Read abua Bụo aFilipai 1 Bible Online

Bụo aFilipai 1 - abua bible

Bụo aFilipai 1

¹Mị ạPol rꞌaTimoti, bụo oḍighi phọ ạJizos Kraist, kụ ụge ḍịnya phọ ạḍien rotuomaan oomo phọ anyina aweye phọ Ẹnaan edi bọ Filipai kụ mẹḅophoghan bọ Jịzos Kraist, ḅịle rꞌabupoghom ạbuo ạsiosi phọ rꞌạbuphe ọsaḅar bọ oseere mọ ọloghonaan ghan ḍịghaagh bụo ạsiosi phọ.

²Ạḍiseph rꞌẹepho kꞌẸnaan Ọde phọ ayira, rꞌạJizos Kraist Ọmoogh-we phọ, ịrolonaan inyina!

³Mị rạngo ghan ni ḍịseph Ẹnaan phọ ạmi tọrobo amem lọ mị ịitughian inyina.

⁴Kụ tọrobo amem lọ mị aghol oomo phọ anyina esi ịiḅereghi, mị rạaḅereghiom ghan ni rꞌọḅaal ologhi,

⁵loor esi ọloghonaan ạḍighaagh phọ nyina ẹtuan bọ ooḅi ọghaaph phọ ịloghonaan ịmi kꞌemiighom mọ kụ ẹteeny bọ kꞌạnyiidipho.

⁶Kụ mị ạḅile kẹn ni ameeraam ni mọ Ẹnaan ọpo amiigh bọ ogey oḍighi esi anyina kaḍighi ni ạmadan kụ ẹteeny ḍio phọ ạJizos Kraist katu bọ.

⁷Ẹkpianaan ni dị ịphen phọ kiroor ịmi ịduon phọ, ịdi eḍighi bọ oomo anyina ẹkan ni ologhi ạmi. Nyina rꞌạmi kụ idian ni ọghor phọ Ẹnaan ịngo bọ ịmi, nyịidipho mị odi bọ ikoli phọ rꞌamem mọ mị ạmoogh bọ ni eepoogh ọghaaph ọphelom rꞌọkparamiom ooḅi ọghaaph phọ.

⁸Ẹnaan elegheri ni mọ mị rạkaaph ni igey mem dị mị ạḅem mọ ẹphomoghian phọ mị ịphomoghian bọ inyina ịḍua esi ạJizos Kraist kụ eru bọ.

⁹Mị rạaḅereghi ghan ni mọ ẹphomoghian phọ anyina ephoph ni ẹghiom ghisigh ẹḅaram olegheri ịyaar rꞌọoḅeghion ghan ịlo eḍighi ogey ọoruen,

¹⁰ọbo nyina erue ghan ẹson ghan ịpe eru bọ igey, ẹḅile ẹmoogh ịser-sẹr iloghi, ịyaar inyina kị́biph tụtu ẹteeny ḍio phọ aKraist katu bọ.

¹¹Mọ aghuḍum anyina amuum onugu iimuma aruukuan phọ, ịpe ạḍighaagh phọ ạJizos Kraist, pịdi awe ọtuan oboom ghan igbogh phọ Ẹnaan.

¹²Bụo asiya, mị rạwa mọ ilegheri mọ ịphen phọ imiteghunaan bọ ịmi mẹkaraghi ghụn ẹloghonaan ooḅi ọghaaph phọ ḍịghaagh ọghi aghisigh.

¹³Esi olegheriom, oomo ạbuo ẹgham mọ rokori ghan bọ uwo ẹmha phọ aRom rꞌoomo ạbueri phọ olegheri ni mọ mị ụtuan ẹmhu aKraist kụ odi bọ ikoli phọ.

¹⁴Ạdol ikoli phọ ạmi mẹbughe iboom oḍuom ologhi ogbogh opol ạbuo asiya phọ esi Ọmoogh-we phọ, dị bịdi mọmoogh ạkpo ologhi dị ạmanam rọkaaphom ọghaaph phọ Ẹnaan, dị oghiilaan úlho mun.

¹⁵Mị alegheri ni mọ buniin ạbidi ọsighe mụlogh-ḍien rꞌịruonu kụ rọkaaphom bọ ịlo aKraist, kụ buniin ọsighe ni igey ịitughian kụ rọkaaphom.

