Read abua Bụo aFilipai 3 Bible Online

Bụo aFilipai 3 - abua bible

Bụo aFilipai 3

¹Esi okureriom, bụo asiya ạmi, ịmoogh ọḅaal ologhi ạmuḅoph phọ anyina rꞌỌmoogh-we phọ. Ọḅile ọge iniin phọ ịpe mị mạge ghan bọ ị́imor esi ạmi, eḍighi ghụn ịlo ọphelom anyina otene.

²Igona loor anyina esi ạbukaraph awe phọ ọghighogh bọ suogh kụ rọkpaariom ghan bọ ọghaaph oḍuna asiloor phọ ạbidi.

³Yira kụ ụkaraghi ọghaaph bọ oḍuna, kạ́bidi. Yira phọ rooseeny ghan Ẹnaan ruwaloor kụ kọmoogh ọḅaal ologhi esi ạmuḅoph phọ ayira rꞌạJizos Kraist. ẠJizos Kraist bịn kụ ọdi yira robomaam bọ. Oḍuom ologhi phọ ayira ólho aani sịphe osopha oodu ạnyu phọ.

⁴Mọ ịkpianaan ni, ọbo mị phọ aseere bọ ologhi ạkosuan ịko phọ ịphen phọ kụ mubaga. Ọḅem mọ ịphen phọ ẹmoogh ni ịyaar oḍighinom, ọbo ooleeny ạmi mụ́tol,

⁵ịdi eḍighi bọ uḍun ịmi, mem dị mị mạman ọphaanya aḍughul-otu, mị ọnyo Ịzirel li, eghunotu ạBenjamin, ọnyo aHibru dị bụo aHibru kụ ọmar. Ọḅem ịlo ooko Ologh ạbuo aJu phọ, mị ụḅophan otul aFarisi phọ.

⁶Ekpom ạmi ịghologhol li iboom esi oḍighi phọ, dị mị ạgbiphoghom ghan ni bụo ạsiosi phọ. Ọḅem ịlo aruukuan ọnaghanan ịtooghi Ologh phọ aMozis, mị mạar ụ́piom ghan.

⁷Kụ oomo ipẹ mị agbi ghan bọ mọ ạsuo phọ, nyịidipho phọ mị mạmaghami mọ amuphe loor ẹmhu phọ aKraist.

⁸Kị́pe phọ bịn, mị ạmaghami mọ oomo phọ ịdi eekuna amuphe, ịdi eḍighi bọ olegheri ghan ạJizos Kraist Ọmoogh-we phọ ạmi kụ ịmoogh sụo epu. Mị mạtuan ẹmhu phọ ọdi atoḅologhi oomo ạraraar, ọbo aKraist kụ aḍighi sụo phọ ạmi,

⁹ẹrol dị mị ạḅophan nyọdi ạman. Mị ụ́moogh mun ruukuan dị ẹdaph ooko ghan Ologh phọ kụ eru. Nyịidipho mị ạmoogh ruukuan phọ ịpe rọtuan ghan bọ omeeraam aKraist kụ kọngo, ịpe ẹḍua bọ esi Ẹnaan kụ eru. Aruukuan phọ ịpe phọ rẹdaph ghan omeeraam.

¹⁰Ọkar ịdi mị rạwa bọ, olegheri aKraist rꞌologhoma ịikpo oḅetenu esi aḍuugh phọ ọdi, rꞌophin aani abin ịminimiin phọ ọdi, rꞌomugh aani aḍuugh phọ dị amugh bọ,

¹¹ọbo mị ạmoogh aani oḍuom ologhi omugh rꞌoḅetenu phọ.

¹²Mị rạ́ḅem ghan mọ mị mạteeny ịphen phọ, ḅịle kẹn mọ mị maseleman ạman. Mị aḍighi ni rạkiom ghisigh ọmoogh aruunmo phọ, ịdi eḍighi bọ ạJizos Kraist kụ mụmoogh ịmi rꞌaloor.

¹³Bụo asiya, mị ạkaraghi ragbiom mọ mị kọ̋teeny ịphen phọ, kụ eniin ịyaar dị mị raḍighi, owula ịpe meten bọ, kụ ọkparami ạḍighaagh oḍighi ịlo mị kạteeny ịpe edi bọ ghisigh phọ.

¹⁴Mị agbon oghiil osi aḍiigbu phọ ọbo mị ạmoogh ruunmo phọ Ẹnaan ẹtu bọ kụ rịmagh bọ iyira ogheel kꞌạke, loor ẹmhu ịpe ạJizos Kraist uḍighinaan bọ iyira.

¹⁵Oomo phọ ayira mophoph bọ esi aruwaloor ọmoogh aani ogina phọ ologhi phọ ọphon! Kụ ọlo, buniin anyina ẹmoogh ologhi dị ạgbatanaan nyọon phọ, Ẹnaan kẹma ni ịpe eḍighi bọ igey phọ iḍeenaan inyina.

¹⁶Tọrobo ịpe kẹtol bọ, ọpham ni ọkananaam ịtooghi phọ ịpe yira ọdaph bọ kụ ọteeny nyịidipho!

¹⁷Bụo asiya, oomo phọ anyina ịtuughaany ghan ịmi. Yoor mọrol li dọl dị ẹkpianaan ọsighe ghan ọmaaniom. Ịlogh elegh bụphe ọtuugh bọ rọdaph dọl phọ ạḍien.

¹⁸Mị mịḅeni ghan ni inyina ịphen phọ ịbadi amem, kụ mị mạḅile kẹn amoghiom rạḅem mọ ịbadi odi ni dị ạdol phọ ạbidi reḍeenaan ghan mọ bịdi rọgbagharan oomo phọ ịpe ọsighe bọ ḍuugh egbo phọ aKraist loor oreeny phọ kụ rọtughemiom.

¹⁹Eekuna phọ ạbidi kẹtol ooni ạnian ịdi eḍighi bọ ịkaraph ạruuphua kụ ẹmugh ạbidi. Bịdi robagaam ghan rạraar umugholoor. Ịitughian phọ ạbidi ịlo ạraraar ịsien aḅirini phọ bịn.

²⁰Kụ yira ạbuo ọmar phọ kꞌẸnaan ọkparamian ni ukpe rokori ghan Ọpelia phọ ayira Jịzos Kraist Ọmoogh-we phọ kạḍua bọ kꞌạke kụ atu.

²¹Ọdi kạsighe ni ịikpo phọ ịpe ọdi arue bọ ni rạtooghiom kạngo oomo ạraraar anmeeghiom ịḅoria aruzu phọ ayira ạkighemi ḍizu eghuan phọ ọdi.