Read abua 1 Bụo ạKorint 1 Bible Online

1 Bụo ạKorint 1 - abua bible

1 Bụo ạKorint 1

¹Mị ạPol phọ ọpo Ẹnaan ẹsaḅar bọ ẹsighe mọ aḍighi otelhedom ạJizos Kraist, rꞌaSostenis umor phọ ayira,

²kụ ụge ḍịnya phọ ạḍien riruomaan inyina ạbuo ạsiosi phọ edi bọ ẹpe Kọrint, rꞌoomo awe phọ ạbuphe Ẹnaan mewoph bọ eḍighi bụo ọdi, rꞌoomo ạbuo areelhe kịrokiro phọ rọmagh ghan bọ ḍien phọ ạJizos Kraist Ọmoogh-we phọ ayira — kọ́lo ayira bịn, ọlo ạbidi rꞌayira ni.

³Ạḍiseph rꞌẹepho kꞌẸnaan Ọde phọ ayira rꞌạJizos Kraist Ọmoogh-we phọ ịrolonaan inyina!

⁴Mị ighol ghan ni inyina rạngo ḍịseph Ẹnaan oomo amem loor esi ọghor phọ Ẹnaan ịngo bọ inyina phọ mẹḅophoghan bọ Jịzos Kraist.

⁵Esi ạmuḅoph phọ ạmuen rꞌaKraist mịngo inyina ẹbalabala ẹelha dị ẹḅaram ịikpo ọghaaph rꞌolegheri ịyaar.

⁶Ịdipho nyina edi bọ rekori ghan ḍio phọ ạJizos Kraist Ọmoogh-we phọ ayira kamite bọ egaan phọ, ooḅi ọghaaph phọ aKraist mạkaraghi aḍiku ịphuuny anyina dị tụtu rꞌaḍiniin ạḍiseph inyina ítenom.

⁸Ọdi kạtol li sịphe ịphuuny phọ anyina kꞌaruukuna phọ, bịn rꞌịyaar inyina kị́biph ḍio phọ ạJizos Kraist Ọmoogh-we phọ ayira katu bọ.

⁹Ẹnaan phọ ịmagh bọ inyina mọ ịḅophoghan rꞌỌony phọ ọdi ạJizos Kraist Ọmoogh-we phọ ayira reḍighi ghan ni ịlo dị aguanaan.

¹⁰Bụo asiya, mị ạsighe ḍien phọ ạJizos Kraist Ọmoogh-we phọ ayira kụ rịlhomom inyina mọ oomo phọ anyina ịmoogh ghan oniin ologhi rꞌeḍighinom ịyaar, amadian kụ́tol mun; ịḅoph oghuugh ẹḅoph ịlhom.

¹¹Bụo asiya ạmi, mị rạkaaph ịduon, ịdi eḍighi bọ abuniin awe sịphe ọto kꞌaKloi kụ ụghaaph ụḅeni ịmi mọ ịruonu edi ni ogbo phọ anyina.

¹²Ẹmhu ịphen mị rạkaaph bọ ịduon, mọ nyina mạaya. Oniin mọ, “Mị rạdaph Pọl”; oniin mọ, “Mị rạdaph Ạpolos”; oniin mọ, “Mị rạdaph Pita”; oniin kẹn mọ, “Mị rạdaph Kraist.”

¹³Nyina medi Kraist rụuku. ẠPol kụ aghol bọ ẹmhu phọ anyina amugh ḍuugh egbo phọ sịphe oreeny phọ ḍụghum? Ughol ḍien ạPol kụ iwur bọ inyina mụum mọ?

¹⁴Mị rạseph ni Ẹnaan mọ emuton Krịspos rꞌạGayos mị mụum úbur ọnon ọnyo anyina.

¹⁵Ḅịle kẹn ọnyo anyina kạ́kaaph mọ ughol ḍien ạmi kụ iwurogh bọ inyina mụum mọ.

¹⁶(Mị ạḅile ni ạatughian mọ mị uwur ri mụum Stẹfanos rꞌọto ọdi, kụ ọlo mị ụ́kiom mun ologhi ọnon oye dị mị ạḅile awur mụum.)

¹⁷AKraist ịmi úrom owurogh ghan awe mụum, urom ghụn ịmi ọghaaph ghan ooḅi ọghaaph phọ. Mị ụ́kaaphom ghan ḍịidugha anem olegheri ịyaar aḅirini phọ, ọbo ịikpo aḍuugh egbo phọ aKraist loor oreeny phọ kepe ghan bọ oopho.

