ẹnaan eghiran Ebraham ịyo oḍuna ghan. Kụ Ebraham rọmar bọ Ạizik, rẹman ọphaanya aḍughul-otu, kụ aḍun nyọdi. Kụ Ạizik ạmar Jẹkob, kụ ạJekob ạmaraghi bọ ḍioph rꞌịyal igbogh ạburude ạbuo ạrumhu arughunughun phọ ayira.

⁹“Kụ ạburude phọ ayira ọlogh ḍien Jọsef, kụ aalha nyọdi bumuul ḍighi dị ọpham nyọdi osiom Ijipt. Kụ Ẹnaan ịrolonaan ni nyọdi,

¹⁰kụ ẹphel nyọdi ẹsighe esi oomo ịminimiin phọ ọdi, kụ ẹlhogh nyọdi ịiseeny ẹngoom olegheri ịyaar ghisigh aFero, ọdaam eelhe phọ Ijipt. Kụ aFero aḍighi nyọdi ọtooghiom ạraraar Ijipt rꞌoomo ạraraar phọ ọdi.

¹¹Kụ ịgbakuro esoor oomo phọ Ijipt rꞌaKenan, dị awe ọmiinom ni iboom, kụ ạburude ạburude phọ ayira eḍien ụ́moogh.

¹²Kụ ạJekob ạnaghan bọ mọ eḍien edi Ijipt, arom ni bụrude phọ ayira ọḅel owol mọ ọghi ogho eḍien phọ.

¹³Kụ owol dị atum pạ, ạJosef aḍighi ịdi abumor phọ ọdi olegheri nyọdi, kụ aḍeenaan ọdaam eelhe phọ Ijipt ọto ạbidi.

¹⁴Kụ ạJosef arom ọghi ọmagh Jẹkob, ọde phọ ọdi, rꞌoomo ọto phọ ọdi, kụ ụman oḍualdi rꞌoogh awe.

¹⁵Kụ ạJekob agheel Ijipt, ẹpe ọdi rꞌạburude ạburude phọ ayira omuughu bọ.

¹⁶Kụ urool li bịdi orighelom Sẹkem, kụ oḍi ologhi oḍi phọ Ebraham ạsighe bọ ikpoki aghoom ḍịghaagh ạnmuny aHamor.

¹⁷“Kụ amem mọ rẹteeny, dị Ẹnaan keḍighi oguan phọ ọdi aguanaan bọ Ebraham, bịn awe phọ ayira oḍiza ẹpe Ijipt.

¹⁸Kụ ruukuna phọ ọnon ọdaam eelhe dị Jọsef úlegheri ạḅile amite Ijipt.

¹⁹Ọdi aagbegheḍiom we phọ ạmiine, ạḅile ạkpaariom bụrude ạburude phọ ayira mọ osereghi ghan ịbam ạnmuny phọ ooroogh, ọbo omuughu.

²⁰Mụen kụ amem mọ ọmar bọ Mozis, kụ aḍighi ni ịma ọony ghisigh Ẹnaan kụ ookonom nyọdi kꞌọde phọ ọdi ịraar ụnwanyu.

²¹Kụ mem dị oseere bọ nyọdi ooroogh phọ, ọnyani aFero ạḅom nyọdi kụ ạsighe aḍighi mọony ọdi.

²²Kụ oromoghiom Mozis ịlo oomo olegheri-ịyaar ạbuo Ijipt, kụ ọdi aḍighi ogbogh oye sịphe ikpo ọnhu phọ rꞌiiḍighi phọ ọdi.

²³“Kụ aMozis rọman inyadi ạsia, kụ eḍigh ologhi ọdi ọghi oḅiligha ạdol awe phọ Ịzirel, we phọ ọdi.

²⁴Ạmiin oniin ọnyo ạbidi dị rọmiine kụ ạphel, aghiighom nyọpo Ijipt phọ.

²⁵Ọdi agbiom mọ awe phọ ọno molegheri ni mọ ọno kụ ọpelia dị Ẹnaan retuom bịdi, pọ bịdi úlegheri.

²⁶Kụ ḍio phọ ạḍiphe etum bọ pạ, ọdi ạḅile ạghi kụ ạmiin dị ịyal ạbuo Ịzirel robeeghi, kụ ạwa ọphomoghi ạbidi, kụ ạḅeni mọ, ‘We phọ, nyina abumor. Uḍighi ika kụ oniin rạki bọ esi oniin?’

