Read abua 2 Bụo ạKorint 5 Bible Online

2 Bụo ạKorint 5 - abua bible

2 Bụo ạKorint 5

¹Yira olegheri ni mọ mem dị mozughuron ogbogo phọ ọphon yira orugh bọ, Ẹnaan kiseenaan ni iyira otu dị awe kụ ụ́logh ẹpe kꞌạke mọ orugh kꞌagee-pọ. Ogbogo phọ ọphon rọkaaph ghan bọ, pọ aḍizu ọposo phọ ayira.

²Yira rọḅiphighu ni kọmaagha yogh iboom loor esi dị rịphu bọ iyira mọ ọsighe otu phọ yira kọmoogh bọ ẹpe kꞌạke ozu ukpereghiom iyira.

³Rozu ịduon phọ rukpereghiom iyira bịn kọ́miin mun ẹdaḅa ayira.

⁴Ịduon yira orugh bọ sịen ogbogo phọ ọphon phọ yira rọḅiphighuom ni ẹemor adool phọ ạḍien yira orool bọ. Ụ́ḅem mọ yira rọwa ghan ọkporonaan aruzu ọposo phọ oseere. Yira rọwa ghan ghụn mọ ụkpologhi iyira ḍịphe kꞌạke phọ, ọbo aghuḍum mọ ạminogh ḍịen remugh ghan bọ.

⁵Ẹnaan ighol ịphen phọ kụ ịlhem bọ iyira, ẹngoom Uwaloor phọ ọdi mọ ụmeeranaan iyira enye.

⁶Esi ịduon phọ, yira rọkparami ghan ni iloghi ayira oomo amem. Yira ologhoma ni mọ ịduon yira odimom bọ ni ḍizu phọ ạḍien phọ, pọ yira ọkelan ni kꞌỌmoogh-we phọ.

⁷Kụ ạri ghụn kị́pe rọmiin bọ, omeeraam kụ ratelhiom ghan bọ ghuḍum mọ ayira.

⁸Iloghi phọ ayira ẹkpar ri kụ kịḅeeraan ni iyira ọwile aḍizu phọ ạḍien phọ kụ orughan Ọmoogh-we phọ.

⁹Ịdi ghụn epu oomo phọ ịne, yira rọwa ghan ni ọḅaalami ologhi ọdi mꞌịsien aḍizu phọ ạḍien phọ ni, ḅịle mꞌẹpe kꞌạke,

¹⁰ịdi eḍighi bọ oomo phọ ayira kụ kọmeera ni ghisigh aKraist kụ ọdi aagbo ịiruen ayira ọbo ọtuan oḍighi ọlo oye rꞌoye, igey mꞌịkaraph, sịen aḍizu phọ ạḍien kụ ọngo ịdi ẹkasian.

¹¹Loor oghiilaan Ọmoogh-we phọ, kụ yoor rọkpaariom ghan bọ we. Ẹnaan ilegheri ni iyoor ẹmadan, kụ mị aḍuom ni ologhi mọ nyina ilegheri kẹn ni iyoor sịphe iloghi phọ anyina.

¹²Íḍighi ịdi ẹrol mụdi yoor ọḅile kẹn rootuma ịlo ạroozo phọ ayoor kịḅeni inyina. Eḍighi ghụn ịdi yoor rọwa ghan mọ ịmoogh ẹmhu ịyaar oghol kụ ọlogh ayoor ọman, ọbo nyina erue ẹphanyanaan bụphe rọmiin ghan bọ ḍimite, bịn ẹzo oye phọ rópogh ghan bọ kụ kọsighe ọloghoma.

¹³Mọ iloghi ayoor ị́bomoghan, pọ ighol ẹmhu Ẹnaan. Iloghi ayoor ẹbomoghan, pọ ighol ẹmhu anyina.

¹⁴Ẹphomoghian phọ aKraist ụphomoghian bọ iyoor kụ rirelhiom ghan bọ iyoor sịen yoor molhoghoma bọ mọ oniin oye aghol li oomo awe phọ kụ amugh. Ịduon phọ emeeraam mọ oomo awe phọ ụḅophoghan ni omugh aani ḍuugh phọ ọdi.

¹⁵Ọdi aghol oomo awe phọ kụ amugh bọ, ọbo bụphe odi bọ kọ́tolonaan mun loor ạbidi, kọtolonaan nyọdi phọ bịn amugh bọ kụ oghol bọ ẹmhu phọ ạbidi oḅeton sịphe aḍuugh phọ.

¹⁶Esi ịduon phọ, yoor rọ́sighe mun ịpe aḅirini phọ bịn kophoghom oye. Ghạlamo yoor uphoghom ịduon phọ aKraist mem dị meten, nyịidipho yoor mosoph okpere.

¹⁷Oye phọ raḍighi ghan omoom, mem lọ ọdi mạḅophan aKraist. Igbaany phọ meten, imoom meru.

¹⁸Ẹnaan phọ ẹtuan bọ aKraist kụ ịphomoghi bọ iyira ẹḅile bọ ịngoom iyoor oḍighi ọsighe ghan ạbunon ọphomoghiom ọdi phọ, kụ iḍighi yogh bọ ni oomo ịphen phọ.

¹⁹Ọghaaph phọ ayoor rạḅem ghan mọ Ẹnaan meghol aKraist rẹpomoghian aḅirini phọ. Ẹnaan ị́bal ghan ịkaraph phọ ạbidi iseere. Ḅịle ọdi mạḅogh ịpe ọdi rạpomoghi ghan bọ we phọ ạlogh ḍịghaagh ayoor mọ ọghaaph ghan ọḅeni we.

²⁰Ịduon phọ yoor moḍighi bọ rụukpaany dị ọmeera rọkaaphaan aKraist ẹkigh mụdi Ẹnaan rꞌaloor ọdi kụ ụsighe iyoor rịlhomom inyina mọ ịpomoghian nyịno.

²¹AKraist ịkaraph ólhegheri; Ẹnaan ịtuan iyira kụ ẹsighe bọ nyọdi eḍighi ọrim-onu phọ, ọbo yira ọḅophoghan nyọdi ọmoogh aani ruukuan phọ Ẹnaan.