Read abua 1 Bụo ạKorint 16 Bible Online

1 Bụo ạKorint 16 - abua bible

1 Bụo ạKorint 16

¹Ophogh nụun ịlo ekpisi osogh ghan ikpoki ọghiom awe phọ Ẹnaan odi bọ Judia! Ịtuugh ịpe mị ạḅeni bọ bụo ạsiosi phọ aGaletia bịn eḍighi aani ghan.

²Tọrobo aḍio ạSondi, oye ye ạtuugh ghan bin dị ạkasian ḍigbo phọ ọdi ạsighe aseere, bịn mị aru asi ogburugburu ịlo osogh kạ́tol!

³Mị aru asi, mị kạge ni rịnya dị awe phọ nyina mẹson bọ kọpam kụ ọsighenom ruunmo phọ anyina ọki Jeruselem.

⁴Emeghenom dị mị kạki aani, bịdi kụtuan aani ni ịmi.

⁵Mị katu ni ịteeny inyina, mem dị mị makitonom Masidonia, ịdipho mị magbiighi bọ ologhi phọ ạmi.

⁶Ẹghigh, mị kịrolan inyina abia, iini tụtu ạrunwanyu ẹephoom mọ emuneen, kụ nyina egbi ọlogh ạḍighaagh ịlo erelhe phọ ạmi tọrobo ekpisi lọ ẹḅile emeghenom ọghi.

⁷Mị ụ́wa okaram anyina ḍien bịn oten. Edi ni ologhi ạmi ọrolan anyina obia, lọ Ọmoogh-we phọ ameera.

⁸ Kụ mị kạtol li ẹphen Ẹfesos tụtu ẹteeny ḍio ạPentikost phọ.

⁹Ekughuron ni ẹphen phọ oḍighi oboom oḍighi dị ạmoogh ni ẹmhu, kụ ọlo aḍita ạnmuny-ẹkpar phọ ạḍiminighan ni.

¹⁰Ịdipho oḍighom ịyaar kụ aTimoti aru ẹpe, ikuraam ni nyọdi, ịdi eḍighi bọ ọdi raḍighi aani ni oḍighi Ọmoogh-we phọ ịduon ạmi.

¹¹Ọnyo anyina nyọdi kụ́ḅitonaan! Ịlogh ni ḍịghaagh ẹghologholomi erelhe phọ ọdi, ọbo ọdi aḅula ụteeny ịmi. Mị rakori ni nyọdi rꞌạbuo asiya phọ.

¹²Ịlo Ạpolos, ọnyo asiya phọ ayira, mị rạ́gba ghan mem ọkpaariom ọdi mọ ạpham bụeri phọ ạbuo asiya phọ aru ịteeny inyina, kụ ke̋ḍigh ologhi ọdi ọnuun oru. Ọdi ạmoogh eepoogh kạ́bile oru.

¹³Igona loor. Ilom ni omeeraam mọ anyina ẹkananaam. Ịmoogh ạkpo ologhi rꞌịnyaam kụ ẹrolom.

¹⁴Ịsighe ẹphomoghian kụ eḍighinom ghan oomo phọ oḍighi phọ anyina.

¹⁵Nyina elegheri ni ịlo ạStefanos rꞌọto ọdi. Bịdi kụ ạbuḅel awe dị omeeraam Kraist ẹpe Ạkaya, kụ ọkuom ni loor phọ ạbidi oḍighi ghan oḍighi ọngo awe phọ Ẹnaan. Bụo asiya, mị rịkpaariom ni inyina mọ

¹⁶ịnaghanan ghan ịtooghi ọdo awe phọ ạbuen rꞌạbulo rꞌạbidi rokumuan ghan bọ.

¹⁷Ịdipho ạStefanos rꞌạFortunatos rꞌẠkaikos oru bọ, ẹḅaal li ologhi ạmi. Bịdi mọmeera esi phọ nyina ẹwile bọ,

¹⁸kụ bịdi moḍighi dị ologhi ạmi masoor, ịdipho bịdi oḍighi bọ dị ọlo anyina asoor aani. Ọdo awe phọ ạbuen ọkpe ni oseerian ọnhu.

¹⁹Bụo ạsiosi eelhe phọ Esia mipuru inyina. Ạkuila rꞌạPrisila rꞌạbuo ạsiosi phọ rookpomoghan ghan bọ kꞌạbidi okol li Ọmoogh-we phọ kụ ipuru inyina ọḅile opuru.

²⁰Oomo ạbuo asiya phọ odi bọ ẹphen mipuru inyina. Oniin aghurughi ghan nyoniin!

²¹Mị ạsighe ḍịghaagh ạmi kụ rạgeom ịphen: Mị ạPol mipuru inyina.

²²Moruule oye lọ Ọmoogh-we phọ ụ́pomoghian. Mạrana tạ — ịduon phọ pọ Ọmoogh-we phọ ayira, tue.

²³Ooḅi ọghor phọ kꞌạJizos Ọmoogh-we phọ ịrolonaan inyina!

²⁴Ẹphomoghian phọ ạmi ẹrolonaan oomo phọ anyina ạJizos Kraist kụ ạmoogh bọ!