Read abua Bụo ạEfesos 4 Bible Online

Bụo ạEfesos 4 - abua bible

Bụo ạEfesos 4

¹Esi ịphen phọ, mị ọnyo-ikoli Ọmoogh-we phọ ịḅeni ni inyina rạkpaariom mọ ịtol dọl dị ẹgbaanyan ḍịphe Ẹnaan eseere bọ mem mọ ọdi ịmagh bọ inyina.

²Isooromi ghan loor, ẹphoomi ghan loor, ẹmoogh ghan ọkparam oomo amem. Ịmoogh ẹphomoghian, oniin ạminoghom ghan ịkaraph oniin!

³Ịkparami ḍịghaagh, ẹmaar ẹpham ọḅoph ọnhu phọ Uwaloor Iigbia phọ rạngo ghan bọ, loor ẹepho phọ ẹpe ịḅar bọ inyina ẹḅophoghi.

⁴Edi bọ ḍiniin aloor, oniin Uwaloor, ịdipho Ẹnaan mịmagh bọ inyina ophin abin oniin oḍuom ologhi phọ.

⁵Edi bọ oniin Ọmoogh-we, rꞌoniin omeeraam, oniin owur ạmuum,

⁶eniin Ẹnaan, Ọde oomo ayira, dị ạda oomo ayira, ạsighe ghan oomo ayira raḍighinom oḍighi phọ ọdi, atugh loor oomo phọ ayira.

⁷AKraist ạtuugh ni ruunmo ẹeḍiom mọ ọdi kụ raanmo ghan tọrobo ọnyo ayira.

⁸Ịduon kụ ịdi ạḍinya iigbia phọ ẹḅem bọ mọ, “Mem mọ ọdi agheel bọ kꞌạke phọ, ạphamam ni ḍita ạbuo ikoli kụ aanmo ruunmo weye.”

⁹Ịduon phọ ọḅem bọ mọ “ọdi akeel kꞌạke phọ” emeeraam mọ ọdi ạphur ri ạḍua kꞌẹpe kꞌạke kụ aru bọ asi kꞌeekuna ade phọ.

¹⁰Ọpo phọ aru bọ kụ ọpo phọ ạkel bọ ni agheel ẹpe ạnyu ạsike phọ, ọdo kemuzeḍi oomo ariisi.

¹¹Ọdi kụ aanmo bọ we ruunmo phọ, ạma buniin oḍighi abutelhedom, buniin ọghaaph ghan ịpe Ẹnaan egananami bọ, buniin ọghaaph ghan ooḅi ọghaaph phọ, buniin ophogh ghan ạbuo ạsiosi phọ, buniin ọtughemi ghan ịtughemi.

¹²Ọdi adiighi ịduon phọ ọloghonaan ạḍighaagh we phọ Ẹnaan mọ oniin aḍighi ghan nyoniin iiḅi ḅịle rꞌọoneghiom ophophe ạbuo ạsiosi phọ aḍighi bọ loor phọ aKraist,

¹³pịdi ạmuḅoph phọ oomo phọ ayira ọḅoph bọ aphoph tụtu yira oḍighi nyoniin esi omeeraam mọ rꞌolegheri Ọony phọ Ẹnaan, pịdi aḍiphoph phọ ayira ẹman aani ọkaraghi ẹrolom mọ aKraist.

¹⁴Bịn yira kọ́tol mun ịdipho ịbam ạnmuny dị ạmuum oologh rakilom, ḅịle kẹn ookuugh ịtughemi kịrokiro aweye ikeḍi rꞌiikeleghian amabi rạpiphoghom.

¹⁵Yira ọrol ghụn ni dọl ẹphomoghian kụ ọgba ghan igey phọ, pịdi yira ophoph ooleeny Kraist sịphe oomo areten aghuḍum mọ ayira.

