Read abua Iiḍighi 9 Bible Online

Iiḍighi 9 - abua bible

Iiḍighi 9

¹Mem mọ ạmuen phọ, ạSol ósoph ghan mem ọpaarogh rꞌọwa ghan ịlo ọze ạbumatuan Ọmoogh-we phọ, kụ ạghi esi uwo ẹmhu oyil ạrikia phọ,

²ạlom rịnya ọghimom arubughotu phọ ạDamaskos, mọ ọno ạmiin nmạriir rꞌalephiri lọ rọdaph Emoom Eten Ọmoogh-we phọ, pọ ọno ạphaḍi yogh bịdi arighelom Jeruselem.

³Ọdi aten rạki kụ ạtol rapogh Dạmaskos, ekperenom kụ aḍiboom ạḍiḅaal ẹḍua kꞌạke esoorom nyọdi.

⁴Kụ ọdi ameel ude, kụ ạnaghan ẹḍogh dị ẹmagh nyọdi mọ, “Sọl, Sọl! Uḍighi ika kụ nạ rụgbiphoghom bọ ịmi?”

⁵Kụ ọdi apuru mọ, “Ọmoogh-we, nạ ạnhian?” Kụ ẹḍogh phọ ẹḅem mọ, “Mị ạJizos phọ ọpo nạ rạgbiphoghom bọ.

⁶Ḅetenu amite ẹpe ẹmha phọ, kọḅeni ni nyịna ịdi nạ kaḍighi!”

⁷Kụ awe phọ ạbuphe rꞌọdi rọki bọ ọmeregha bịn nam, kụ ạri ụnaghan ni ẹḍogh phọ, kụ oye ụ́miin.

⁸Kụ ạSol aḅetenu bọ ạḅarion riḍien ọdi, ọ́miin mun eten; kụ ọpham ḍịghaagh ọdi osiom Dạmaskos.

⁹Kụ esi ịraar aḍughul-otu ọdi eten ọ́miin, eḍien ólhe, mụum ọ́phughol.

¹⁰Kụ oniin ạmatuan dị oghol mọ Ạnanayas, ạrol li Dạmaskos. Kụ Ọmoogh-we phọ ạmagh nyọdi esi uḍien mọ, “Ạnanayas!” Kụ ọdi ameera mọ, “Ọmoogh-we, mị odi ni sịen.”

¹¹Kụ Ọmoogh-we phọ ạḅeni mọ ọdi aḅetenu ạghi kꞌaJudas, ẹpe oḅodo phọ oghol bọ mọ oseleeny phọ, kụ apuru oye ọlo ạTasos dị oghol mọ ạSol. Mọ ọdi rạaḅereghi ni,

¹²kụ mạmiin uḍien oye dị oghol mọ Ạnanayas dị aru ạḅam rạghaagh ẹmhu ọdi, ịlo dị kạmiin eten.

¹³Kụ Ạnanayas mọ, “Ọmoogh-we, ịbadi awe mụḅeni ni ịmi ịlo ịkaraph dị oye phọ ọphon aḍighi yogh we phọ ạna ẹmha aJeruselem.

¹⁴Kụ ọdi ạar ri ịikpo rụmhu ariil ạrikia phọ kụ aru ẹphen ịlo ọphaḍi yogh ạbulo rokol ghan ḍien phọ ạna.”

¹⁵Kụ Ọmoogh-we phọ ạḅeni nyọdi mọ, “Kịa ni! Mị mạsaḅar nyọdi omitiom aḍien phọ ạmi oḍeenaan aruuruen rꞌạbuo ạrumhu phọ ạbidi, rꞌaweye phọ Ịzirel.

¹⁶Mị kaḍeenaan ni nyọdi oomo phọ ịpe ọdi kạtuan bọ ḍien phọ ạmi ạmiinom.”

¹⁷Kụ Ạnanayas ạḍua ạghi aḍigh otu phọ, kụ rọḅam rạghaagh ẹmhu ọdi, kụ ạḅem mọ, “Sọl, umor ạmi! ẠJizos Ọmoogh-we phọ, ọpo amitenaan bọ nyịna egaan ẹpe eten phọ, mem mọ nạ ratu bọ ẹphen, kụ urom ịmi mọ mị utu ọbo nạ ạḅile ạmiin eten, ḅịle kẹn Uwaloor Iigbia phọ amuza loor ạna.”

¹⁸Kụ egina amem bịn ạraraar dị ẹghigh ipholopol ina ẹḍua riḍien phọ ọdi emeleghu, kụ ạḅile ạmiin eten, kụ aḅetenu kụ owur nyọdi mụum.

¹⁹Kụ role eḍien, bịn ạḅile ạmoogh ịnyaam. Kụ ạSol ạrolan bụmatuan phọ ạDamaskos ịminighan aḍughul-otu,

²⁰kụ anyeene ạghiighi rubughotu phọ amiigh ọghaaph mọ ạJizos kụ Ọony phọ Ẹnaan.

²¹Kụ eḍigh iikia esi oomo phọ ạbuphe ọnaghan bọ, kụ opuru ghan mọ, “Ọphon kọ́di ạwa ghan bọ ophiemi ạbuphe oghol ghan bọ ḍien phọ ạJizos ẹpe Jeruselem? Kụ ọdi ọ́tuan ọphaḍi yogh ạbidi ọghiom ạbuo ạrumhu ariil ạrikia phọ kụ aru bọ ẹphen?”

²²Kụ ạSol ạghaaph ni ạkpaariom mọ ọphon kụ aMesaya phọ, kụ ịnyaam ọghaaph phọ ọdi ephoph, dị ạbuo aJu ạDamaskos ịyaar útue ụkaaph.

