Read abua 1 Bụo ạKorint 14 Bible Online

1 Bụo ạKorint 14 - abua bible

1 Bụo ạKorint 14

¹Ẹphomoghian kụ eḍighi ịyaar dị nyina kẹkpala ghan ẹwa. Iseere ologhi ẹwa ghan ruunmo aruwaloor phọ — ịkaraghi ẹkpaariom ọghaaph ghan ịpe Ẹnaan egananami bọ.

²Oye lọ rạḅa ọnon ọnhu dị ụ́naghan rạkaaph ghan kạḅeni Ẹnaan káwe, ịdi eḍighi bọ oye nyọdi rạ́naghanan. Uwaloor phọ kụ rạsiiny ghan nyọdi, kụ ọghaaph phọ ọlo ịbooghian ni.

³Kụ oye lọ rạkaaph ghan ịpe Ẹnaan egananami bọ rạkaaph ghan ikpo ọnhu ọoneghiom rꞌạkpo ologhi rꞌịidereghian kạḅeni we.

⁴Oye lọ rạḅa ghan ọnon ọnhu dị ụ́naghan rạaneghiom ghan loor ọdi bịn, kụ oye lọ rạkaaph ghan ịpe Ẹnaan egananami bọ rạaneghi ghan oomo ạbuo ạsiosi phọ.

⁵Ọbo ịḅeeraan ni ịmi dị oomo phọ anyina kẹḅa ghan ọnon ọnhu dị ụ́naghan, kụ ọlo ọghaaph ghan ịpe Ẹnaan egananami bọ kụ ịnighe epu. Ọpo rạkaaph ghan bọ ịpe Ẹnaan egananami bọ kụ aḍighi sụo apu nyọpo rạḅa ghan bọ ọnon ọnhu dị ụ́naghan, emuton dị oye odi aani sịphe phọ ọgba ghan ẹmhu phọ ọoneghiom ạbuo ạsiosi phọ.

⁶Bụo asiya, mịna kaḍighi eeghe ạsuo kụ ịngo inyina mem dị mị aru asi kụ rạḅa ghan ọnon ọnhu dị ụ́naghan? Rꞌẹnum ạsuo ólho emuton dị mị iruom inyina ẹmhu ịpe ạaghi bọ mꞌolegheri ịyaar mꞌịpe Ẹnaan egananami bọ, ḅịle mꞌịtughemi.

⁷Ịkiom ologhi eeḍue rꞌogumogum, rạraar ạsuor rꞌịḅa dị ḍiphooghu ị́moogh. Eḍighi ịyaar dị ạbuo iitia phọ ụ́maar ụugbarion, oye kalegheri bọ ika ḍụor phọ rꞌowol ịḅa phọ roti bọ?

⁸Eḍighi ịyaar dị ọpo rapula ghan bọ ọkuodu ẹgham mọ ụ́maar ephulaam mọ, ạnhian kụ kạnya bọ ịinya ẹgham mọ?

⁹Ịduon phọ kẹn, eḍighi ịyaar dị nyina ẹghaaph ọghaaph phọ anyina ọnon ọnhu dị ụ́naghan, oye kalegheri bọ ika ẹmhu ịpe nyina rẹkaaph bọ? Pọ nyina retoḅologhi ni ookuugh ọnhu anyina bịn!

¹⁰Mị ragbi mọ kótue ọbal omuneni ọnhu kịrokiro dị edi sịen aḅirini phọ, kụ rꞌoniin ọdi ẹmhu ụ́moogh ólho.

¹¹Kụ eḍighi ịyaar dị mị ụ́naghan ọnhu phọ rọḅa bọ, pọ oye phọ rạḅa bọ maḍighi ooruen esi ạmi, mị kẹn maḍighi ooruen esi ọdi.

¹²Sịen dị nyina rẹwa ghan bọ ọmoogh aruunmo aruwaloor phọ, iseere ologhi ẹmoogh ẹbalabalami ịpe kẹeneghi bọ bụo ạsiosi phọ epophe.

