Read abua Bụo aGaletia 1 Bible Online

Bụo aGaletia 1 - abua bible

Bụo aGaletia 1

¹Mị ạPol otelhedom mọ rꞌoomo iiḅi asiya phọ odi bọ ẹphen, kụ ụge ḍịnya phọ ạḍien riruomaan inyina ạbuo ạsiosi ẹmha kịrokiro phọ aGaletia. Awe kụ ịmi ụ́ma bọ oḍighi otelhedom mọ, ḅịle kẹn mị ụ́sighe ịtooghi awe kụ raḍighinom bọ. ẠJizos Kraist rꞌẸnaan Ọde phọ aḅeton bọ nyọdi sịphe aḍuugh phọ kụ ụma bọ ịmi.

³Ạḍiseph rꞌẹepho kꞌẸnaan Ọde phọ ayira rꞌạJizos Kraist Ọmoogh-we phọ ịrolonaan inyina!

⁴AKraist ạtuan ọtagharan ayira esi ịkaraph phọ ayira sịen ọkaraph ọrugh phọ ọphon, kụ ạnaghanan bọ ịpe Ẹnaan Ọde phọ ayira ẹtooghi bọ, kụ ameera bọ ạkuom loor ọdi phọ ḍuugh.

⁵Igbogh phọ ẹrolonaan Ẹnaan kꞌagee-pọ kꞌagee-pọ! Ẹrol ịdipho!

⁶Eḍighi ni iikia esi ạmi dị nyina mẹnuun ịduon rekel nyọpo ạsighe bọ ọghor phọ aKraist ịmagham inyina, kụ mekiton resoman ọnon ooḅi ọghaaph dị kịphel inyina atene.

⁷Ọbo ọnon ooḅi ọghaaph ólho, kụ mị ụtuan bụnon awe phọ mọgbaragbarami bọ iloghi phọ anyina kụ ọḅile bọ rọwa oonme ooḅi ọghaaph phọ aKraist, kụ rạkaaph bọ ịphen phọ.

⁸Ạghelhe phọ Ẹnaan kameelom ni tọrobo oye, mꞌọnyo ayoor ri, mꞌọokpaany kꞌạke ni, lọ ạghaaph ooḅi ọghaaph dị ạgbatanaan nyọon yoor ọghaaph bọ ịḅeni inyina.

⁹Yoor mọḅem ni mem dị meten, kụ mị mạḅile ạḅem rạkpaariom mọ ạghelhe phọ Ẹnaan kameelom ni tọrobo oye lọ ạghaaph ooḅi ọghaaph dị ạgbatanaan nyọon nyina mẹsighe bọ.

¹⁰Ịphen phọ ẹkigh mụdi mị rạwa ghan mọ awe ụseph ịmi ḍụghum? Eeye. Mị rạwa ghan ḍịseph Ẹnaan. Ẹkigh mụdi mị rạwa ghan mọ awe ulegheri ịmi ḍụghum? Mọ ạḍiseph awe kụ ịḅeeraan ịmi, ọbo mị múḍighi ẹbene aKraist.

¹¹Bụo asiya, ịbile mị ịḅeni inyina ịphen phọ, mọ awe kụ úmitiom bọ ooḅi ọghaaph phọ mị ạghaaph bọ ịḅeni inyina.

¹²Mị ụ́naghan esi oye, ḅịle kẹn oye kụ ịmi ụ́tughemi. ẠJizos Kraist rꞌaloor ọdi ghụn ni kụ agananami ni uḍeenaan ịmi.

¹³Mịḅeni ni inyina ọdo oye dị mị aru mem mọ mị ạdaph ghan bọ eḍighinom ịyaar ạbuo aJu phọ, ịdi mị ighirigiir ụ́nma ghan ọgbiphoghom rꞌịlo ophiemi ạbuo ạsiosi phọ Ẹnaan.

¹⁴Esi ooko eḍighinom ịyaar ayoor ạbuo aJu phọ, mị upu ni ịbadi iigbo ạmi. Mị kụ ụmanami mạar eḍighinom ịyaar ạburude ạburude phọ ayoor apu bụnon.

¹⁵Kụ Ẹnaan ẹtuan ighirigiir phọ ọdi kụ ịsaḅar ịmi kꞌamem dị mị odi ni ọophi kụ ụmagh bọ ịmi.

¹⁶Kụ mem mọ ẹḅeeraan bọ nyọdi ogananami Ọony phọ ọdi oḍeenaan ạmi, ọbo mị ạghaaph ịlo ọdi ạḅeni ruuruen phọ, mị rꞌoye ụ́tol esi ụkaaphan,

¹⁷ḅịle kẹn mị ụ́ki Jeruselem ọmiin ạbuphe moḍighi bọ butelhedom mọ kụ egbi bọ ọteeny aani ạmi. Mị ụghi ghụn ni Arebia, kụ ạḍua arigheel Dạmaskos.

¹⁸Mẹman ni ịraar ạsia kụ mị agbi ọghi aJeruselem ophogh aPita kụ yoor ọrolan ḍioph rꞌoogh aḍughul-otu.

¹⁹Mị ụ́miin ọnon otelhedom, emuton Jems umor Ọmoogh-we phọ.

²⁰Ịphen mị ạge bọ, Ẹnaan elegheri ni mọ mị ọkpe rạ́gba.

²¹Ịphen meten kụ mị ạghiighi rạmha areelhe ạSiria rꞌaSilisia.

²²Kụ oomo phọ amem mọ ạmuen phọ, ạbuo ạsiosi phọ aKraist rạmha kịrokiro phọ aJudia ịmi kụ̋miin ghan ekpeḍien.

²³Bịdi ụnaghan ghan ịdi ạbunon awe ọghaaph ghan mọ, “Oye phọ ụgbiphoghom ghan bọ iyira mạḅile rạḅeni aani we mọ omeeraam igey phọ ịpe ọdi ạwa bọ ophiemi.”

²⁴Kụ bịdi ụngo ni ḍịseph Ẹnaan loor ẹmhu ạmi.