Read abua 2 Bụo ạKorint 7 Bible Online

2 Bụo ạKorint 7 - abua bible

2 Bụo ạKorint 7

¹Iiḅi asiya, ịduon muguanaan bọ iyira ruguan phọ ịphen, owopha loor ayira ọsighe oomo ịkaraph lọ aruzu phọ rꞌaruwaloor phọ ayira mẹbiphigha, ọrol ghan dọl ọlogh ghan eegu Ẹnaan phọ, kụ ọwaam ghan ịdi yira kookuan oseleman ọmadan!

²Iseenaan iyoor eephooghi sịphe iloghi phọ anyina. Yoor oye úḍighi ịkaraph. Yoor oye ụ́ugughuḍiom. Yoor oye ịlo ikeḍi úḍighi.

³Ịphen mị rạ́kaaph ọnughenom anyina ẹka. Ịdipho mị mạḅem bọ ni, nyina ẹkan ni iloghi ayoor iboom dị mꞌaḍuugh ni mꞌaghuḍum ni yira kụ odi ni eniin esi.

⁴Mị iḍuom ni inyina ologhi, ạḅile iseerian inyina ọnhu. Esi oomo ịminimiin phọ ayoor, mị ạpamanam ni ạkpo ologhi phọ ạmi. Ologhi ạmi ophaph eele.

⁵Rꞌịdipho yoor ọghi bọ ni osi Masidonia bịn yoor úpooghian ni. Ịminimiin rꞌịruonu ikoom ni ọman rꞌighisigh. Iloghi ayoor rꞌamem ị́po.

⁶Kụ Ẹnaan phọ rẹkparami ghan bọ bụlo iloghi phọ meḅonyonu irom ni Tạitos mọ aru ịlo ọkparamiom iloghi phọ ayoor.

⁷Kéru phọ ạTaitos bịn, ịloghom ni oomo ịlo anyina dị ọdi ạghaaph ụḅeniom iyoor. Ọdi ạghaaph ni ạloghom ịdi nyina ẹkparami ologhi ọdi, ḅịle rꞌịdi nyina remoghi ni ọmiin ạmi, rꞌịdi nyina eloghoma ni ḍịaḅa phọ mị ịḅaam bọ inyina, rꞌịdi nyina ẹkpatian ni ọphel ghan ạmi.

⁸Ghạlamo ịdipho ạḍinya phọ mị ạge bọ eḍighi bọ ni ịyaar dị nyina ekururu yogh phọ, bịn mị rákol li kạḅiphighu. Ọbo mị mụḅiphighu ni mem mọ mị aloghoma bọ mọ nyina ẹtuan ni ḍịnya phọ ạmi rekururu mọony amem mọ.

⁹Kụ nyịidipho ologhi ạmi mạḅaal. Mị ụ́tuan dị nyina ekururu yogh bọ, mị ụtuan ghụn dị okururu phọ anyina maḍighi ịyaar dị nyina melhoghoma ekiton esi ịkaraph phọ anyina. Yoor inyina ịlo ẹekaany íḍighi loor esi dị Ẹnaan mẹsighe okururu phọ anyina ịngoom inyina sụo.

¹⁰Ọdo okururu phọ ọphon rạkom ghan okiton esi ịkaraph phọ, kụ ịyaar oghol ọḅiphighu ílho. Okururu ọlo aḅirini phọ rạngoom ghan ḍuugh.

¹¹Ịmiin rạraar dị Ẹnaan ẹsighe okururu phọ anyina eḍighinom: ḍịdugh dị oḍighi phọ rạdugh, ephiighaam dị nyina repiigha oḍeenaan mọ nyina ị́piom, ọghagh ologhi dị nyina rẹkagham ịkaraph, eegu dị nyina rekiil mọ ḍien ịlo kemite, emoghi dị nyina rimoghiom ịmi, ẹghologhol dị aloor anyina rẹkologhol, rꞌẹliomom dị nyina ẹmeera ọliom ọlo ạpioman. Nyina meḍeenaan mọ rꞌoniin ọkal ọghaaph phọ ọphon dị nyina ẹpioman ólho.

¹²Esi okpere, mị ụ́tuan nyọpo ạpioman bọ ḅịle rꞌọpo ọpioman bọ kụ ạge bọ ḍịnya phọ ạḍiphe. Mị ụge ghụn oḍeenaan anyina ghisigh Ẹnaan mọ nyina iseere ni iyoor ologhi.

¹³Ịphen kụ ịngo bọ iyoor ạkpo ologhi phọ. Kạ́kpo ologhi phọ ayoor bịn, ọḅaal ologhi phọ ạTaitos ạtuan bọ ịdi nyina ẹkparami ologhi phọ ọdi ạmoogh, ạḅaalami aani ni iloghi phọ ayoor.

¹⁴Nyina ịmi íbi esi oomo phọ ịpe mị aatuma bọ ịlo anyina ạḅeni Tạitos. Ịpe yoor ootuma bọ ọḅeni Tạitos emite ni igey eganana, ịdipho oomo ọghaaph phọ mị ạghaaph bọ ịḅeni inyina.

¹⁵ẠTaitos phọ rꞌaloor ọdi bịn ịphomoghian ni inyina apuemi ịdipho ẹrol ghan bọ sịen ọdi mạmiin bọ ịdi oomo phọ anyina esooromi loor, ḅịle rꞌarughuenian rꞌeegu dị nyina ẹlogh nyọdi.

¹⁶Ẹḅaal li ologhi phọ ạmi mọ mị iḍuom ni inyina ologhi ạmadan.