Read abua Bụo aRom 13 Bible Online

Bụo aRom 13 - abua bible

Bụo aRom 13

¹Ẹkpe ni dị tọrobo oye kạnaghanan ghan bụphe rọtooghi bọ ịtooghi phọ, ịdi eḍighi bọ ịikpo dị kẹmeera ílho, emuton ịpe Ẹnaan kụ ẹto bọ, kụ ịikpo phọ ịpe ẹmeera bọ Ẹnaan kụ iseere ni.

²Oye lọ ạgbagharan bụphe rọtooghi bọ ịtooghi phọ, pọ mạgbagharan ịpe Ẹnaan ẹto bọ. Kụ oye lọ aḍighi ịduon phọ kasopha ni ọoruen apum ạḅama ẹmhu ọdi.

³Bụphe roḍighi ghan bọ igey phọ rókiilaan ghan bụo ịtooghi phọ. Abuḍighinom ịkaraph phọ kụ rokiilaan ghan bọ bịdi. Mọ nạ rạ́wa oghiilaan ghan ạbuphe rọtooghi bọ, pọ ḍighi ghan igey. Bịdi kọseph ni nyịna, ịdi eḍighi bọ bịdi abutelhedom Ẹnaan dị roḍighi ni ịlo ạsuo ạna.

⁴Mọ nạ raḍighi ghan ịkaraph, pọ kiilaan ni bịdi, ịdi eḍighi bọ bịdi rópeghom ghan ephegh ghẹlhe phọ ạbidi. Bịdi abutelhedom Ẹnaan, kụ ọpam ni ghẹlhe phọ Ẹnaan ogonom awe lọ roḍighi ghan ịkaraph.

⁵Kụ loor ẹmhu ịduon phọ, nạghanan ni bụo ịtooghi phọ. Ụ́ḅem mọ ịlo ọtuan okpetenaan ạghelhe phọ Ẹnaan bịn. Edi kẹn ni ịpe ịitughian phọ ạna elegheri bọ mọ ẹkpe ni oḍighi ghan phọ.

⁶Ịduon phọ kẹn kụ ẹdi ẹkpe bọ ni dị nyina kesogh ghan iisogh ạgomet phọ, loor esi dị bụo ịtooghi phọ roḍighinaan ghan Ẹnaan mem dị bịdi roḍighi kꞌịkpara kꞌikpuru oḍighi phọ ạbidi.

⁷Esi ịduon phọ, ịtuugh ịpe bịdi migbi bọ inyina esogh ẹngo. Ikol ịlo ẹmhu phọ anyina rꞌịlo aḍighi lọ nyina remuul ghan esogh ẹngo, ẹḅile kẹn ẹlogh eegu rꞌeghuan oomo phọ ạbidi.

⁸Kéle ghan ọmugh oye. Ọmugh dị nyina kele aḍighi ẹphomoghian dị oniin kạpomoghian ghan nyoniin! Oye lọ ạphomoghian bụnon awe, pọ maako ni Ologh phọ Ẹnaan.

⁹Iilogh phọ “Ẹmha kále, enu kạ́ko, imi kámi, kạ́seph ịyaar ọnon oye ạsighenom,” — oomo phọ ịphen phọ rꞌịnon ọdo ịlo esugha ookpomoghi ni sịen ologh phọ ọphon mọ, “Pọmoghian ọnon oye ịdipho aloor phọ ạna.”

¹⁰Oye lọ ạphomoghian ọnon oye kámighirom mun aḍighi oye phọ ọpo phọ ịkaraph. Esi ịduon phọ ẹphomoghian kụ ooko oomo phọ Ologh phọ ọmadan.

¹¹Iḍighi ghan ịphen phọ. Nyina elegheri ni esi dị mesi. Amem mọ mẹteeny dị nyina kẹsuma rạlha phọ anyina. Amem mọ kụphel bọ iyira otene mẹkpulan nyịidipho epu ẹḅel amem mọ yira omeeraam bọ.

¹²Mọony amem aḍughul phọ meten remuneen, kụ ạḍiroor phọ rẹḅaal. Ọkporonaan ạsuoma oḍighinom ạraraar amuphe ufiri phọ! Ọnya ịinya lọ kobiom sịphe ạḍiḅaal phọ!

¹³Kúbulamaam loor ayira ọrolom ẹeghara lọ ẹgbaanyan bụphe ạḍiḅaal phọ, iipheeny kúpheeny ghan, kúḍighi bụpughol miim, ẹmha kúle, ipesi kúpesi, elephiri kúbe, ologhi ẹḍim kụ́moogh!

¹⁴Ịsighe rọozo phọ ạJizos Kraist Ọmoogh-we phọ, ẹkpologhian ịdipho ạsuoma. Kẹ́ngo eepoogh ịkaraph ạruuphua phọ anyina, ọbo bịdi keḍighi ghan bọ ịlo ẹḅeeraan bịdi.