¹⁶Bụen phọ ụtuan ẹphomoghian, ịdi eḍighi bọ bịdi olegheri ni mọ ọrol ịsien ọkuami ọghaaph ọphelom ooḅi ọghaaph phọ kụ oḍighi phọ Ẹnaan ịngo bọ ịmi oḍighi phọ.

¹⁷Bụeri phọ ụ́sighe ophooph ologhi, ọsighe ologhi iipikian, kụ rogbeelom bọ ịlo aKraist. Bịdi rogbi ghan mọ bụno koḍighi dị ịminimiin phọ ạmi kẹbugh sịen mị odi bọ ikoli phọ.

¹⁸Keḍighi eeghe? Ịlo eḍighi eḍighi, mꞌogbi igey mꞌịkaraph, pọ ẹḅaal li ologhi ạmi loor esi dị rọkaaph bọ ni ooḅi ọghaaph phọ aKraist. Kụ kẹḅaal ghan ni ologhi ạmi,

¹⁹ịdi eḍighi bọ mị alegheri ni mọ, ịdipho nyina eghol ghan bọ ẹmhu phọ ạmi rẹeḅereghi, ḅịle rꞌọloghonaan ạḍighaagh phọ ạḍua bọ esi ạJizos Kraist kụ aru bọ, kụtagharan ni ịmi.

²⁰Ịdi mị rạwa kạkpaariom rꞌoḍuom ologhi ạmi ịduon, mọ mị rꞌamem kụ́bile ghan oḍighi phọ ạmi, oomo amem rꞌọkaraghi ạnyiidipho phọ mị ụmoogh ạkpo ologhi dị ạmanam, ọbo mꞌesi aḍuugh mꞌaghuḍum oomo ologhi ạmi aaphughemi Kraist.

²¹Aghuḍum mọ pọ eeghe? Aghuḍum mọ esi ạmi pọ aKraist, kụ aḍuugh kụ ịmoogh sụo epu.

²²Kụ eru mạar dị arukumuan phọ ạmi sịen mị odi bọ rapooghu kemuum ni igey iimuma, pọ mị ụ́kar ulegheri bin lọ ạkpe ophin.

²³Abin ophin phọ ụkparanaan ni ịmi. Omugh ọghi ọrolan aKraist kụ abin dị ạnighe ghụn iboom ophin.

²⁴Kụ loor ạrumhu phọ anyina, aghuḍum mọ kụ ạmoogh ịyaar oḍighinom.

²⁵Oḍuom ologhi phọ ọphon kụ aḍighi dị mị alegheri bọ mọ mị kạtol li ạloghonaan ḍịghaagh dị omeeraam oomo phọ anyina kạki ghisigh rꞌibo,

²⁶ọbo mem lọ mị ạḅile aru ịteeny inyina, nyina eghol iiḅi phọ ạJizos Kraist muḍighi bọ ịmi ẹmoogh iboom iboh esi ạmuḅoph phọ ọdi.

²⁷Ịdi epu pạ, ịtol dọl dị ẹkpianaan we dị momeeraam ooḅi ọghaaph aKraist, ọbo mị aru mị útu, mị ạnaghan ghan ịlo anyina mọ nyina ẹḅoph ni ọnhu ẹmeera ẹkananaam, ẹsighe oniin ologhi rebianaan igey phọ ịpe ooḅi ọghaaph phọ ạḅem bọ.

²⁸Kékiilaan bụmulogh-ḍien phọ anyina. Ịmoogh ghan ạkpo ologhi oomo amem. Ịduon kụ eḍeenaan kꞌẸnaan olegheriom mọ bịdi kope ni kụ nyina ẹkpar epu.

²⁹Mịngo ni inyina eepoogh okumu aKraist, kómeeraam ọdi bịn, ẹḅaram ni ọtuan ẹmhu phọ ọdi ọmiinom.

³⁰Nyịidipho nyina ketue ni iḍighan ịmi eenan ẹgham mọ. Ephẹn kụ egina phọ ẹgham mọ nyina ẹmiin bọ mị eenan ghan bọ kꞌamem dị meten. Egina phọ ni kụ ẹdi mị rabe bọ ni kꞌạnyiidipho, ịdipho nyina ẹnaghan bọ.