²⁷Kụ oye phọ ọpo ạpioman bọ nyọori phọ ạḅitonaan Mozis kụ apuru mọ, ‘Ạnhian kụ aḍighi bọ nyịna uwo ẹmhu rꞌoogboom ịiruen ogbo phọ ayoor?

²⁸Nạ rạwa ghan oghiigh aani ạmi ịdipho nạ aghiigh bọ nyọpo Ijipt phọ iḍue phọ?’

²⁹AMozis rọnaghan ịphen phọ, bịn asuma agheel Mịdian, kụ ạrol ẹpe ạmar ịyal ạnmuny.

³⁰“Kụ inyadi ạsia reten, kụ ọokpaany Ẹnaan amitenaan egaan Mozis esi anem ạnian ọnuza loor ekpu eḍum, ẹpe ẹdala ẹeḅaraph aSainai.

³¹Mem dị aMozis ạmiin bọ, ịngo ni nyọdi iikia, kụ ọdi aḍuraan ạabeeph ophogh, kụ ẹḍogh Ọmoogh-we phọ ẹḅem mọ,

³²‘Mị kụ Ẹnaan phọ Ebraham rꞌẠizik rꞌạJekob, ạburude ạburude phọ anyina.’ Kụ aMozis aphiigha kụ ómighirom mun ophogh.

³³Kụ Ọmoogh-we phọ ạḅeni nyọdi mọ, ‘Kpọronaan rokoro phọ ạna, ịdi eḍighi bọ esi phọ nạ ạmeera bọ ade iigbia ni.

³⁴Mị mạmiin ni ịpe rọmiine bọ we phọ ạmi ẹpe Ijipt, ạnaghan ịkuph phọ ạbidi, kụ mị masoor ọphel ạbidi ọsighe. Tue! Mị karom nyịna ọghi Ijipt.’

³⁵“Ọphon kụ aMozis phọ awe phọ Ịzirel oghel bọ kụ opuru bọ mọ, ‘Ạnhian kụ aḍighi bọ nyịna uwo ẹmhu rꞌoogboom ịiruen phọ?’ Ọdi kụ ẹdi Ẹnaan eḍighi uwo ẹmhu rꞌọpelia, mem mọ ọokpaany phọ ọdi amitenaan bọ ẹpe ekpu eḍum ọnuza phọ.

³⁶Ọdi kụ aḍiemiom bọ bịdi amitiom, aḍighi yogh ịiḍaany rꞌareḍeenaan ẹpe Ijipt rꞌịpa Ọphiiny Igbilha phọ rꞌẹpe ẹdala phọ esi inyadi ạsia.

³⁷Ọphon kụ aMozis phọ ọpo ạḅeni bọ weye phọ Ịzirel mọ, ‘Ẹnaan kiruom ni inyina oyil, ịdipho ọdi urom bọ ịmi, dị kaḍighi ni oniin ọnyo anyina.’

³⁸Ọphon kụ ạrolan bọ rꞌookpomoghan ạburude ạburude phọ ayira ẹpe ẹdala phọ, kụ ạghaaphan bọ rꞌọokpaany phọ Ẹnaan ẹpe Eegum aSainai, kụ ạnaghanan bọ ọghaaph phọ rámineen ghan bọ ụngo iyira.

³⁹“Kụ ạburude ạburude phọ ayira úmeera ụnaghanan, kụ ọḅitonaan nyọdi, kụ ọkpasaghi iloghi ạbidi oḅula Ijipt.

⁴⁰Kụ ọḅeni Eeron mọ, ‘Ụkaaghinaan iyoor rụmugh lọ kiḍiemiom iyira! Yoor úlegheri ịlo memitenaan Mozis phọ ọphon uḍiemiom bọ iyira amitiom pạ ade phọ Ijipt.’

⁴¹Pọ kụ amem dị bịdi ọka onyugheel aḍilephiri ạnam ọoḅereghi, kụ oḍighi ịyaar aghuḍum ọngo ịyaar phọ bịdi ọka bọ kụ ole ẹyaal oophughemiom.

⁴²Kụ Ẹnaan eghel bịdi ẹḅogh ẹngo ooseeny ghan oomo ạraraar phọ edi bọ kꞌạke, ịdipho ọge bọ pạ ạḍinya ariil phọ Ẹnaan mọ, “‘Weye Ịzirel, tọ nyina ịze ghan ịnam ẹpe ẹdala phọ esi inyadi ạsia kụ egbiom ghan mọ nyina rẹpighironom ghan rịkia kịngo ịmi?

