Read abua 1 Bụo ạKorint 8 Bible Online

1 Bụo ạKorint 8 - abua bible

1 Bụo ạKorint 8

¹Ọoḅeghion nụun ophogh ḍipuru phọ anyina ịlo ariiḍien lọ ọphighironom ẹkia ọngo ruru! Ọkar igey ni bịdi rọḅem ghan mọ, “Oomo phọ ayira olegheri ni ịyaar.” Ọdo olegheri-ịyaar phọ ọphon raaphughemi ghan oye, kụ ẹphomoghian kụ repophe ghan oye.

²Oye lọ ragbi ghan mọ ọno alegheri ni ịyaar, pọ ọ́karaghi olegheri ịpe ẹkpe bọ olegheri phọ.

³Kụ Ẹnaan rẹloghoma ghan ni oye lọ ạphomoghian nyọdi.

⁴Ọḅile nụun ophogh malhe ịsaraghi phọ! Yira olegheri ni mọ ạnmuny aghuḍuul phọ ị́moogh ḍiphooghu. Yira olegheri ni mọ edi bọ eniin phọ Ẹnaan bịn.

⁵Ghạlamo ukol ạrumugh edi ghan ni ẹpe kꞌạke rꞌịsien ade phọ — ḅịle kẹn mọ ukol ạrumugh dị ẹmoogh bụo aruru iḍiza ni —

⁶yira ọmoogh bọ eniin Ẹnaan bịn, Ọde phọ ạlhemogh bọ oomo ạraraar phọ, ọpo roḍighi bọ oḍighi phọ kọngo; ḅịle kẹn yira ọmoogh bọ oniin Ọmoogh-we ạJizos Kraist, ọpo ọtuan bọ kụ ọlem oomo ạraraar phọ, ọpo aḍighi bọ ịyaar phọ yira odi bọ.

⁷Oomo awe kụ úlegheri ephigh phọ ịphen. Tụtu kꞌarodon oḍighi aruru phọ ạḅaram ni buniin awe dị bịdi role eḍien lọ oḍighinom ịyaar aghuḍum rọotughianam ghan ologhi mọ bụno role eḍien aruru. Ịdipho ịitughian phọ ạbidi esi ị́meera bọ, bịdi rogbiighiom ghan ologhi mọ eḍien phọ mẹphue bụno.

⁸Bịdi úlegheri mọ eḍien ị́moogh ịyaar oḍighinom ạdol phọ ayira ghisigh Ẹnaan. Mọ yira ole yira úle, ịyaar ayira esi répe.

⁹Kụ ọlo imiigha ni loor. Kẹ́tuan eḍien lọ ịkpianaan inyina olhe ghan bịn eḍighi dị bụphe omeeraam mọ ạbidi adugh bọ komeel oḍighanaan ịkaraph.

¹⁰Eḍighi ịyaar dị oye lọ ịitughian ọdi esi ị́meera ạmiin dị nạ phọ alegheri bọ ịyaar phọ kụ aleeghi eḍien obughotu aruru, ịphen phọ kẹ́kparami ologhi ọdi oleeghi aani eḍien aruru ḍụghum?

¹¹Kụ oye phọ ọphon ịitughian phọ esi ị́meera bọ, ọphon aKraist aghol aani bọ ni kụ amugh, ạtuan olegheri ịyaar phọ ạna bịn ape.

¹²Ịduon phọ nạ maḍighi bọ ịkaraph ạḅile ạphue iloghi ạbuo asiya phọ ạna ịitughian phọ esi ị́meera bọ, bịn nạ maḍighi aani ịkaraph Kraist.

¹³Kụ eḍighi ịyaar dị eḍien kụ keḍighi dị ọnyo asiya ạmi kạpioman, pọ mị kạ́ba mun ẹnam, ọbo ọnyo asiya phọ ạmi kụtuan ghan bọ ịmi ạpioman.