Read abua Bụo ạKolosi 3 Bible Online

Bụo ạKolosi 3 - abua bible

Bụo ạKolosi 3

¹Ịduon mịḅophoghiom bọ inyina rꞌaKraist oḅerion sịphe aḍuugh phọ, ịwa ghan ọmoogh ạraraar phọ ịpe edi bọ kꞌạke. Ẹpe kụ ẹdi aKraist odi bọ kụ ạtolom ạgada ọdaam mọ ḍịghaagh elhiom Ẹnaan.

²Iseere iloghi phọ anyina esi ạraraar phọ ịpe edi bọ kꞌạke, ẹwile ọotughian ghan ịlo ịsien ade phọ.

³Nyina memuughu ni, kụ aKraist aako ni ghuḍum mọ anyina aseere sịphe Ẹnaan edi bọ.

⁴AKraist kụ ọkaraghi aghuḍum mọ anyina. Ḍio phọ ọdi katu bọ, ọdi kịpham ni inyina atumom esi eegu phọ ọdi.

⁵Esi ịphen phọ, ịpueghi, eroḅologhi ịkaraph ạruuphua aḅirini phọ, olhe ẹmha, iloghi ẹenir, ipesi, ẹsighenom mọ ịpe phọ memuughu. Ephogh-aḍien kẹ́moogh, ịdi eḍighi bọ nyina ẹseph ẹlo ọnon ẹsighenom, pọ nyina mẹsighe eghuan phọ Ẹnaan rẹngo ịkaaghineen ạraraar.

⁶Ạghelhe phọ Ẹnaan kameelom ni bụlo oḍighi ọdo ịkaraph phọ ịphen. Ọdi kasoph ni ịiruen apume bụphe rọḅaar ghan bọ ẹmhu phọ.

⁷Mem dị meten, mem mọ nyina ẹrol aani bọ dọl ạsipioghom mọ, nyina irelhian ghan ọdo awe phọ ạbuen.

⁸Kụ nyịidipho, ikel oomo ạraraar phọ ịphen — ophin ologhi, ịkaraph ạruuphua, ologhi ẹḍim. Ọghaaph ọphuenom aḍien oye rꞌọghaaph ipesi kẹ́kaaph ghan.

⁹Oniin nyoniin ọkpe kụ́gbaam ghan, ịdi eḍighi bọ nyina mẹkporonaan igbaany ịkaraph ạruuphua rꞌạroozo phọ anyina eseere,

¹⁰kụ mẹsighe igey imoom ạroozo ẹkpologhian. Ẹnaan phọ ịngo bọ inyina igey imoom ạroozo phọ kiḍeenaan ghan ni inyina rọozo phọ ọdi oomo amem, ọbo nyina ẹmoogh kumoom ghuḍum dị ạghighom kụphe ọdi.

¹¹Ọtuan ịphen phọ, ọku ólho ogbo phọ anyina. Ạbuo aJu phọ rꞌaruuruen phọ ụ́gbatanaan. Bụlo oḍuna rꞌạbulo odimom oodu, ạriḅila rꞌareelhe ịkaraph awe, rẹbene rꞌạbuo arisigh, ọgbaranaan ólho, loor esi dị aKraist bịn kụ oomo phọ ịdi, ọdi bịn kụ maḍigh iloghi oomo phọ ayira odi.

¹²Nyina kụ awe phọ Ẹnaan. Ọdi ạtuan ẹphomoghian kụ ịsaḅar bọ inyina aḍighi bụo ọdi. Kụ esi ịduon phọ, ịmoogh ẹzo igbiririph rꞌọkparam, rꞌọnma ghan ighirigiir rꞌosooromi ghan aloor rꞌọlogh ghan awe eegu.

¹³Ịminoghom ghan ẹsar ghan ẹwilenaan ịkaraph lọ awe iḍighi inyina. Ịsar ghan ẹwilenaan bụnon, ịdipho Ọmoogh-we phọ mạsar bọ ịwilenaan inyina.

¹⁴Ịdi epu oomo phọ ịphen, oniin ạphomoghian nyoniin! Ẹphomoghian kụ reekpomoghi ghan kẹngo oomo ạraraar ọḅoph ọnhu dị amunughan.

¹⁵Ẹepho phọ ẹpe aKraist kụ eḍighi oye ịigbarion sịphe iloghi phọ anyina! Ẹnaan mịmagh inyina eekpomoghi eḍighi oniin oye ọghelom ẹepho phọ ẹphen. Kụ ịngo ghan ni ḍịseph.

¹⁶Ọghaaph phọ aKraist ạrol li sịphe iloghi phọ anyina, ịngoom inyina ẹeḍiom rꞌolegheri ịyaar! Oniin ạsighe ghan olegheri ịyaar ạtughemiom, aromoghiom ghan nyoniin! Ịmoor ghan sụor aruukuan eboomiom Ẹnaan. Iloghi phọ anyina ẹngo ghan ḍịseph Ẹnaan oomo amem!

¹⁷Kụ tọrobo ịyaar lọ nyina reḍighi, ḅịle mọ ịlo nyina rẹkaaph, ikol ghan ni ḍien phọ ạJizos Ọmoogh-we phọ kụ eḍighi, loor esi dị ọdi kụ rạsighe ghan bọ ḍịseph lọ nyina ẹngo kạghiom Ẹnaan Ọde phọ.

¹⁸Nmạriir ilom, isooromi ghan loor esi aburulhom mọ anyina. Ịphen kụ ịkpianaan bụphe rọdaph bọ ịgbaranuom aruwol Ọmoogh-we phọ.

¹⁹Burulhom, ịpomoghian nmạriir anyina, kémooghaam ghan bịdi.

²⁰Nmụny, ịnaghanan ghan bụrude rꞌaburunhiin phọ anyina esi oomo ạraraar; ịphen kụ ịḅeeraan Ọmoogh-we phọ.

²¹Bụrude, kéḍighi ghan ịlo kepin iloghi ạnmuny phọ anyina, ọbo bịdi kosuuphogh ghan bọ.

²²Rẹbene, ịnaghanan ghan bụrude-otu phọ anyina oomo amem, kámem lọ riphogh inyina ekpeḍien ịlo ọseph anyina bịn. Iḍighinom ghan rꞌophooph ologhi, loor esi dị nyina ẹlogh ni Ọmoogh-we phọ eegu.

²³Iseere ghan iloghi anyina esi ạtorobo ịyaar lọ nyina reḍighi. Nyina reḍighinaan Ọmoogh-we phọ, nyina réḍighinaan we bịn.

²⁴Ilegheri mọ ophin aani abin ạraraar phọ ịpe Ọmoogh-we phọ maseenaan bọ we phọ ọdi, kụ ịikpia phọ ọdi kịkpe bọ inyina. AKraist kụ ọkaraghi Ọde-otu phọ nyina rekumu bọ kẹngo.

²⁵Kụ tọrobo oye lọ raḍighi ghan ịkaraph kạmoogh ni ịikpia dị ẹkasian rꞌịkaraph phọ ọdi. Ẹnaan rẹ́logh ghan oye ịiseeny.