Read abua 2 Bụo ạKorint 3 Bible Online

2 Bụo ạKorint 3 - abua bible

2 Bụo ạKorint 3

¹Ịphen phọ ẹkigh mụdi yoor rootuma kẹn ni ḍụghum? Ẹkpe ọge ịlo ạroozo phọ ayoor oruom anyina ḍụghum? Kụ nyina kụ kẹge ịlo ạroozo phọ ayoor ịdipho ạbunon awe rọwa ghan bọ mọ ọgianaan bụno phọ ḍụghum?

²Nyina rꞌaloor anyina kụ ạḍinya ọghaaphaan phọ yoor ọmoogh bọ. Ọge ḍịnya phọ ạḍien sịphe iloghi phọ ayoor mọ oomo awe ọmiin ọḅile ạal olegheri.

³Oomo awe phọ rọmiin ni mọ nyina kụ ạḍinya phọ aKraist yoor ọsighe bọ oruom aḅirini phọ. Ḍịnya phọ ụ́ge loor eeḅoghoḍi aḍighiigh, ụge ghụn sịphe iloghi phọ awe. Ụ́geom iki, ụgeom ghụn Uwaloor Ẹnaan phọ edi ghan bọ.

⁴Ọdo phọ ọphon kụ oḍuom ologhi phọ yoor ọtuan bọ Kraist ọmoogh esi Ẹnaan.

⁵Ịyaar loor ayoor ílho ọsighe ọḅemom mọ yoor ọman ni oḍighi oḍighi phọ ọphon. Ịpe yoor ọman bọ ịḍua ḍịghaagh Ẹnaan phọ kụ eru.

⁶Ọdi kụ uḍighi bọ iyoor we dị ọman ọghaaph ghan ịlo imoom ịyo phọ ọḅeni awe. Ịko imoom ịyo phọ ụ́koom iilogh dị ọgeeghi oseere. Ịko phọ ịlo aruwaloor. Iilogh phọ ọgeeghi bọ oseere rẹkom ghan ḍuugh, kụ Uwaloor phọ rạngo ghan ghuḍum.

⁷Mem mọ rọngo bọ Ologh phọ ọkaaghi bọ loor iiḅoghoḍi asighiigh phọ, ạḍiḅaal eegu phọ Ẹnaan isoor ri. Ghạlamo ịdipho meḍim bọ ni remineen, bịn aghisigh phọ aMozis ạraphan ni ạphughan dị aweye phọ Ịzirel úmighirom upogh nyọdi ukiririom. Ịyo phọ rẹkom ghan bọ ḍuugh phọ keseere bịn ụsighe ni ḍịḅaal eegu dị eleeny ịdipho kụ oghirom,

⁸kụ ẹghiom ologhi ḍịḅaal eegu ịyo phọ Uwaloor Iigbia phọ aghiran bọ.

⁹Ạḍiḅaal eegu ịyo phọ oghiran bọ kụ awe omuughu ghan bọ bịn ileeny ni ịdipho, kụ ẹghiom ologhi ḍịḅaal eegu ịyo phọ rẹsighe ghan bọ mọ ạbuen awe aruukuan ni.

¹⁰Ọmaar ogbiighi, ạḍiḅaal eegu phọ ogananami bọ mem mọ ọpo phọ ị́man ọmaaniom ạḍinmananmana phọ ạḍien ạnyiidipho.

¹¹Ịpe íbia bọ bịn ạḍiḅaal eegu phọ ileeny ni ịdipho, kụ ẹghiom ologhi ḍịo ạḍiphe kẹtol bọ kꞌagee-pọ phọ.

¹²Oḍuom ologhi phọ ọphon phọ yoor ọmoogh bọ kụ ụngo bọ iyoor ạkpo ologhi ọghaaphom ghan.

¹³Yoor ụ́kigh aani Mozis phọ azua bọ ghisigh phọ ọdi ạmana phọ, ọbo aweye phọ Ịzirel kọmiin ghan bọ dị ạḍiḅaal eegu aghisigh phọ ọdi meḍim remineen.

¹⁴Kụ ạri iloghi phọ ạbidi eḍuughi ni dị tụtu kꞌarodon phọ ni bịn bịdi ạal rịnya igbaany ịyo phọ ạmana ẹnaghanan phọ ozu bọ iloghi phọ ạbidi kőzughuron ni. Rozughuron ghan ạmana ẹnaghanan lọ ozu ologhi oye kọsighe, mem lọ ọdi mạḅophoghan aKraist.

¹⁵Kꞌarodon phọ ni bịn tọrobo amem lọ bịdi ạal Ologh phọ aMozis, ạmana ẹnaghanan phọ ozu bọ iloghi phọ ạbidi odi ni.

¹⁶Amem lọ oye makiton aḍighom Ọmoogh-we phọ kụ ẹdi rozughuron ghan ạmana aghisigh phọ ọdi, ịdipho ạḍinya iigbia phọ ẹḅem bọ mọ, “Ạmana aghisigh phọ aMozis uzughuron mem mọ ọdi makiton bọ aḍighom Ọmoogh-we phọ.”

¹⁷“Ọmoogh-we phọ” sịen ẹkpigh phọ ẹphen, pọ Uwaloor phọ: kụ esi lọ Uwaloor Ọmoogh-we phọ odi, pọ okpetenaan odi aani ni.

¹⁸Ạḍiḅaal eegu phọ ẹḍua bọ esi Ọmoogh-we phọ aḍighi bọ Uwaloor phọ esoorom ni sighisigh oomo phọ ayira ạmana ẹnaghanan phọ úzua bọ rinmeeghi ghan iyira kẹghighemi nyọdi, kụ ạḍiḅaal eegu phọ ọdi loor ayira repogh ghan ọbugh-ọbugh.