¹³Esi ịduon phọ, oye lọ rạḅa ghan ọnon ọnhu dị ụ́naghan ạaḅereghi ghan ọmooghom ịikpo ọgba ghan ẹmhu phọ ọḅeni ạbunon!

¹⁴Eḍighi ịyaar dị mị rạaḅereghiom ọnon ọnhu, uwaloor phọ ạmi kụ ạkar rạaḅereghi, ologhi phọ ạmi sịphe ólho aani.

¹⁵Mị uḍighi ika nụun kụ ẹnighe? Mị kạaḅereghiom ni uwaloor phọ ạmi kụ mị ạḅile kẹn ni ạaḅereghiom ologhi phọ ạmi; mị kạmoorom ni sụor uwaloor phọ ạmi kụ mị ạḅile kẹn ni ạmoorom ologhi phọ ạmi.

¹⁶Mem dị nạ ạsighe uwaloor phọ ạna bịn kụ rạngoom ḍịseph Ẹnaan, oopho oye dị odi aani sịphe ookpomoghan phọ dị ụ́naghan aani ọnhu phọ nạ rạḅa bọ kakol bọ eeghe kụ ameeraam aani mọ, “Ẹrol li ịdipho”? Ọdi ólhegheri ẹmhu ịpe nạ rạkaaph bọ.

¹⁷Ịiḅereghi phọ ạna ẹnighe-nịghe rẹ́eneghi ghan oopho oye phọ.

¹⁸Mị rạseph ni Ẹnaan ịdipho mị kụ rạḅa ghan bọ ọnon ọnhu dị ụ́naghan kapu ḍita phọ anyina.

¹⁹Kụ mem lọ bụo ạsiosi phọ ookpomoghan ịiḅereghi, kpạripe ghụn mị ạḅa oogh ikpo ọnhu dị kọnaghan ọtughemiom awe phọ, rꞌọḅa ạsimuunir ikpo ọnhu dị ẹmhu phọ úlegheri.

²⁰Bụo asiya, isereghi ịitughian ạnmuny, ẹmoogh ịitughian awe dị mọmanam, kụ esi lọ eḍighi ịlo ịkaraph ịtol ghan dọl ịpuuny ạnmuny.

²¹Ọge ni sịphe ạḍinya iigbia phọ mọ, “Ọmoogh-we phọ ạḅem mọ, ‘Mị kạsighe weye dị rọḅa ọnhu dị ụ́naghan kụ ạkaaphom ạḅeni we phọ ạbuen. Mị kạsighe ni ịidoronhu aruuruen kụ ạkaaphom, kụ bịdi ịmi kụ́naghanan ni.’”

²²Esi ịduon phọ, aruunmo ọḅa ghan ọnon ọnhu dị ụ́naghan eḍighi eḍeenaan ọphurom ạruru ạbuphe úmeeraam bọ kạ́buphe momeeraam bọ, kụ aruunmo ọghaaph ghan ịpe Ẹnaan egananami bọ eḍighi eḍeenaan ọḅaalami ologhi ạbuphe omeeraam bọ kạ́buphe úmeeraam bọ.

²³Eḍighi ịyaar dị oomo ạbuo ạsiosi phọ oru ookpomoghan, kụ oye ye amiigh ọḅa ghan ọnon ọnhu dị kọ́naghan, kụ abuniin oopho awe rꞌạbudi úmeeraam oru oḍigh aani, bịdi kọ́ḅem mọ nyina reepheḍu ḍụghum?

²⁴Kụ eḍighi ịyaar dị oomo awe phọ rọkaaph ịpe Ẹnaan egananami bọ kụ oniin oye lọ úmeeraam ḅịle mꞌoopho oye aru aḍigh aani, ọdi kạtuan ni ịpe ọdi ạnaghan bọ aloghoma ịkaraph phọ ọdi. Kọsighe oomo phọ ịpe ọdi ạnaghan bọ kụ osophonaan nyọdi ọoruen.

