Read abua Bụo aFilipai 2 Bible Online

Bụo aFilipai 2 - abua bible

Bụo aFilipai 2

¹Eḍighi ịyaar dị aghuḍum mọ anyina esi aKraist rịngo ghan ni ịnyaam kụ ẹphomoghian phọ ọdi rịidereghi ghan ni inyina, nyina ẹmoogh ni mụḅoph rꞌUwaloor Iigbia phọ, kụ ẹḅile ni ẹnma ghan ighirigiir ẹmoogh igbiririph ogbo phọ anyina.

²Eḍighi ni ịduon phọ, pọ mị rịkpaariom ni inyina mọ iḍighi ịdi ologhi ạmi kạḅaal wororoph kụ yira kọmoogh ghan iniin ịitughian, oniin ạphomoghian nyoniin, ẹḅophoghan eḍighi nyoniin oye sịphe aruwaloor phọ rꞌiloghi phọ anyina!

³Kẹ́sighe ghan ịkaraph iipikian rꞌobaga kụ eḍighinom ịyaar lọ nyina reḍighi. Oniin asooromi ghan loor ạngo nyoniin oomo amem ạsighenom ghan mọ ọphori phọ kụ aḍighi ogey apu nyọdi!

⁴Oniin ạwa ghan ịlo kẹngo sụo nyọori phọ, kị́lo ọdi bịn!

⁵Ịmoogh ologhi phọ ọpo ạJizos Kraist ạmoogh bọ.

⁶Areeghe phọ Ẹnaan imunughan ni loor ọdi, kụ ọdi ọ́otughian mọ, ịdipho ọno aalenyan bọ Ẹnaan, mọ ọno kạsighe ẹekpara ekpeḍien kụ ạtolom.

⁷Ọdi ạsighe ghụn ni rꞌophooph ologhi kụ ạwileghi yogh oomo igbogh phọ ọdi, kụ asoor dọl ẹbene aateneghian amite ịdipho oopho oye.

⁸Ọdi asooromi ni loor ameeraam omugh aḍuugh egbo sịphe oreeny phọ.

⁹Ẹmhu ịduon phọ, kụ Ẹnaan iphoophe bọ nyọdi kꞌẹpe ạnyu, kụ ẹngo bọ nyọdi ḍien phọ epu bọ oomo ịnon asiḍien phọ,

¹⁰ọbo esi oghueni aḍien phọ ạJizos oomo ịlo edi kꞌạke, rꞌịsien ade phọ, rꞌịlo ghuḍum ị́moogh mun, ekpuḍian nyọdi,

¹¹kụ aḍita phọ ọkaaph omitiom mọ ạJizos Kraist kụ Ọmoogh-we phọ ni, okueniom Ẹnaan Ọde phọ.

¹²Loor ịphen phọ, iiḅi asiya ạmi, ịnaghanan ghan ni ịdipho nyina ịnaghanan ghan bọ ịmi mem mọ yira ọrolan bọ. Ẹkar ghụn eḍighi ephigh ọnaghanan ghan nyịidipho mị mịgbatanaan bọ inyina. Ịkparami ni ḍịghaagh ẹḅara oghiilaan eḍighi ịlo ạpeleeny phọ anyina kamunughan.

¹³Ilegheri mọ ịikpo phọ Ẹnaan reḍighi ni oḍighi loor anyina, ọbo nyina ẹnaghanan eḍighi ịpe ẹḅeeraan bọ nyọdi.

¹⁴Oomo ạraraar lọ nyina reḍighi, kégum ghan, ḅịle kẹn kẹ́egbaghanaan ghan,

¹⁵ọbo nyina eḍighi nmụny phọ Ẹnaan dị ookuan oseleman yogh. Ịtol dọl dị ịyaar inyina kị́biph sịphe ogbo ọkulakula aḅirini ịkaraph awe phọ. Ịmu sịphe ogbo phọ ạbidi ịdipho ạḍiḅaal sịen aḅirini phọ,

¹⁶ẹpham ekpophonom ọghaaph aghuḍum mọ. Nyina ẹrol ịduon phọ, pọ ḍio phọ aKraist katu bọ ẹegu-ọman ạmi kẹbugh ni, mọ eghiil aghuḍum mọ ạmi rꞌarukumuan phọ ạmi ípe oopho.

