Read abua 1 Bụo ạKorint 9 Bible Online

1 Bụo ạKorint 9 - abua bible

1 Bụo ạKorint 9

¹Ịtooghi awe ị́pham ni ịmi ḍụghum? Mịna kótelhedom aKraist ḍụghum? Mịna kọ́miin ḍịen Jịzos Ọmoogh-we phọ ayira? Nyina ḍịen kụ kạ́suo ịpe mị akumuan bọ ạngo Ọmoogh-we phọ?

²Ghạlamo bụnon úmeeraam mọ mị otelhedom aKraist ni, ẹkpe ni dị nyina kemeeraam ịdi eḍighi bọ ạdol phọ anyina esi Ọmoogh-we phọ kụ elegh dị ọdaphari oḍeenaan mọ mị otelhedom aKraist ni.

³Mem lọ awe ụḍagha ịmi, ịphen kụ ịdi mị rạkaaph ghan ọphelaam ẹmhu ạmi.

⁴Mịna ụ́man ọtu ghan oḍighi phọ ạmina ọmoogh ịyaar olhe ḍụghum?

⁵Mịna ụ́man aani ophin oniin ọnyo asiya phọ kụ orelhiom ghan erelhe phọ ạmi, ịdipho ạbueri phọ abutelhedom mọ rꞌabumor Ọmoogh-we phọ ḅịle rꞌaPita ḍụghum?

⁶Ẹrol dị ẹgeom Bạnabas rꞌạmina mọ ọwa ghan kụ olhe ḍụghum?

⁷Ọnyo ẹgham ḍịen ikpoki rále ghan? Oḅephom ozo ireeny amiim ḍịen rạ́ku ghan iimuma phọ? Opoghom iyool-ịga ḍịen rạ́moophi ghan mạmaam ịga phọ?

⁸Ghạlamo ịduon mị ạsighe bọ ni ịdi remite ghan ḍio etum ḍio kụ rạmaaniom, bịn ẹḅophan ni rꞌịpe Ologh phọ ạḅem bọ.

⁹Ọge ni sịphe Ologh phọ aMozis mọ, “Ọnhu ạnam dị rạponyon ịbiakpa ụ́kasaghi ghan!” Ẹnaan ịitughianam ghan ologhi sịnam bịn ḍụghum?

¹⁰Ọdi iyira ụ́ḅaram aani ḍụghum? Ịphen phọ ịkpulughiom aani ni iyira. Ẹkpe ni dị ọzuphom rꞌọponyonom mọ kọminogh ni ịghor mọ ạbuno kopin ni bin ịbiakpa phọ.

¹¹Yoor mọzuph ịizupha aruwaloor sịphe iloghi phọ anyina. Ẹpughan ni dị yoor kole aani ịyaar anyina ḍụghum?

¹²Mọ ịkpe ni, ọbo ịlo ayoor kụ mipu ịlo ạbuphe rọwa ghan bọ ịphen phọ ḍịghaagh anyina. Ịphen phọ yoor ụ́wa. Yoor odimom ghụn ọkpar aloor oomo amem ọbo ịyaar kesophom ghan bọ mọ awe ọnaghan ooḅi ọghaaph phọ aKraist.

¹³Tọ nyina elegheri ni mọ bụphe roḍighi ghan bọ oḍighi Otu Ịiḅereghi phọ rọmoogh ghan eḍien ạbidi sịphe, ḅịle mọ bụphe rọpinyon ghan bọ rịkia sịphe enmeny ịyaar aghuḍum mọ role aani ghan ni bin ạrikia phọ.

¹⁴Ịduon kẹn kụ ịdi Ọmoogh-we phọ ạto bọ mọ bụphe rọkaaph ghan bọ ooḅi ọghaaph phọ ọtuan ghan sịphe kụ ọmoogh aani ịyaar ole.

