Read abua 2 Bụo ạKorint 9 Bible Online

2 Bụo ạKorint 9 - abua bible

2 Bụo ạKorint 9

¹Ọmaar ogbiighi, mị rịghiom ni inyina ologhi bịn, ọbo ị́kpe dị mị kạge ḍịnya iruom inyina ịlo ạḍighaagh phọ rọlogh bọ kọngo we phọ Ẹnaan odi bọ Judia.

²Mị alegheri ni ephiighaam dị nyina repiigha ọlogh ạḍighaagh kụ mị aatuma bọ ịlo anyina ạḅeni we phọ aMasidonia. Mị ụḅeni ni bịdi mọ bụo asiya phọ odi bọ Ạkaya mọnya ni ọlogh ạḍighaagh kꞌanana phọ ạḍiphe eten bọ. Ookolobian phọ anyina anyu ni ogbogh opol ạbidi ạkiom ghisigh.

³Mị marom bụo asiya phọ ạbuen, ọbo ịpe yoor riitumaam bọ inyina sịen ọghaaph phọ ọphon keḍighi ghan bọ mụdi yoor uroḅologhi ni ookuugh ọnhu ayoor bịn. Kụ ịdipho mị mạḅem bọ ni, mị ameeraam ni mọ nyina reekpomoghi ni inmo phọ anyina.

⁴Iloni iloni, kụ mị ạpham bụo aMasidonia aru asiom kụ inmo phọ anyina ke̋ekpomoghan, umugholoor kusiph ni iyoor — ọlo anyina úkol — esi oḍuom ologhi phọ yoor ịmooghom bọ inyina.

⁵Mị ụtuan ịduon kụ ạatughian bọ mọ ẹkpe ni dị bụo asiya phọ ạbuen koḍia ghan otu ịteeny inyina, ọbo eekpomoghi inmo phọ nyina eguanaan bọ eseere. Bịn mem lọ mị aru asi eekpomoghan ni, ọbo eḍeenaan mọ iḍigh ni iloghi anyina, oye kụ inyina ị́kpaariom.

⁶Ịkiom ologhi ịphen, oye lọ aḅeph ịbam rabugha ghan ịbam; ọlo aḅeph igbogh kabugha igbogh.

⁷Tọrobo oye ạngo ghan ịpe eḍigh bọ ologhi phọ ọdi, kụ́ḅiphighu mụdi ụkpaariom ni nyọdi, ịdi eḍighi bọ Ẹnaan rẹpomoghian ghan nyọpo rạngoom ghan bọ rꞌophooph ologhi!

⁸Kụ Ẹnaan ketue ni ịngo inyina ẹeḍiom epeeliom ịpe ikuom bọ inyina, ọbo nyina ẹmoogh ghan oomo ạraraar phọ ẹbalabalami oomo amem, mụdi epeel ghan ịdi nyina keḍighinom ghan iiḅi.

⁹Ịdipho ạḍinya iigbia phọ ẹḅem bọ mọ, “Ọdi rạ́logh ghan ạaku ọngo ghan arukulom mọ. Iiḅi phọ ọdi rẹtol ghan ni kꞌagee-pọ.”

¹⁰Kụ Ẹnaan phọ rẹngo ghan bọ oḅephom ozo phọ ịizupha rꞌeḍien olhe phọ kịngaani ni inyina ịizupha ọzuph phọ, ẹḅile eḍighi dị kepoph, kụ ẹbughe sụo iiḅi phọ nyina reḍighi ghan bọ.

¹¹Ẹeḍiom mọ anyina kẹbugh ni ọman rꞌighisigh, bịn iiḅi dị kipel inyina oḍighi ílho, ḅịle inmo phọ nyina kịngo ghan bọ iyoor odiighi phọ keḍighi ni dị ịbadi awe kọtuan ọseph ghan Ẹnaan.

¹²Ịphen nyina reekpomoghi bọ epel li oḍighinom iiḅi we phọ Ẹnaan ekuom bọ, ẹloghom ni ḍịbalabala ạḍiseph dị rọngo ghan Ẹnaan.

¹³Iiḅi phọ nyina eḍighi bọ reḍeenaan ghan iiḅi ạroozo phọ anyina kụ keḍighi ni dị ịbadi awe kọlogh eghuan Ẹnaan, mem lọ ọmiin ịdi nyina ẹkuom loor phọ anyina ooḅi ọghaaph phọ aKraist nyina memeeraam bọ, ḅịle rꞌiiḅi phọ nyina esogh bọ osogh phọ eḍighinom bịdi rꞌoomo ạbueri phọ.

¹⁴Ịdipho bịdi kookpomoghan bọ ighol ghan inyina ọoḅereghi, nyina kẹtol li iloghi phọ ạbidi loor ẹeḍiom ighirigiir phọ Ẹnaan mịnma bọ inyina.

¹⁵Itu oghol inmo phọ Ẹnaan anem kétue bọ ẹkaaph ọngo ḍịseph nyọdi!