Read abua Bụo ạEfesos 2 Bible Online

Bụo ạEfesos 2 - abua bible

Bụo ạEfesos 2

¹Mem dị meten, aruwaloor phọ anyina imuughu ni loor esi ạsipioghom rꞌịkaraph phọ anyina.

²Mem mọ ọpo phọ, nyina ịphamanam ghan ịkaraph areten aḅirini phọ. Nyina ịnaghanan ghan uwo ẹmhu ịkaraph aruwaloor ookuugh phọ, uwaloor phọ ọpo rapogh bọ bụphe rọ́naghanan ghan bọ Ẹnaan.

³Oomo phọ ayira ụḅophan ni bịdi ọdaph ghan ịkaraph ạruuphua phọ, ọsighe ghan loor ayira rꞌịitughian ayira oḍighinom ịlo ịḅeeraan iyira. Yira ụkpe aani ni ịdipho ạbunon ọmiinom ạghelhe phọ Ẹnaan.

⁴Kụ ọnma ighirigiir phọ Ẹnaan ẹpughan ni, ḅịle ẹphomoghian phọ ọdi ụphomoghian bọ iyira ẹbugh ni,

⁵dị tụtu, ịdipho aruwaloor phọ ayira emuughu bọ ni loor ọḅaar ẹmhu phọ ayira, ọdi ụḅophoghiom ni iyira Kraist aḅerion sịphe aḍuugh phọ. Ụtuan ọnma ighirigiir phọ Ẹnaan, kụ mịphel bọ inyina otene.

⁶Ịduon yira mọḅophoghan bọ Jịzos Kraist, Ẹnaan miḅerion aani iyira mọ yira rꞌọdi kụ ọda ẹpe kꞌạke phọ ọdi odi bọ.

⁷Ọdi aḍighi ịphen oḍeenaan kꞌagee-pọ ọbalabala ọghor phọ, ịdipho ạtuan bọ Jịzos Kraist ụphomoghian iyira.

⁸Kụ Ẹnaan ịtuan omeeraam mọ anyina kụ mẹnma bọ ighirigiir ịphel inyina etene. Kéḍighinom ịyaar anyina. Ẹnaan kụ inmoom inyina. Ịyaar ọtuan obaga ílho.

¹⁰Ẹnaan kụ ịlhem bọ iyira. Ịduon yira mọḅophoghan bọ Jịzos Kraist, ọdi mụngo iyira kumoom aghuḍum oḍighinom igey iiḍighi phọ ọdi useenaan bọ iyira mọ oḍighi phọ.

¹¹Nyina aruuruen. Bụo aJu phọ kụ inyina ị́maraghi. Ịkiom ologhi dọl phọ nyina ẹrol bọ mem dị meten. Ạbuo aJu phọ righol ghan inyina mọ aruuruen, ịdi eḍighi bọ nyina réḍuna ghan, ịdipho ạbidi — kụ ạri oḍuna phọ ạbidi eḍighi ni osoph oodu phọ bịn.

¹²Mem mọ ọpo nyina ịkelan ni Kraist. Nyina iḍighi ruuruen, kụ ị́moogh dọl sịphe ạbuphe Ẹnaan ẹsaḅar bọ ẹseph. Nyina ípin aani bin ạraraar phọ ịpe Ẹnaan eguanaan bọ sịphe ịyo phọ oghiran yogh bọ. Nyina ịrol ghan ni sịen aḅirini phọ bịn, oḍuom ologhi ị́moogh, ḅịle kẹn Ẹnaan ílegheri.

¹³Nyina ịkelan ni, kụ nyịidipho Ẹnaan mẹtuan ịḅaal phọ aKraist iḍighi inyina okpom ọmur rꞌạJizos Kraist etuman nyọdi.

¹⁴Ịdipho aKraist ạḅophoghi bọ bụo aJu phọ rꞌaruuruen phọ aḍighi buniin awe, ọdi muruom iyira ẹepho. Mạsighe loor phọ ọdi alereghiom iikpe phọ ịpe esophoghom bọ bịdi kụ eḍighi bọ ịdi bịdi ọrol dọl ẹpomoghian,

¹⁵ịdipho ọdi mạagbirion bọ ịtooghi rꞌịinua Iilogh ạbuo aJu phọ. Ịphen phọ, ọdi aḍighi ịlo ọḅophoghi ạbuo aJu phọ rꞌaruuruen phọ oḍighi abuniin abumoom awe, dị mọḅophoghan rꞌọdi odianaan dọl ẹepho.

¹⁶Aḍuugh egbo phọ aKraist sịphe oreeny phọ mephiemi mụlogh-ḍien phọ ạmuphe phọ. Ịsiphe oreeny phọ kụ ẹdi ọdi ạḅophoghi bọ bịdi aḍighi buniin kụ maḅulemi bọ bịdi ḍịghaagh Ẹnaan.

¹⁷Kụ aKraist aru bọ ạghaaph ooḅi ọghaaph ẹepho phọ ạḅeni oomo awe — rꞌanyina aruuruen phọ ẹkelan bọ ni Ẹnaan, rꞌạbuo aJu phọ otuman bọ ni nyọdi.

¹⁸Esi aKraist kụ ẹdi oomo phọ ayira, bụo aJu rꞌaruuruen, ọḅoph bọ oniin Uwaloor Iigbia phọ kụ ọmoogh bọ eepoogh oru aghisigh Ọde phọ.

¹⁹Loor ịphen phọ, nyina káruuruen mun; ḅịle kẹn nyina káwe ẹphiigha mun. Nyịidipho nyina ạbuo arisigh rꞌaweye phọ Ẹnaan, eḍighi bụo eghunotu ọdi.

²⁰Nyina kụ otu dị omiigh sịphe abutelhedom mọ ạJizos rꞌariil phọ Ẹnaan ophighi bọ kụ ọlogh rọkiom. ẠJizos Kraist rꞌaloor ọdi kụ ẹko ogbo phọ.

²¹Ọdi kụ ạpham bọ rạghaagh otu phọ rạkparami ghan, ịdi otu phọ kapoph aḍighi otu iigbia dị kọtol ghan ọoḅereghi Ọmoogh-we phọ.

²²Ịduon nyina mẹḅophoghan bọ Kraist, mịḅaram inyina oomo ạbueri phọ rọloghom otu Ẹnaan dị Uwaloor Iigbia phọ katugh.