¹⁵Kụ rꞌiniin ịphen phọ dị mị mapuru ghan ílho. Ḅịle kẹn mị ụ́tuan opuruom anyina rạraar phọ ịphen kụ rạge bọ. Kpạripe ghụn mị amugh, dị oye kạ́kaaph ạpuenom ịyaar obomaam mọ ạmi.

¹⁶Mị kạ́tuan mọ mị rạkaaph ghan ooḅi ọghaaph phọ bịn abaga. Ịkpaariom ni ịmi. Mị úlegheri ịlo mịrolom ịmi mọ mị mụ́kaaph ghan bọ ooḅi ọghaaph phọ.

¹⁷Mị kụ ạwaanaan loor ạmi oḍighi phọ, ọbo mị mupuru ni ikpoki olhe ghan. Ẹḅile ghụn ịkpaariom ịmi, ịdi eḍighi bọ Ẹnaan kụ ịḅogh oḍighi phọ ọphon ẹlhogh ḍịghaagh ạmi.

¹⁸Ịikpia phọ ạmina eeghe? Ịdipho mị ikpoki ḅịle rꞌịpe isi bọ ịmi ụ́waam ghan bọ ooḅi ọghaaph phọ kụ ịikpia phọ ạmi.

¹⁹Ịyaar ịmi ị́ghoroghi. Mị kẹ́bene oye. Mị ụmagha loor ạmi ẹbene ọbo mị ạtophoron we lọ mị katue ạḅaranaan Kraist.

²⁰Igbo ạbuo aJu phọ mị uḍighi aani ni oniin ọnyo ạbidi ọbo mị ạtophoron bịdi. Ghạlamo ịdipho mị makpetenaan bọ ni Ologh phọ aMozis bịn igbo ạbuphe rooko bọ ni mị uuko aani ni, ọbo mị ạtophoron bịdi.

²¹Ịduon phọ kẹn kụ ẹdi igbo aruuruen phọ róoko ghan bọ Ologh phọ aMozis mị uḍighi aani ni ooruen, ọbo mị ạtophoron bịdi. Ẹmhu phọ rẹ́ḅem ghan mọ mị ráako ghan iilogh phọ Ẹnaan. Emeeraam mọ iilogh phọ aKraist kụ riphogh ịmi.

²²Igbo ạbuo ọkporokporo omeeraam mọ, mị ụkporokporo aani ni ọbo mị ạtophoron bịdi ạḅaranaan Kraist. Esi okpere, mị asi ẹmha lọ omuuna rọkiom elhiom, mị umuuna aani ni bịn, ọbo mị ạphel buniin ạbidi reten lọ mị katue.

²³Mị ughol ẹmhu ooḅi ọghaaph phọ kụ raḍighi ghan bọ oomo phọ ịphen phọ, ọbo mị ạmoogh bụḅarama dị kọkaaph aani ghan.

²⁴Nyina elegheri ni mọ iipikian eghiil, aḍita phọ rokiil ghan ni, kụ oḍiemiom mọ bịn rạmoogh ghan ruunmo phọ. Ikiil ịlo nyina kẹmoogh aani ruunmo phọ.

²⁵Oophugha ephegh dị odi ịtuugha rạtuan ghan ni ọzola aḍuphuuph iphelegbe phọ kẹḅuura bọ ni bịn kápogh ekeeny rꞌelhiom; kụ yira ghụn ụtuan ọzola ạḍidi kẹ́ḅuura kꞌagee-pọ kụ rokiil ghan bọ.

²⁶Mị ụtuan ruunmo phọ bịn kụ asomoghi bọ aghiil ọteeny aḍiigbu phọ. Ḅịle kẹn mị ụ́kigh obiom elephiri dị rạḅugh ghan bịn kaphogh oopho esi ạgiph.

²⁷Mị rạkparagha ọphamaghan aloor ạmi, ọbo kughel ghan bọ ịmi phọ ạmagh bọ bụnon awe mọ oru aani eghiil phọ.