Read abua Bụo aRom 9 Bible Online

Bụo aRom 9 - abua bible

Bụo aRom 9

¹Ịphen mị rạkaaph bọ agey ni. Mị ọkpe rạ́gba. Mị ọnyo kꞌaKraist. Ịitughian phọ ạmi ḅịle rꞌUwaloor Iigbia phọ ratomoghiom bọ, olegheri aani ni mọ mị ọkpe rạ́gba.

²Pọ eeghe oboom ọto dị mị ameelom, rꞌamukum ologhi dị eekuna ílho, loor ẹmhu awe phọ ạmi, bụen ọkaraghi eelhe phọ ayoor.

³Kpạripe ghụn mịnighe dị Ẹnaan mikol ọloghonaan ạbidi ḍịghaagh ironyon ịmi mị ạgbatanaan Kraist.

⁴Bịdi kụ awe phọ Ẹnaan ẹsaḅar bọ. Ọdi aḍighi bịdi nmụny ọdi. Bịdi uphin aani ni bin eegu phọ ọdi. Ọdi rꞌạbidi ughiran ni ịyo. Ọdi ạngo ni bịdi Ologh phọ, aḍeenaan ịdi kooseeny ghan nyọdi. Bịdi mọmoogh ni rạraar phọ Ẹnaan eguanaan bọ.

⁵Bịdi ạbuo ẹemara abugbogh ạburude phọ ayira, kụ aKraist sịen eye phọ ọlo eelhe phọ ạbidi. Ạḍiseph ẹrolonaan Ẹnaan phọ ẹda bọ oomo ạraraar phọ kꞌagee-pọ! Ẹrol li ịdipho!

⁶Mị rạ́ḅem ghan mọ Ẹnaan mebi oguan phọ ọdi aguanaan bọ, ịdi eḍighi bọ oomo aweye phọ Ịzirel kụ kạ́budi ọdi ạsaḅar bọ ạsighe.

⁷Ḅịle kẹn, oomo kꞌẹemara phọ Ebraham kụ kạ́nmuny phọ Ẹnaan. Ẹnaan ịḅeni Ebraham mọ, “Nạ kạtuan Ạizik kụ ạmar ẹemara etum ẹemara.”

⁸Ịphen phọ emeeraam mọ ạnmuny phọ ạbuphe ọmar bọ oopho ẹmaram mọ kụ kạ́nmuny phọ Ẹnaan; bụphe ghụn ọmar bọ omuneniom oguan phọ Ẹnaan kụ ọkaraghi ạbuo ẹemara phọ Ebraham.

⁹Ịphen kụ ikpo ọnhu oguan phọ mọ, “Ọdo phọ amem mọ ạmuen nana phọ ạḍiphe retu bọ, mị ạḅile aḅula, aSera mạmar mọony.”

¹⁰Kị́phen bịn. Ịyal phọ ạnmuny phọ ạRibeka ụḅoph ni ọde — Ạizik ogbogh ọde phọ ayoor.

¹¹Ghạlamo ịdipho ke̋siom bọ ni dị ạnir phọ kạmar ịyal phọ, ḅịle ạnmuny phọ igey rꞌịkaraph kőlhegheri bọ ni, bịn Ẹnaan ịḅeni ni Rịbeka mọ, “Ọkpana phọ kụ kakumu ghan ạngo esoony phọ.” Ẹnaan ịghaaph ịphen phọ mọ olegheriom mọ ọno bịn kụ rapogh ghan ni oye kạsaḅar. Loor ịphen phọ, Ẹnaan bịn kụ ịmagh bọ ni ẹsaḅar, ị́tuan eḍighinom ịyaar phọ ạbidi.

¹³Ịdipho ọge bọ pạ ạḍinya iigbia phọ mọ, “Mị ụphomoghian Jẹkob kụ ạlogh ḍien Ịso.”

¹⁴Yira kọkaaph bọ eeghe nụun? Mọ ịiruen Ẹnaan résel ghan ḍụghum? Kị́dipho.

¹⁵Ọdi ạḅeni ni Mozis mọ, “Mị kạnma ghan ighirigiir ọlo ụḅeeraan ịmi. Mị kạseenyaan ghan ọlo ụḅeeraan ịmi.”

¹⁶Ịduon phọ eḍeenaan mọ rọ́tuan ghan ịlo ẹḅeeraan oye phọ rꞌịlo oye phọ rạkpar ḍịghaagh ọwa, rọtuan ghan ọnma ighirigiir phọ Ẹnaan bịn.

¹⁷Ḅịle kẹn, ạḍinya iigbia phọ ịḅeni ghan ọdaam eelhe phọ Ijipt, mọ, “Ọkaraghi ịphen phọ mị ạtuan bọ kụ aagho bọ nyịna ọda ẹmha phọ ịduon: mọ eḍighieen phọ mị aḍighi bọ nyịna keḍeenaan ịikpo phọ ạmi, aḍien phọ ạmi eeleghaan oomo aḅirini phọ.”