¹⁷Iini komoor ịḅaal aghuḍum mọ ạmi ịdipho amiim, ịlo omuneniom ịyaar aghuḍum mọ ọsighe bọ omeeraam mọ anyina kụ oḍighinom rọngo Ẹnaan. Eḍighi ịdipho, pọ ologhi ạmi ạḅaal li kụ mị ịḅophoghan ni inyina esi iboh phọ ạmi.

¹⁸Nyina phọ kẹn ịḅaalami ologhi ịḅophoghan ịmi esi iboh phọ anyina.

¹⁹Eḍighi ni ogbi ạJizos Ọmoogh-we phọ, pọ mị aḍuom ni ologhi mọ mị katue ni atom Timoti ọnuun oru ọmiin anyina, ọbo ologhi ạmi aphooph mem dị mị alegheri ịlo nyina edi.

²⁰Mị ụ́moogh ọnon oye ọmaaniom ọdi esi oseere anyina ologhi.

²¹Ọdi bịn kụ ạmoogh iniin ịitughian rꞌạmi ḅịle rꞌọkar oseere ologhi esi anyina. Oomo phọ ạbueri phọ mọwile ịpe ạJizos Kraist rọwa ghan ịlo ạbidi bịn.

²²Kụ nyina elegheri ni ịdi aTimoti ạman. Ọdi rꞌạmi odianaan ịdipho ọde rꞌọony kụ rokumuan ghan ịlo ooḅi ọghaaph phọ.

²³Mị rolegheri ịlo ạraraar kịrolonaan ịmi bịn mị ạnuun ni ratom nyọdi oru ọmiin anyina,

²⁴kụ mị aḍuom ni ologhi mọ Ọmoogh-we phọ ameera ni mọ mị rꞌaloor ạmi káabinyemiom oru ọmiin anyina.

²⁵Mị magbiighi amuneni mọ ẹkpianaan ni orom dị Ẹpafroditos katu, ọnyo asiya phọ ayira, ọpo rꞌạmi rokumuan bọ keenan ịlo ooḅi ọghaaph phọ, ọpo nyina ẹlhogh bọ kụ aru bọ ụghianaan ghan ịmi dom mọ.

²⁶Ọdi ạkar ri rạwa ọmiin oomo phọ anyina, ḅịle rẹeḅaghami ni nyọdi iboom rꞌịduon nyina ẹnaghan bọ mọ aloor ọdi ị́nighe phọ.

²⁷Ọkar agey ni, eephina phọ ịkpaariom ni nyọdi iboom dị ạwa ni omugh, kụ Ẹnaan ịnma ni nyọdi ighirigiir. Ighirigiir phọ ọ́nma nyọdi bịn, ịḅaram aani ni ịmi, ọbo mị kameelom ghan bọ ọto dị apelom ọto.

²⁸Loor ịphen phọ, rẹkologhol li esi ạmi mọ ọdi aagborion aru, ọbo nyina ẹḅile ẹmiin nyọdi kụ ẹmoogh ọḅaal ologhi, mị phọ kẹn ologhi ạmi ạḅile asoor aani.

²⁹Ọtuan ịphen phọ, ịsighenom ni nyọdi rꞌọḅaal ologhi ịdipho ọnyo asiya rꞌỌmoogh-we phọ, ẹlhogh ghan eghuan ọdo awe phọ ạbuen,

³⁰ịdi eḍighi bọ esugha ẹnum ọbo ọdi mạtuan oḍighi phọ aKraist amugh, ọ́lhogh ẹekaany ghuḍum ọdi, ẹrol dị ọdi uḍighinaan ghan ịmi oomo phọ ịpe nyina rꞌaloor mítue bọ iḍighinaan ịmi.