²⁵Kogananami ni ịitughian ịbooghian phọ ọdi, kụ ọdi aḅololo ghisigh Ẹnaan aaseeny ạgba amitiom mọ, “Igey ni, Ẹnaan edi ni ogbo phọ anyina.”

²⁶Bụo asiya, ẹmhu ịphen phọ eeghe? Mem lọ nyina eekpomoghan ịiḅereghi, oye ye aakolobian ni. Ooni oye ạpam ḍụor, ooni ịyaar ọtughemi, ooni ịdi Ẹnaan egananami eḍeenaan nyọdi, ooni ạmoogh ịyaar ọghaaph ọnon ọnhu dị ụ́naghan, kụ ooni ọgba ẹmhu phọ. Iḍighi ghan oomo phọ ịne ịlo ọoneghiom ạbuo ạsiosi phọ ophophe.

²⁷Eḍighi ịyaar dị rọwa ọḅa ọnon ọnhu dị kọ́naghan, awe phọ kúpel ghan ịraar mem, kụ oniin ạghaaph ghan aseere kụ ọphori phọ ạsighe aani, kụ ọnon oye ạmeera ọgba ghan ẹmhu phọ!

²⁸Kụ eḍighi ịyaar dị oye ọgba ghan ẹmhu phọ úlho, ọpo rạwa bọ ọḅa ọnon ọnhu phọ aḅoorian bịn ạghaaphom ologhi ạḅeni Ẹnaan!

²⁹Ịyal mꞌịraar lọ ẹngo ọghaaph ịpe Ẹnaan egananami bọ bịn kụ ọghaaph ghan kụ ạbueri phọ ọoḅeghion ọghaaph phọ ạbidi ophogh!

³⁰Eḍighi ịyaar dị ephum ọnon oye dị ạrol aani ude ọghaaph ịpe Ẹnaan egananami bọ eḍeenaan nyọdi, ọphori phọ asophe ghan nyọpo ọdi!

³¹Oomo phọ anyina, oniin atum nyoniin, etue ni ẹkaaph ghan ịpe Ẹnaan egananami bọ, ọbo aḍita phọ ọtuugha ghan ọḅile ọmoogh ạkpo ologhi.

³²Ọlo ạmoogh ruunmo ọghaaph ghan ịpe Ẹnaan egananami bọ kụ kạpamaghan ruunmo phọ ọdi,

³³ịdi eḍighi bọ Ẹnaan ịmagh iyira mọ ọrolom ẹepho kị́walawala. Esi eḍighinom ịyaar ạbuo oomo ạsiosi phọ Ẹnaan,

³⁴ạnmariir phọ oḅoroghian ghan mem lọ ookpomoghan! Omirighan ni bịdi ọghaaph ghan ọghaaph, ịdipho Ologh phọ aMozis ạḅem bọ mọ bịdi kúḍighi ghan ruwo ẹmhu.

³⁵Ịyaar lọ bịdi úlegheri, opuru ghan burulhom mọ ạbidi ologhi otu! Eḍighi ni umugholoor dị ạnir-ephoph kạghaaph ọghaaph mem lọ ookpomoghan.

³⁶Kụ ẹkigh mụdi ọghaaph phọ Ẹnaan ạḍua esi anyina kụ aru bọ ḍụghum? Ḅịle aru ịteeny inyina bịn ḍụghum?

³⁷Oye lọ agbiighiom ologhi mọ ọno oye dị rạkaaph ghan ịpe Ẹnaan egananami bọ eḍeenaan nyịno ḅịle mọ ọno ạmoogh ruunmo aruwaloor, aloghoma mọ Ọmoogh-we phọ kụ ạto ịphen mị ạge bọ riruomaan inyina!

³⁸Kụ kẹ́logh elegh ọlo ịphen phọ elegh ụ́logh.

³⁹Bụo asiya, esi ịduon phọ, iseere ologhi ọghaaph ghan ịpe Ẹnaan egananami bọ, kụ kémirighan bụlo rọḅa ghan ọnon ọnhu dị kọ̋naghan.

⁴⁰Ịḅoonomi ghan oomo phọ ịne eḍighi ẹkuami.