Read abua Bụo aGaletia 3 Bible Online

Bụo aGaletia 3 - abua bible

Bụo aGaletia 3

¹Bụo arolologhi aGaletia! Ạnhian nụun kụ ạpoghoron iloghi anyina? Riḍien nyina ịmiin ni, rụru nyina ịnaghan ni, ịpe aḍuugh phọ ạJizos Kraist sịphe oreeny phọ.

²Eniin ịyaar edi ni dị mị rạwa olegheri esi anyina. Ụtuan ịdi nyina eeko ghan Ologh phọ aMozis kụ nyina ẹmoogh bọ Uwaloor Iigbia phọ ḍụghum? Eeye ịdipho kụ íḍighi bọ. Uwaloor Iigbia phọ isoorom inyina mem mọ nyina mẹnaghan bọ ooḅi ọghaaph phọ ẹḅile ẹsighe ẹmaghami ịyaar.

³Nyina ẹmoogh ḍịen ni ịduon elologhi? Ịduon nyina emiighom bọ Uwaloor Iigbia phọ, ẹkigh mụdi nyina keḍuna yogh kụ eseleman ḍụghum?

⁴Oomo ịminimiin phọ anyina ephe oopho ḍụghum? Mị kạ́kar atue ameeraam.

⁵Ụtuan dị nyina eeko ghan Ologh phọ aMozis kụ Ẹnaan ịngo bọ inyina Uwaloor Iigbia phọ ẹḅile eḍighi yogh ịiḍaany ogbo phọ anyina ḍụghum? Eeye. Kị́dipho. Ịtuan dị nyina ẹnaghan bọ ooḅi ọghaaph phọ kụ ẹsighe bọ ẹmaghami ịyaar.

⁶Ẹkigh ịdipho ạḍinya iigbia phọ ẹghaaph bọ ịlo Ebraham mọ, “Ọdi ameeraam ni Ẹnaan kụ loor esi omeeraam mọ ọdi, kụ Ẹnaan ẹsighe nyọdi mọ oye aruukuan ni.”

⁷Ịduon phọ bịn nyina kelegheri ni mọ awe lọ ọmoogh omeeraam kụ ọkaraghi ạnmuny phọ Ebraham.

⁸Ọge ni sịphe ạḍinya iigbia phọ mọ Ẹnaan ilegheri ni kꞌaḍiodi mọ ọno kạtuan omeeraam kụ ạsighenom ruuruen phọ mọ awe aruukuan ni, kụ ịghaaph ni ooḅi ọghaaph phọ ẹḅeni Ebraham kꞌaḍiodi mọ, “Kọtuan nyịna kụ ọseph oomo areelhe aḅirini phọ.”

⁹Ebraham ameeraam bọ, ụseph ni. Ịduon kụ iḍighi kụ kọseph aani ni oomo ạbulo omeeraam aani.

¹⁰Bụphe oghuraam bọ ooko ghan Ologh phọ odi dọl itulughian, ịdi eḍighi bọ ạḍinya iigbia phọ rẹḅem ghan mọ, “Tọrobo oye lọ ráako ghan oomo phọ ịpe ọge bọ sịphe ạḍinya Ologh phọ, odi dọl itulughian.”

¹¹Ịdi etum sịphe, eganana ni mọ Ẹnaan rẹ́tuan ghan ooko Ologh phọ kụ kẹsighenom mọ ọphon oye aruukuan ni, ịdi eḍighi bọ ạḍinya iigbia phọ rẹḅem ghan mọ, “Tọrobo oye lọ Ẹnaan ẹtuan omeeraam kụ ẹsighe mọ oye aruukuan kạmoogh ni ghuḍum kꞌagee-pọ.”

¹²Kụ Iilogh phọ ị́ḅophan omeeraam, kụ ọlo rẹḅem ghan ghụn mọ, “Oye lọ aako ghan oomo iilogh phọ kạmoogh ghuḍum.”

¹³Ịdipho aKraist aghol bọ ẹmhu ayira aḍigh dọl itulughian phọ, ọdi mụtagharan iyira ḍịghaagh itulughian phọ ịpe rẹdaph ghan bọ bụlo osoroghu Ologh phọ. Ịdipho ạḍinya iigbia rẹḅem ghan bọ mọ, “Tọrobo oye lọ osin loor oreeny kụ oghiigh odi dọl itulughian.”