¹⁶Ọdi kụ ẹmhu phọ repogh bọ oomo ariisi aloor phọ. Ạriikpigh-onu phọ kụ ịpham bọ oomo ariisi aloor phọ ẹgbiphighemi. Kụ mem dị ẹkpigh kịrokiro phọ reḍighi ni oḍighi phọ ọdi, oomo phọ aloor phọ repophom ghan ni ẹphomoghian kẹmoogh ịnyaam.

¹⁷Esi aḍien Ọmoogh-we phọ, mị rạḅem ni kạkpaariom mọ kẹ́tol mun dọl ạbuo aruru phọ ịitughian ụ́moogh bọ,

¹⁸bụphe iloghi phọ meḍiku bọ ufiri phọ. Bịdi ụ́moogh bin aghuḍum mọ Ẹnaan rẹngo ghan bọ, ịdi eḍighi bọ bịdi eekuna elologhi rꞌọḅaar ẹmhu.

¹⁹Eekpoogh umugholoor ạbidi meḅomaan. Bịdi mọkuom loor ạbidi opesi yogh ghan ạtorobo ipesi lọ rẹdaph ghan ẹkaraph ẹphuom.

²⁰Ịpe kụ kị́di nyina ẹtuugha bọ ịlo aKraist.

²¹Tọ nyina mẹkar ri ẹnaghan ịlo ọdi. Ịduon nyina rẹdaph bọ ịgbaranuom aruwol phọ ọdi, mịtughemi ni inyina igey phọ ịpe ạJizos.

²²Ịkporonaan igbaany ạroozo phọ nyina ẹrolom ghan bọ mem dị meten eroph, rọozo phọ ịpe ẹtuan bọ rụuphua amabi kụ rịphue ghan bọ inyina.

²³Iloghi phọ anyina rꞌịitughian phọ anyina eḍighi imoom ẹmadan!

²⁴Ịkpologhian imoom igey ạroozo phọ ọlhem bọ ọghighemiom Ẹnaan kụ eganana bọ esi akugey aghuḍum iigbia phọ aseleman bọ.

²⁵Loor ịphen phọ, ọkpe kẹ́gba ghan mun. Tọrobo oye ạghaaph ghan igey kụ ạḅeni ọnyo asiya ọdi, ịdi eḍighi bọ oomo phọ ayira mọḅophoghan oḍighi nyoniin sịphe aloor phọ aKraist!

²⁶Kụ ịyaar ẹghagh iloghi anyina, kẹ́tuan ghan ịghagh iloghi phọ ẹpioghom sịpioghom. Ịghagh iloghi phọ anyina kị́tol ghan oomo ẹmhu aḍio.

²⁷Rꞌamem rꞌamem kẹ́ngo eepoogh Eru phọ.

²⁸Oye lọ rami ghan imi ạwile imi phọ amiigh igey arukumuan lọ kẹngo ghan nyọdi ịyaar olhe, ḅịle ọdi ạmoogh ghan ịlo ọngaani ạbulo ekuom!

²⁹Ịkaaph ghan ghụn ịlo ẹgbaanyan ọghaaph lọ nyina ẹpham, esi ọloghonaan ạḍighaagh bụphe rọnaghan bọ, pịdi ikpo ọnhu phọ anyina ẹngo ghan bịdi ọninom.

³⁰Kụ kéḍighi ghan ịdi Uwaloor Iigbia phọ Ẹnaan kakururu, ịdi eḍighi bọ Uwaloor Iigbia phọ kụ elegh oḍeenaan mọ Ẹnaan kụ ịmoogh bọ inyina, ạmeera enye mọ aḍio retu ni dị Ẹnaan kịtagharan inyina.

³¹Ịkporion rạghaagh iloghi eghiḍim, rꞌẹḍim, rꞌịghagh iloghi, rꞌomoogha yogh, rꞌiitunyan, rꞌoomo ịitughian ạmulogh-ḍien.

³²Pạ ogbo phọ anyina, ịmoogh ghan igbiririph, ẹnma ghan ighirigiir, ẹsar ghan ịkaraph ẹwilenaan, ịdipho Ẹnaan mẹtuan bọ Kraist ẹsar ịwilenaan inyina.