⁴³Eeye, nyina ịgban ghan eḅine phọ ạMolek rꞌẹkaaneen ẹenaan phọ ạRefan, rụmugh phọ nyina ẹkaaghi bọ ọoḅereghi phọ. Mị kiphorogh ni inyina atenom Bạbilon.’

⁴⁴“Ạburude ạburude phọ ayira ụmoogh ni Ogbogo Ạdol Ẹnaan phọ ẹpe ẹdala phọ. Ụtuugh ni ọlogh ọghighemi nyọpo Ẹnaan eḍeenaan bọ Mozis.

⁴⁵Ogbogo phọ ọpo ạrol li ạteeny ọnon oghiil ạburude ạburude phọ ayira. Bịdi ụpham ni, mem mọ Ẹnaan ephorogh bọ ruuruen phọ ẹngo Josua rꞌạbidi de phọ. Ịrol li ịdipho ẹteeny ọrugh aDevid.

⁴⁶Ọdi ạmoogh ni ḍịseph kꞌẸnaan phọ ạJekob, kụ ạlhom mọ emeera mọ ọno ạloghonaan nyọdi otu.

⁴⁷Kụ ạSolomon ghụn kụ ạloghonaan Ẹnaan otu phọ.

⁴⁸“Kụ ạri Ẹnaan ẹpe kꞌạke phọ rétugh ghan ruutu dị ọsighe rạghaagh kụ ọloghom, ịdipho oyil Ọmoogh-we phọ ạḅem bọ mọ,

⁴⁹“‘Ạke phọ kụ ạgada ọdaam ẹmha phọ ạmi, ade phọ kụ ịkasi ọkpasaghiom aruwol phọ ạmi. Eeghe ọdo otu kụ ọdi nyina kịlhoghonaan bọ ịmina, kụ iḍighen kụ keḍighi esi ophooghian phọ ạmina?

⁵⁰Mịna kụ ụ́lem bọ oomo ạraraar phọ ịphen phọ?’

⁵¹“Nyina aweye oḅom ẹmhu rꞌịikpara iloghi dị ḍụghum rẹ́naghan ghan. Nyina rebeeghi ghan rꞌUwaloor Iigbia phọ oomo amem, ịdipho ạburude ạburude phọ anyina.

⁵²Ọghen oyil kụ ọdi ạburude ạburude phọ anyina ụ́gbiphoghom? Bịdi ụze ni bụphe ọphur bọ ọghaaph mọ Oye Aruukuan phọ katu ni, ọpo nyina ẹḅogh bọ ẹngo kụ oghiigh bọ.

⁵³Nyina kụ ẹdi ạruukpaany phọ Ẹnaan eruomonaan bọ ni iilogh phọ. Nyina kụ ạar bọ ni, kụ íiko bọ.”

⁵⁴Ịdipho ookpomoghan ikpolom awe phọ ọnaghan bọ ọghaaph phọ ọphon, kụ ẹghagh iloghi ạbidi, kụ bịdi ọghirighaam nyọdi rạlhaal.

⁵⁵Kụ aStivin, dị Uwaloor Iigbia phọ amuza loor, aphogh ạnyu ạke kụ ạmiin igbogh phọ Ẹnaan, rꞌạJizos dị ạmeera ḍịghaagh elhiom mọ Ẹnaan.

⁵⁶Kụ ọdi ạḅem mọ, “Ipogh! Mị rạmiin dị ạnyu ạke aghughuronu, kụ Ọony phọ Oye ạmeera ḍịghaagh elhiom mọ Ẹnaan.”

⁵⁷Kụ bịdi ọlooghi iboom opua yogh reḅeri kụ oghughaan ozuom nyọdi,

⁵⁸orool ọḍuanam pạ ẹmha phọ kụ oroḅol nyọdi ikpo. Kụ bụphe ọmiin aani bọ ọkporonaan rụsuoma ạbidi osereghiom ruwol onyugheel ọony dị oghol mọ ạSol, mọ ạphamanaan bụno.

⁵⁹Rotoḅol ikpo phọ, kụ aStivin ạaḅereghi ghan mọ, “Jịzos Ọmoogh-we, mị ạḅogh uwaloor phọ ạmi ạlogh ḍịghaagh ạna.”

⁶⁰Kụ ọdi akpuḍian kụ ạlooghi rꞌeboom ẹḍogh mọ, “Ọmoogh-we, ụ́sighe ghan ịkaraph phọ ịphen ụḅam rụmhu ạbidi!” Kụ ọdi rọḅem ịduon phọ, bịn amugh.