¹⁸Ọghaaph aḍuugh phọ aKraist loor oreeny phọ ọ́ghigh ịyaar esi ạbuphe rope bọ, kụ aḍighi ni ịikpo phọ Ẹnaan esi ayira phọ rọpel bọ kotene.

¹⁹Ạḍinya iigbia phọ ẹḅem mọ, “Mị kapiemi ni olegheri ịyaar aweye iloghi phọ, ạpueghi ọnaghan ạḍughum ạbuo igbogh ịtuugha phọ.”

²⁰Ika kụ ẹmhu ịphen phọ esi ạbuo olegheri ịyaar phọ rꞌạbutughemia iilogh phọ rꞌạbuphe rọoḅeghion bọ kọnunuan olegheri ẹmhu ịlo aḅirini phọ? Ẹnaan meḍeenaan ni mọ olegheri ịyaar aḅirini phọ ọphon pọ elologhi.

²¹Ẹnaan esi olegheri ịyaar phọ ọdi eḍighi ni dị awe kọ́sighe olegheri ịyaar ọlo ạbidi kụ olegheriom nyọdi. Ịḅeeraan ghụn Ẹnaan ọtuan adom elologhi phọ yoor rotelhe bọ ọphel ạbuphe omeeraam bọ.

²²Bụo aJu phọ ropuru ghan ọmiin eḍeenaan, bụo aGris kọwa olegheri ẹmhu ạraraar aḅirini phọ,

²³kụ yira ghụn rọkaaph ghan ịlo aḍuugh phọ aKraist loor oreeny phọ. Ọghaaph phọ ọphon kụ aḍighiigh dị keḍighi dị bụo aJu phọ komeleghu, ḅịle kẹn ịyaar dị aruuruen phọ kọ́maghami ịyaar.

²⁴Kụ esi ạbuo aJu phọ rꞌaruuruen phọ ạbuphe Ẹnaan mẹsaḅar bọ, ọghaaph phọ ọphon kụ aKraist, ịikpo phọ rꞌolegheri ịyaar phọ Ẹnaan.

²⁵Ịlo rogbiom mọ elologhi Ẹnaan epu ghụn ni olegheri ịyaar awe, ḅịle kẹn ịlo rogbiom mọ aḍidugh Ẹnaan ẹkpar ghụn ni epu ịnyaam awe.

²⁶Bụo asiya, ịkiom ologhi dọl phọ nyina ẹrol bọ mem mọ Ẹnaan ịmagh bọ inyina. Bụdi awe aḅirini phọ ogbiighiom mọ olegheri ni ịyaar ọḅile ọmoogh ịikpo rꞌạdol eghuan úḍiza sịphe ogbo phọ anyina.

²⁷Ẹnaan ịtuan osiphe umugholoor weye olegheri ịyaar phọ kụ ẹsaḅar bọ bụphe awe aḅirini phọ ụ́maghami bọ ịyaar. Ịtuan kẹn ni osiphe umugholoor weye ịikpo phọ kụ ẹsaḅar bọ bụphe awe aḅirini phọ ogbiighiom bọ mọ odugh ni phọ.

²⁸Ẹnaan ịtuan ophiemi awe phọ aḅirini phọ ọmaghami bọ ịyaar kụ ẹsaḅar bọ bụphe bịdi ophogh bọ osooromi ẹsighe, bụphe ụ́maghami bọ ịyaar, ụ́moogh bọ ịyaar oḍighinom mọ.

²⁹Ịphen phọ eḍeenaan mọ oye dị kabaga ghisigh Ẹnaan ólho.

³⁰Ẹnaan kụ azin ạmuḅoph phọ anyina rꞌạJizos Kraist. Ẹnaan kụ irom bọ nyọdi mọ ụngo iyira olegheri ịyaar rꞌaruukuan phọ ọdi, ạḅile ạtagharan kụ uwoph iyira esi ịkaraph phọ ayira.

³¹Ịduon kụ iḍighi kụ ạḍinya iigbia phọ ẹḅem bọ mọ, “Oye lọ rạwa obaga ạtuan ghụn ịpe Ọmoogh-we phọ maḍighi bọ kụ abaga ghan!”