Read abua 1 Bụo ạKorint 6 Bible Online

1 Bụo ạKorint 6 - abua bible

1 Bụo ạKorint 6

¹Mem lọ oniin ọnyo anyina ạpioman nyoniin, iḍighi ika kụ nyina ẹbile ghan bọ we phọ Ẹnaan kụ ẹpam ghan bọ ḍighiton phọ rẹkimom kꞌạbuo aruru kụ ọghaaph phọ? Ịduon phọ ẹnighe ni ḍụghum?

²Nyina ílegheri mọ awe phọ Ẹnaan kụ koogboonaan ịiruen aḅirini phọ ḍụghum? Ịdipho nyina kụ keegboonaan ịiruen aḅirini phọ, nyina kẹ̋man ọoḅeghion ghan ịkpirikpiri asighiton ḍụghum?

³Nyina ílegheri mọ yira kụ koogboonaan ịiruen rụukpaany phọ Ẹnaan ḍụghum? — Kụ ẹghiom ologhi ịikpalaghian awe ịsien aḅirini phọ.

⁴Kụ ighiil ịikpalaghian esoor, ẹkpe ni ọsighe ghan ọghiom ạbuphe ụ́man bọ ịyaar esi ạbuo ạsiosi phọ mọ ọghaaph ḍụghum?

⁵Ịphen phọ mị rạkaaph bọ ịlo osiphiom anyina umugholoor. Ẹrol dị rꞌoniin uwo ologhi ólho sịphe ogbo phọ anyina dị ạman osoph ọoruen ọngo ekeeny rꞌelhiom.

⁶Kụ oniin ghụn ạḅile rasoorom ghan nyoniin erugh ghisigh ạbuo aruru.

⁷Ọnyo anyina lọ amighirom asoorom nyoniin erugh bịn mạmoogh ni eekuna apum. Iḍighi inyina ịkaraph, ịnighe ghụn dị nyina kẹminoghom ghan ḍụghum? Ozirion rạraar lọ nyina ẹmoogh ọsighiogh, ịnighe ghụn dị nyina kẹkparam ghan ḍụghum?

⁸Kpạripe ghụn rꞌoḅoronom, kụ oniin ạḅile raḍighi ghan nyoniin ịkaraph kazirion rạraar ạanyi ọkaraghi ạbuo asiya phọ ọdi.

⁹Nyina ílegheri mọ abuḍighinom ịkaraph kọ́moogh aani bin ọmar phọ kꞌẸnaan? Kébia loor anyina. Ạbuo ipesi, rꞌạbuo ịiḅereghi ịkaaghineen ạrumugh, rꞌabulhiom ẹmha, rꞌạbuminian rịiniom,

¹⁰rꞌạruḅa, rꞌạbuo ekpooko ikpoki, rꞌạbupughol miim, rꞌạbuo ịkaraph ạsiagba, rꞌạbukaaghi ruutu — rꞌọnyo ạbuen dị kạmoogh aani bin ọmar phọ kꞌẸnaan ólho.

¹¹Buniin anyina ịrol li ịdipho phọ, kụ miwoph inyina ọsighe esi ịkaraph phọ. Mitigh inyina oseenaan Ẹnaan. Ẹnaan phọ ayira mẹtuan Uwaloor phọ ọdi rꞌaḍien phọ ạJizos Kraist Ọmoogh-we phọ ẹsighenom mọ nyina awe aruukuan ni.

¹²Mị kameeraam ni oye lọ ạḅem mọ, “Ịlo umirighan ịmi oḍighi ílho,” kụ oomo ạraraar kụ ị́nighenaan oye oḍighi ghan. “Ịlo umirighan ịmi oḍighi ílho,” kụ ịyaar ịmi kígho ẹmoogh.

¹³Mị kameeraam ni oye lọ ạḅem mọ, “Eḍien ẹlo ọkuruḅaka, kụ ọkuruḅaka phọ ọlo eḍien,” kụ Ẹnaan kepiemi ni ọkuruḅaka rꞌeḍien. Aloor oye ílhoonaan ipesi, edianaan oghueni ghan Ọmoogh-we phọ, kụ Ọmoogh-we phọ kụ rakueni ghan loor phọ oye.

¹⁴Ịdipho Ẹnaan eḅeton bọ Ọmoogh-we phọ sịphe aḍuugh phọ kụ ẹdi ọdi kạsighe ịikpo phọ ọdi uḅerionom aani iyira.

¹⁵Nyina ílegheri mọ aloor phọ anyina kụ ariisi aloor phọ aKraist? Mị ạsighe eniin esi aloor phọ aKraist kụ ạḅaranaan oliom ẹmha, ẹnighe ni ḍụghum? Tạa, ịlo ạmi ríḍigh!

¹⁶Nyina ílegheri ḍịen mọ oye lọ ạrolan esi rꞌoliom-ẹmha mạḅophoghan nyọdi? Ịdipho ọge bọ pạ ạḍinya iigbia phọ mọ, “Ịyal phọ ạbidi koḍighi iniin iphulupul.”

¹⁷Kụ ọlo ạḅophoghan Ọmoogh-we phọ, pọ uwaloor ạbidi kaḍighi nyoniin.

¹⁸Ịkporion ghan rạghaagh ipesi. Ịnon ọdo ịkaraph lọ oye raḍighi ghan rẹ́pue ghan loor phọ ọdi, kụ opesiom ipesi phọ rạpuenaan ghan loor.

¹⁹Nyina ílegheri mọ aloor phọ anyina kụ otu ịiḅereghi phọ Uwaloor Iigbia phọ Ẹnaan arugh bọ? Nyina ị́moogha loor anyina — nyina ạbuo kꞌẸnaan.

²⁰Igho ni inyina ḍiboom aḍighi. Ịsighe loor phọ anyina eghueniom Ẹnaan.