²³Kụ ịminighan aḍughul-otu reten, kụ ạbuo aJu phọ omite ezue ịlo oghiigh ạSol,

²⁴kụ ezue phọ eḍigh rụru ọdi. Kụ bịdi okori ghan eḍighom ẹmha phọ ḍughul rꞌootaany, ọbo ọteeny nyọdi oghiigh.

²⁵Ḍiniin aḍughul kụ ạbumatuan phọ ọdi ọsighe nyọdi ọlogh egunum kụ oḅughe epogh iikpe ẹmha phọ ọkpaaghi oseere.

²⁶Kụ ạSol asi bọ Jeruselem ạwa ni ịlo ọḅophoghan rꞌạbumatuan phọ, kụ oomo phọ ạbidi oghiilaan nyọdi, úmeeraam mọ ọdi maḍighan bụno.

²⁷Kụ ạBanabas ạlogh ḍịghaagh ạsighe nyọdi ạghiomonaan butelhedom mọ, kụ ạghaaph ạḅeni bịdi, mọ ạSol mạmiin Ọmoogh-we phọ ẹpe eten, bịdi ọkaaphan, ḅịle mọ ẹpe Dạmaskos ọdi ạghaaph ni ịlo aḍien phọ ạJizos rꞌạkpo ologhi.

²⁸Kụ ọdi ạrolan rꞌạbidi, ẹghi rꞌerigheel, ẹpe Jeruselem.

²⁹Ạghaaphom ghan rꞌạkpo ologhi ịlo aḍien Ọmoogh-we phọ, ạḅile ghan ạpharanaan ịparanaan rꞌạbuo aJu phọ rọḅa ghan bọ ọnhu phọ aGris, kụ bịdi oosophoghian ghan ịlo oghiigh ọdi.

³⁰Kụ ạbumatuan phọ rọnaghan kụ ororori nyọdi osiemi Sizaria, kụ ọdi ạḍua pạ agheel Tạsos.

³¹Mụen kụ amem dị oomo ạbuo ạsiosi phọ ẹpe Judia rꞌaGalili rꞌaSameria ọmoogh ẹepho kụ omiigh ọmoogh ạsini rꞌaḍiphoph; kụ Uwaloor Iigbia phọ ạloghonaan ni ḍịghaagh ọlogh eegu Ọmoogh-we phọ.

³²Kụ aPita arelhe yogh oomo arikpisi phọ kụ asiom ọmiin awe ạsiosi phọ orugh bọ ẹpe Lịda.

³³Ẹpe phọ ọdi ạmiin ni oniin oye dị oghol mọ Inias, dị ạḍighaagh rꞌaḍuwol emugh kụ mạrol ẹmina ọphaanya ạsia.

³⁴Kụ aPita ạḅeni nyọdi mọ, “Inias! ẠJizos Kraist maakonom nyịna. Ḅetenu akpooghi ẹmina phọ ạna!” Egina amem bịn ọdi aḅetenu,

³⁵kụ oomo phọ ạbuphe orugh bọ Lịda rꞌaSaron ụmiin ni nyọdi, kụ okiton omeeraam Ọmoogh-we phọ.

³⁶Kụ ẹpe Jọpa oniin ạmatuan ạrol li dị oghol mọ ạTabita (dị rokol ghan ọnhu aGris mọ ạDokas, ẹmhu ịduon phọ pọ ọnyaghimir). Ọdi ạmoogh eeḅi eḍighinom ịyaar, anmo ghan inmo.

³⁷Ạnir phọ ọphon ameel ẹzegh riiḍio phọ ịpe kụ amugh. Kụ owur nyọdi mụum ọmuneen osoph-ạnyu otu ẹedaneen.

³⁸Kụ ạbumatuan phọ ọnaghan mọ aPita odi ẹpe Lịda, ẹmha dị etuman, kụ orom ịyal awe dị ọghi ọmagh nyọdi, kụ ọkpaariom mọ, “Káabinya! Nụun aru ụteeny iyoor!”

³⁹Kụ aPita aakolobian ạdaph bịdi ạghi. Rosi kụ ọsighe nyọdi ọsiinyom ẹpe osoph-ạnyu phọ. Kụ oomo arukpukele ạnmariir phọ ọmeregha okoom nyọdi romoghi yogh, kụ oḍereghinaan nyọdi iinmenan rꞌạrusuoma phọ ạDokas ạkol ghan bọ, mem mọ kőmugh bọ.

⁴⁰Kụ aPita amiteghom oomo phọ ạbidi erugh, kụ akpuḍian ạaḅereghi, kụ akiton asoman oḍim mọ ọmuneen bọ kụ ạmagh mọ, “Tạbita, ḅetenu!” Kụ ạnir phọ ạḅarion riḍien ọdi, kụ rọmiin Pita, kụ ạrol ude.

⁴¹Kụ aPita asele ḍịghaagh ọdi ạpham ạnir phọ ạmeremi, kụ aagbologh bụo ạsiosi phọ rꞌarukpukele ạnmariir phọ, kụ ạḅogh nyọdi ạngo bịdi imoom.

⁴²Kụ eeleghaan oomo ạJopa, kụ ịbadi omeeraam Ọmoogh-we phọ.

⁴³Kụ ịphen phọ eten bọ, aPita ạrol li ịminighan aḍughul-otu ẹpe Jọpa kꞌaSaimon phọ ọpo ọkponyon ghan bọ ruzu ịnam mọ.