Read abua 1 Bụo ạTesalonika 3 Bible Online

1 Bụo ạTesalonika 3 - abua bible

1 Bụo ạTesalonika 3

¹Ekureriom mọ, yoor útue mun ubigh ekpom kụ yoor oopuruan olegheri ọrol Ạtens

²kụ yoor orom bọ Timoti, ọnyo asiya phọ ayira ọpo rꞌayoor rokumu bọ Ẹnaan kọghaaph ghan ooḅi ọghaaph phọ aKraist. Yoor urom nyọdi oru ọngo anyina ịnyaam, rꞌoromoghiom anyina ịlo omeeraam mọ,

³mọ ọnyo anyina kụ́tuan ịgbiphoghom mọ ịphen úpogh ọman. Nyina elegheri ni mọ ịphen phọ ịgbiphoghom dị Ẹnaan kụ ịgianaan ni iyoor.

⁴Mem mọ yira ọrolan bọ, yoor ịphur ri inyina rụru mọ ịgbiphoghom kemite ni. Kụ ịdipho nyina elegheri bọ ni, ịphen kụ ọkaraghi ịdi memite bọ.

⁵Esi dị mị útue mun ubigh ekpom, kụ mị arom bọ Timoti oru olegheri ịlo omeeraam mọ anyina odi. Mị ughiilaan ni mọ ịdipho oḍighom ịyaar kụ Eru meru ịdeghogh inyina epogh, nyina emeel eḍighanaan, bịn oḍighi phọ ayoor ape oopho.

⁶Kébia aTimoti arigheel bọ ụteeny iyoor, ọdi ụḅeni ni iyoor mọ nyina edi ni ḍiiḅi ạdol dị omeeraam mọ rꞌẹphomoghian phọ anyina ẹkpar ri iboom. Ọdi ạkaaph ni mọ nyina rịitughianam ghan ni iyoor igey oomo amem. Mọ rịphu ni inyina ọmiin ayoor, ịdipho rịphu aani bọ ni iyoor.

⁷Bụo asiya, ịphen phọ mịngo iyoor ạkpo ologhi sịen ịiḅaghami phọ rꞌịgbiphoghom mọ ayoor. Omeeraam mọ anyina kụ ạkparami bọ iloghi phọ ayoor.

⁸Sịen yoor mọnaghan bọ mọ omeeraam mọ anyina esi Ọmoogh-we phọ rạ́kporokporo phọ, pụruku ologhi ayoor mạpho,

⁹ịdi eḍighi bọ nyịidipho yoor kighol li inyina ọseph Ẹnaan. Yoor rọseph ni Ẹnaan phọ ayira esi ọḅaal ologhi phọ yoor ịtuan bọ inyina ọmoogh ghisigh ọdi.

¹⁰Yoor úsoph mem, ḍughul rꞌootaany ọoḅereghi ghan rꞌoomo iloghi phọ ayoor ịlo ọḅile oru ọmiin anyina, rꞌọkparami esi lọ esughanam sịphe omeeraam mọ anyina.

¹¹Yoor rọoḅereghi ghan mọ Ẹnaan Ọde phọ ayira rꞌaloor ọdi, rꞌạJizos Ọmoogh-we phọ ayira, useleminaan iyoor eten phọ ịlo yoor kotu ịteeny inyina.

¹²Mọ Ọmoogh-we phọ ạbughe ẹphomoghian ẹlo oye rꞌoye sịphe ogbo phọ anyina rꞌạbunon awe, tụtu eleeny ịdipho ẹphomoghian phọ ẹpe yoor ịmooghom bọ inyina.

¹³Ịduon kụ ịdi ọdi kạkparami iloghi phọ anyina, ọbo nyina ewopha yogh eseleman risigh Ẹnaan Ọde phọ ayira, mem mọ ọpo ạJizos Ọmoogh-we phọ ayira kạpam bọ we aruukuan phọ ọdi atumom.