Read abua 1 Bụo ạTesalonika 4 Bible Online

1 Bụo ạTesalonika 4 - abua bible

1 Bụo ạTesalonika 4

¹Bụo asiya, esi okureriom, nyina mẹtuugha esi ayoor ọdo ạdol dị nyina ẹrol kụ ẹḅeeraan Ẹnaan. Kụ ḍịen phọ kụ ạdol dị nyina edi ni. Kụ nyịidipho yoor rọlom ni kịkpaariom inyina esi aḍien phọ ạJizos Ọmoogh-we phọ, mọ iḍighi ni ịdi epu ịphen,

²ịdi eḍighi bọ nyina elegheri ni ịpe yoor ọto bọ ịḅeni inyina esi ịikpo phọ ạJizos Ọmoogh-we phọ.

³Ịphen kụ ịdi Ẹnaan rẹwa ghan ḍịghaagh anyina mọ ịtol dọl aruukuan phọ ạḍien. Ịkporion rạghaagh ipesi.

⁴Ẹkpianaan dị tọrobo olephiri ọony kaako loor ọdi kụ alegheri ịlo ophin ạnir dị ịkalaghian kẹ́tol.

⁵Ọdi kúpinom ẹphuom ịdipho ạbuo aruru phọ Ẹnaan úlegheri bọ.

⁶Oye kúten ghan ọman uugbegheḍiom ọnyo asiya ọdi. Ọlo aḍighi ịphen phọ pọ mạphue erugh otu, ạḅile aliom ipeel. Yoor mịḅeni ghan ni inyina ịphen phọ. Yoor ụkuami ni ịphur inyina rụru mọ Ọmoogh-we phọ kạliom ni bụlo oḍighi yogh ọdo ịkaraph phọ ịphen.

⁷Ẹnaan ịmagh iyira ọrol ạdol aruukuan, kạ́dol ipesi.

⁸Esi ịduon phọ, tọrobo ọlo aghel ịphen phọ óghel oye, akel Ẹnaan phọ ịngo bọ inyina Uwaloor Iigbia phọ ọdi.

⁹Ịlo ẹphomoghian asiya, ị́kpianaan mun ọge oruom anyina, esi dị Ẹnaan mịtughemi ni inyina ịlo oniin kạphomoghian ghan nyoniin.

¹⁰Ọkar igey ni, nyina ẹtuugh ni ịduon phọ ẹpomoghian oomo ạbuo asiya phọ odi bọ ẹmha etum ẹmha aMasidonia. Kụ yoor rọlom ni mọ iḍighi ni epuemi sịen.

¹¹Ịtuugha dọl osereghian. Uwo oḍighi alegheri oḍighi ọdi bịn! Ikumuan ghan kụ ẹmoogh ịyaar ole, ịdipho yoor miroma bọ ni inyina.

¹²Eḍighinom ịyaar phọ ẹphen kụ kịngo inyina eghuan ghisigh ạbuphe úmeeraam bọ Kraist, ẹḅile eḍighi dị nyina kẹ́sighe emooph anyina ẹkpasiom bụnon kụ ọmoogh ịlo ikuom inyina.

¹³Bụo asiya, ịḅeeraan iyoor dị nyina kelegheri aani ịlo ạdol ạbuphe momuughu bọ, ọbo nyina kemeelom ghan bọ ọto ịdipho ạbuphe ụ́moogh bọ oḍuom ologhi phọ.

¹⁴Ịdipho yira omeeraam bọ mọ ạJizos amugh ni kụ ạḅile aḅetenu sịphe aḍuugh phọ kụ ịdi yira omeeraam aani ni mọ Ẹnaan ẹsighe, Jịzos retu kẹḅaram ni bụphe omeeraam bọ nyọdi kụ mọnaani bọ rạlha aḍuugh phọ.

¹⁵Ịphen phọ yoor rọtughemi bọ kụ ọghaaph Ọmoogh-we phọ, mọ yira phọ ạbuen kọtol bọ ḍio phọ Ọmoogh-we phọ katu bọ kókiil otenom bụphe mọnaani bọ rạlha aḍuugh phọ.

¹⁶Ạḍiolo kẹtol li, ẹḍogh uwo ẹmhu ạruukpaany phọ kẹlooghi ni, kụ opula ọkuodu phọ Ẹnaan, kụ Ọmoogh-we phọ rꞌaloor ọdi ạḍua kꞌạke atu. Kụ opoor oḅerion bụphe omeeraam bọ Kraist kụ momuughu bọ,

¹⁷kụ ọḅaram oomo phọ ayira kọtol bọ eye phọ mem mọ ọpo kụ ogbi ọḅophoghan onyeene ẹpe okuaḍio phọ ọteeny Ọmoogh-we phọ. Ịduon phọ kụ ịdi yira kọtolan Ọmoogh-we phọ kꞌagee-pọ.

¹⁸Esi ịphen phọ, oniin ạsighe ghan ọghaaph phọ ọphon, kụ ạadereghiom nyoniin!