Read abua Iiḍighi 8 Bible Online

Iiḍighi 8 - abua bible

Iiḍighi 8

¹Aḍuugh phọ ịnighe ni ologhi ạSol. Kụ emiigh kꞌaḍio phọ ạḍiphe oboom ọgbiphoghom ạrolonaan ni bụphe omeeraam bọ Jịzos ẹpe Jeruselem, kụ oomo phọ ạbidi, omuton butelhedom mọ, ọwalala yogh ẹpe areelhe phọ aJudia rꞌaSameria.

²Kụ buniin awe aruukuan ọsighe Stivin ọghi oḍi kụ omoghi nyọdi iboom.

³Kụ ạSol ạnya ophiemi ạbuphe omeeraam bọ Jịzos, kụ ạḍua ghan otu ạgba otu, ạghoghogh nmạriir rꞌalephiri ạsighe ạghi ạloghoḍi ikoli.

⁴Kụ bụphe ọwalala yogh bọ orelhe yogh ghan ọghaaph ọghaaph phọ Ẹnaan.

⁵Kụ aFilip ạghi ẹmha aSameria kụ ạghaaph ghan ịlo aMesaya phọ.

⁶Kụ aḍita awe phọ ọḅophoghan ọnaghanan ịpe aFilip ạghaaph bọ, ọḅile ghan ọmiin reḍeenaan phọ dị aḍighi bọ.

⁷Ịkaraph aruwaloor ịlooghi ghan ni emiteghu loor ịbadi awe ẹḍuaghu, kụ ịbadi ạrukugha rꞌạbudi ạraghaagh rꞌaruwol emuughu uḍumogh ni.

⁸Kụ iboom iboh ẹrolonaan bụo ẹmha phọ.

⁹Kụ oniin ọḅaghama, dị oghol mọ aSaimon, ạrol li pạ ẹmha phọ. Ọdi ạpheremiom ghan ni we aSameria ire phọ ọdi, ạḅem ghan mọ ọno oboom oye ni.

¹⁰Kụ oomo awe ụnaghanan ghan ni nyọdi, emiigh kꞌọbam ẹteeny kꞌogbogh, kụ ọḅem ghan mọ, “Oye phọ ọphon ịikpo phọ Ẹnaan oghol bọ mọ ‘igbogh ịikpo phọ’.”

¹¹Bịdi ụnaghanan ghan nyọdi, ịdi eḍighi bọ kꞌẹminighan amem ọdi mạpheremiom bịdi ire phọ ọdi.

¹²Kụ ạnmariir rꞌalephiri umeeraam ni ooḅi ọghaaph phọ ọpo aFilip ạghaaph bọ ịlo ọmar phọ kꞌẸnaan rꞌaḍien phọ ạJizos Kraist, kụ owurogh bịdi mụum.

¹³Kụ ọdi aSaimon rꞌaloor ọdi ameeraam aani ni, kụ rowur nyọdi mụum, kụ ạtuan ghan Filip. Kụ ọdi ạmiin bọ ịiḍaany rꞌareḍeenaan phọ roḍighi yogh bọ, ịpher ri nyọdi.

¹⁴Kụ mem dị abutelhedom mọ ọrol bọ Jeruselem ọnaghan bọ mọ ạbuo aSameria momeeraam ọghaaph phọ Ẹnaan, kụ ọlogh Pita rꞌạJon mọ ọghi.

¹⁵Kụ rosi, kụ ọoḅereghi Ẹnaan mọ bụphe momeeraam bọ ọmoogh aani Uwaloor Iigbia phọ.

¹⁶Mem mọ ọpo phọ Uwaloor Iigbia phọ kősoorom rꞌoniin ọnyo ạbidi, uwurogh bịdi mụum bịn esi aḍien phọ ạJizos Ọmoogh-we phọ.

¹⁷Kụ aPita rꞌạJon rọḅam rạghaagh rụmhu ạbidi, kụ Uwaloor Iigbia phọ asoorom aani bịdi.

¹⁸Kụ aSaimon rọmiin mọ abutelhedom mọ rọḅam ghan rạghaagh rụmhu kụ kọngo Uwaloor Iigbia phọ, kụ ạmerenyan ikpoki.

¹⁹Kụ ạḅem mọ, “Ịngo aani ịmi ịikpo phọ ịphen phọ, ọbo ọlo mị ạḅam aani rạghaagh ạmi ẹmhu ạmoogh aani Uwaloor Iigbia phọ!”

²⁰Kụ aPita ạḅeni nyọdi mọ, “Ikpoki ạna ephiom ni nyịna, sịen dị nạ ragbiom ghan mọ nạ katue ni ạsighe ikpoki akoom inmo phọ Ẹnaan!

²¹Nạ rꞌayoor ụ́ḅoph oghuugh, ịdi eḍighi bọ ologhi ạna ọ́nighe esi Ẹnaan.

