Read abua 2 Bụo ạKorint 10 Bible Online

2 Bụo ạKorint 10 - abua bible

2 Bụo ạKorint 10

¹Mị ạPol phọ buniin rọḅem ghan bọ mọ ómophoghuan ghan mem mọ ạrol bọ ogbo phọ anyina rọḍua pụruku ạḍiaḅa phọ ị́nighe rọnighe phọ, ạsighe ni ọnma ighirigiir rꞌophooph ologhi phọ aKraist kụ rịiḅereghiom inyina.

²Íḍighi ghan ịlo mị aru asi mị kịḅaam inyina ḍịaḅa phọ ạḍiphe ẹkpe bọ ọḅaam ạbuphe ọḅem bọ ni ọkpaariom mọ ịkaraph ạruuphua kụ retelhiom bọ iiḍighi phọ ayoor.

³Ọkar igey ni, yoor otugh ni sịen aḅirini phọ, kụ ọlo yoor ụ́sighe ịnyaam awe aḅirini phọ kụ robianam bọ.

⁴Yoor ụ́sighe ịinya ẹgham aḅirini phọ kụ robianam bọ. Ẹnaan kụ ịngo iyoor ịinya dị ẹmoogh ni ịnyaam dị kotue ni opiemiom ịikpara ariisi. Yoor ropiemi ghan ni ịigbaghanaan ọkpe.

⁵Yoor ronyu ghan ni koler tọrobo ịyaar lọ awe ogim osophoghom mọ kolegheri ghan bọ ịlo Ẹnaan. Yoor rọkpaariom ghan ni oomo ịitughian awe kesooromi loor, ẹnaghanan Kraist.

⁶Kụ mem dị nyina memitiom eḍeenaan mọ nyina mesooromi ni loor ẹmadan, pụruku yoor komiigh ọliom ghan oomo awe lọ ọḅaar ẹmhu.

⁷Nyina repogh ghan rạraar kẹmiin ạnyu rꞌạnyu phọ bịn. Oye lọ ragbiighiom ghan mọ ọno ọlo aKraist kụ́bile ọsighe ologhi phọ ọdi omitenom ezue olegheriom mọ yoor ạbuo aKraist aani ni, ịdipho ọdi.

⁸Iini sịen nyina mẹetughian mọ mị maatumaam ịikpo phọ ạmi ạpughan, kụ ilegheri mọ Ọmoogh-we phọ ụngo ịmi ịikpo phọ ịlo ọoneghiom anyina ophoophe, kị́lo oogulemiom anyina. Mị úgbiom mọ mị aḍighi ni ịyaar oghiilom umugholoor.

⁹Kị́kigh esi anyina mụdi mị ụge rịnya phọ ịlo osiphiom anyina ruugu.

¹⁰Awe otue ni ọḅem mọ, “Ạrinya phọ ạPol ạge bọ ẹgbagara ẹpughan, kụ ạri adugh ni oye mem lọ yoor odianaan, ḅịle ẹmhu ílho ḍụghum ọnhu phọ ọdi.”

¹¹Ọdo awe phọ ạbuen phọ kúgbiom ologhi mọ ọgbaranaan odi ni esi ịlo yoor ọge ḍịnya kụ oruom rꞌịlo yoor koḍighi mem lọ yoor odi aani sịphe.

¹²Ịlo ayoor ríḍigh ọḅoph ẹku rꞌạbuphe rooka ghan bọ, ḅịle rꞌọsighe aloor ayoor ọmaam ạbidi. Eḍighi ni elologhi ịdipho bịdi rọsighe ghan bọ ịpe bịdi ogbiighi bọ bịn kọmaaniom loor ạbidi. Bịdi ịyaar róḍighi emuton ọtomaam ghan bịn ọsighenom mọ ịpe ạbuno ẹnighe ni.

¹³Bin ayoor, kụ ọlo yoor róotuma ghan kotenom ọku. Iituma phọ ayoor edi ghan sịphe phọ Ẹnaan ẹkoghoron bọ ịngo iyoor, kụ ẹloghom ni oḍighi phọ ayoor sịphe ogbo phọ anyina.

¹⁴Yoor útenom ọku mụdi nyina íḍighom aani. Yoor kụ ạbuḅel awe dị ọpham bọ ooḅi ọghaaph phọ aKraist oru ịteenyom inyina.

¹⁵Iituma phọ ayoor ítenom iḍigh ẹdi ạbunon awe moḍighi. Yoor oḍuom ghụn ologhi mọ aḍiphoph phọ omeeraam mọ anyina rapoph bọ kẹbughe ni bin oḍighi phọ useenaan bọ ịmi sịphe ogbo phọ anyina.

¹⁶Pụruku yoor kogbi otenom anyina oḍigh aani ịnon areelhe ọghaaph ooḅi ọghaaph phọ ọḅeni awe, bịn ẹmhu oghol kụ ootumaam abin dị ạbunon moḍighi kẹ́tol.

¹⁷Ịdipho ạḍinya iigbia phọ ẹḅem bọ mọ, “Oye lọ rạwa obaga ạtuan ghụn ịpe Ọmoogh-we phọ maḍighi bọ kụ abaga ghan!”

¹⁸Ịdi eḍighi bọ Ọmoogh-we phọ rạloghoma ghan oye lọ dị agbiom mọ ạman ni, kọ́lo ragbiom ghan ologhi mọ ọno ạman ni.