¹⁸Esi okpere, Ẹnaan rẹnma ghan ighirigiir ọlo ạḅeeraan nyọdi kẹngo ọḅaar ẹmhu ọlo ạḅeeraan nyọdi.

¹⁹Iini oniin ọnyo anyina kụḅeni ni ịmi mọ, “Ịphen phọ eru ni ịne, Ẹnaan kekol bọ eeghe kụ ẹḍagha ghan oye? Ạnhian nụun kụ katue bọ ạmerenyan ịitughian phọ ọdi?”

²⁰Kụ nạ oopho oye phọ uḍighi eeghe ạanyian Ẹnaan? Oko rápuru ghan oye phọ ạlhem bọ nyọdi mọ, “Nạ ughol eeghe kụ ụlhem bọ ịmi ịduon phọ?”

²¹Ọmaar ogbiighi, ọlemom roko phọ kụ alegheri ịlo oḍighinom ạḅay phọ. Ọdi katue ni ạsighe eniin ẹḅol ạḅay ạlem ịyal aroko, nyoniin ạnighemi, nyọori phọ abeephemi.

²²Ịduon phọ kẹn kụ ịdi Ẹnaan eḍighi bọ. Ọdi ạwa oḍeenaan ạghelhe phọ ọdi, ḅịle rꞌoleenye eleeny ịikpo phọ ọdi. Kụ ọdi abigh ni ekpom ạkparam ghan eḍighinom ịyaar ạbuphe rọkagh bọ ologhi phọ ọdi kụ mẹgianaan bọ eseere mọ ophiemi phọ.

²³Ọdi ạwa kẹn ni ogananami ẹelha eegu phọ ọdi mukpolonaan bọ iyira phọ dị mạnma bọ ighirigiir phọ, yira phọ ọdi maakolobian bọ aseere mọ ophin aani bin eegu phọ ọdi.

²⁴Yira kụ ạbudi ọdi ạmagh bọ. Ọ́magh buniin ạbuo aJu phọ bịn, ạmagham aani ni buniin aruuruen phọ.

²⁵Ịphen phọ ni kụ ịdi ọdi ạghaaph bọ sịphe ạḍinya phọ aHosia mọ, “Bụphe úḍighi bọ we phọ ạmi kụ ạbudi mị kakol mọ ‘Awe ạmi.’ Eelhe phọ mị ụ́pomoghian bọ kụ ẹdi mị kakol mọ ‘Ọoseeny ạmi.’

²⁶Ọkaraghi esi phọ ịsiphe ọḅeni bọ bịdi mọ ‘Nyina káwe ạmi,’ kụ ẹdi kokol bịdi mọ ạnmuny Ẹnaan phọ edi ghan bọ.”

²⁷Kụ Azaya ạlooghiom ni ịlo Ịzirel mọ, “Ghạlamo aweye phọ Ịzirel uḍiza ni ịdipho ikpo ịisaar ekpolom ọphiiny phọ, mạman ạbidi bịn kụ ẹdi kọpel otene,

²⁸loor esi dị Ọmoogh-we phọ magbiighi ni amuneni ịiruen ekureriom mọ ọdi kasophonaan bọ oomo aḅirini phọ.”

²⁹Edi ni ịdipho Azaya mạḅem bọ ni mọ, “Mọ Ẹnaan Oomo Ịikpo Ọmoogh-we phọ músugheeny ghan bọ we ruutu phọ ayira, ọbo yira musoor ri dọl phọ ạSodom rꞌaGomora.”

³⁰Yira kọkaaph bọ eeghe nụun? Mọ aruuruen phọ úpiigha ghan ụpue ọwa aruukuan phọ Ẹnaan, kụ Ẹnaan mẹtuan omeeraam mọ ạbidi ẹsighenom bịdi mọ awe aruukuan ni,

³¹kụ aweye Ịzirel phọ ghụn ụwa ghan kụ ụ́miin ologh lọ kọtuan kụ Ẹnaan ẹsighe mọ bịdi awe aruukuan ni.

³²Pọ ẹmhu phọ eeghe? Bịdi ụ́miin ologh phọ ịdi eḍighi bọ bịdi useere ologhi sịphe iiḍighi phọ bịn, omeeraam úpogh ụmaghami ịyaar. Bịdi ukpetaan ni ẹko phọ ẹpe ạḍinya iigbia phọ ẹghaaph bọ eghol mọ, “Mịin, mị agim ni ẹpe Zạyon ẹko dị awe kokpetaan ghan, ḍighiigh dị keḍighi ịdi bịdi komeleghu. Kụ oye lọ ameeraam nyọdi kạ́moogh mabi.”