²²Kiton ạwile ịkaraph ịitughian ikpoki phọ ịphen, kụ ạaḅereghi Ọmoogh-we phọ, mọ ẹghigh, pọ ọdi ạsar ạwilenaan nyịna.

²³Mị ạmiin mọ ologhi ẹḍim kụ amuza loor ạna, kụ ịkaraph ẹphaḍi ni nyịna.”

²⁴Kụ aSaimon ạḅeni Pita rꞌạJon mọ, “Ikol ẹmhu ạmi ẹeḅereghi Ọmoogh-we phọ, ọbo ịphen nyina ẹghaaph bọ kimitenaan ghan bọ ịmi!”

²⁵Kụ mem dị aPita rꞌạJon mọghaaph ọghaaph Ọmoogh-we phọ ọgbaanyami, kụ oḅula Jeruselem. Rotigheel bọ, ụghaaph ni ooḅi ọghaaph phọ oleenye ịbadi ạramha eelhe phọ aSameria.

²⁶Kụ ọokpaany Ọmoogh-we phọ aru ạḅeni Filip mọ, “Ḅetenu ạghi eten ẹdala phọ ẹpe ẹḍua bọ Jeruselem rẹki Gaza!”

²⁷Kụ ọdi aḅetenu rạki bịn azuan oophoony oye ọlo Ẹtiopia. Ọdi okpolom oye ni, dị ạpaghaghaam ẹelha aKandasi, ukueni-ạnir phọ Ẹtiopia. Ọdi ạghi Jeruselem oghueni Ẹnaan

²⁸raḅula, kụ odi sịphe ookilemineen ạgada phọ ọdi rạbal ghan ḍịnya oyil phọ Azaya.

²⁹Kụ Uwaloor Iigbia phọ ạḅeni Filip mọ, “Ḍuraan aḅulolom ẹpe ạgada phọ!”

³⁰Kụ aFilip aghiil ạghi ạteeny, kụ ạnaghan dị oye phọ rạbal ghan ḍịnya oyil phọ Azaya, kụ apuru mọ, “Nạ ạnaghan ni ẹmhu ịpe nạ rạbal bọ?”

³¹Kụ ọdi mọ, “Mịna kạnaghan bọ ika, emuton dị ọnon oye ạgba ẹmhu phọ ụḅeni ịmi?” Kụ ọdi ạmagh Filip mọ aru ạsiiny ạrolan nyịno.

³²Kụ ọdi ạal ghan sịphe ạḍinya iigbia phọ, ịduon mọ, “Ọdi ạghigh oyool-ọga dị ororori rọki ọmeegh. Anamaghan ịdipho ọony oyool-ọga mem mọ rọsam bọ suphuugh phọ. Ọdi ịyaar ọ́ghaaph.

³³Ụgilaam ni nyọdi, akeel nyọdi ụ́waanaan. Oye kátue ạkaaph ịlo ẹemara phọ ọdi, ịdi eḍighi bọ mophiemi ghuḍum ọdi sịen aḅirini phọ.”

³⁴Kụ oye phọ ạphagharanaan Filip mọ, “Ụḅeni ịmi! Ịlo ạnhian kụ ịdi oyil phọ rạkaaph bọ? Ịlo aloor ọdi ḍụghum, kụ ọnon oye ni?”

³⁵Kụ aFilip amiighom ẹkpigh phọ ẹphen phọ, kụ ạghaaphom ooḅi ọghaaph ịlo ạJizos ạḅeni nyọdi.

³⁶Kụ bịdi oru osi okol ạmuum, kụ oye phọ ạḅem mọ, “Mịin aani mụum sịen! Eeghe kụ kemirighan bọ nyịna owur aani ạmi?” [

³⁷Kụ aFilip ạḅeni nyọdi mọ, “Nạ ameeraam rꞌoomo ologhi ạna, pọ mị kawur ri nyịna.” Kụ ọdi mọ, “Mị ameeraam ni mọ ạJizos Kraist kụ Ọony phọ Ẹnaan.”]

³⁸Kụ ọdi ạmeremi ạgada phọ, kụ ịyal phọ ạbidi, aFilip rꞌoophoony oye phọ, osoroghu pạ ạmuum mọ, kụ aFilip awur nyọdi.

³⁹Kụ bịdi rophun, bịn Uwaloor Ọmoogh-we phọ ạgbatan Filip ạsighe, bịn oye phọ nyọdi ọ́miin mun, kụ rꞌibo kụ anyeene agheel.

⁴⁰Kụ ụḅile ọmiin Filip ẹpe Azotos, kụ ọdi ạḍua ẹmha ạgba ẹmha ạghaaph ghan ooḅi ọghaaph phọ kụ agbi osi aSizaria.