¹⁴ẠJizos Kraist ạmiinom ịphen phọ, ọbo aruuruen phọ ọtuan nyọdi ọmoogh aani ḍịseph phọ Ẹnaan eguanaan bọ Ebraham, ọbo yira ọtuan omeeraam kụ ọboor aani Uwaloor Iigbia phọ Ẹnaan eguanaan bọ.

¹⁵Bụo asiya, mị kạsighe ịdi yira rọmiin ghan ni kụ ạmaaniom. Mem dị ịyal awe momeeraam gbiririph kụ oghiran ịyo, oye ólho dị kạka ḅịle mꞌọloghom ịnon ịlo ọdi.

¹⁶Ruguan phọ Ẹnaan iguanaan Ebraham rꞌọnyo ẹemara ọdi. Rọ́ḅem ghan mọ, “rꞌạbuo ẹemara ạna,” mụdi aḍita awe ni, rọḅem ghan mọ, “rꞌẹemara ạna,” ịduon phọ pọ oniin oye bịn, aKraist.

¹⁷Ẹmhu ọghaaph phọ ạmi ịduon. Ẹnaan ighiran ni ịyo phọ rꞌEbraham kụ eguan mọ ọno kaako ni. Inya okuron rꞌịraardi ạsia meten ni kụ aMozis ạngo bọ Ologh phọ. Iilogh phọ ịphen kétue ẹka ịyo phọ, ḅịle égbuurogh ịpe Ẹnaan eguanaan bọ.

¹⁸Eru mạar dị Ẹnaan ẹtuan ooko ghan Ologh phọ aMozis kụ rẹngo ghan bọ ḍịseph phọ, pọ rẹ́tuan mun ịpe ọdi aguanaan bọ. Kụ ạri ghụn Ẹnaan ịtuan oguan phọ kụ ẹngo bọ Ebraham ḍịseph phọ.

¹⁹Ụtuan ika kụ ọloghoḍi bọ Ologh phọ? Ụḅaram Ologh phọ, ọbo awe olegheri ịyaar dị ọpioman aru, kụ ụwa mọ ẹrol li tụtu ẹteeny mem mọ ọnyo ẹemara phọ Ebraham, ọpo aḍighi bọ ẹmhu oguan phọ, katu bọ. Ạruukpaany phọ Ẹnaan kụ ụḅogh bọ Ologh phọ ọlogh ḍịghaagh oye dị ạmeera enye ọsighe oruom awe.

²⁰Kụ Ẹnaan isomoghi ni Ebraham kụ ẹngo bọ oguan phọ. Oye ómeera enye.

²¹Ịphen phọ emeeraam mọ Iilogh phọ ẹgbagharan ni ịpe oguanaan bọ ḍụghum? Eeye. Kị́dipho. Kụ eru mạar dị modoghoḍi iilogh dị kẹngo we ghuḍum, ọbo Ẹnaan mẹtuan iilogh phọ ẹsighenom mọ ọphon oye aruukuan ni.

²²Kụ ạḍinya iigbia phọ mẹḅem mọ oomo aḅirini phọ odi edoghola ạsipioghom, pịdi bụlo omeeraam ọmoogh ḍịseph phọ Ẹnaan eguanaan bọ bụphe omeeraam bọ Jịzos Kraist.

²³Mem mọ aKraist kőru bọ, Ologh phọ kụ ukpophonom iyira akoriom ghan mem dị kogananami nyọpo yira komeeraam bọ.

²⁴Kụ Ologh phọ kuphogh iyira, uromoghiom ghan iyira tụtu aKraist aru bọ, pịdi Ẹnaan ẹtuan omeeraam ẹsighenom mọ yira awe aruukuan ni.

²⁵Sịen ọrugh phọ ọphon yira momeeraam bọ Kraist, Ologh phọ kụ iyira rúphogh mun.

²⁶Mọtuan omeeraam oomo phọ anyina bịn nyina ẹḅophoghan rꞌạJizos Kraist eḍighi nmụny Ẹnaan.

²⁷Miwurogh inyina mụum ọsighe anyina ọḅophoghiom aKraist, kụ nyina mẹmooghogh rọozo phọ ọdi.

²⁸Ọgbaranaan ólho mun ogbo ạbuo aJu rꞌaruuruen, rẹbene rꞌạbuo ade, nmạriir rꞌalephiri. Nyina mẹḅophoghan Jịzos Kraist eḍighi nyoniin oye.

²⁹Kụ nyina eru ni bụo aKraist, pọ nyina kụ ạbuo ẹemara phọ Ebraham dị kẹmoogh ḍịseph phọ Ẹnaan eguanaan bọ.