Read abua 1 Bụo ạTesalonika 5 Bible Online

1 Bụo ạTesalonika 5 - abua bible

1 Bụo ạTesalonika 5

¹Bụo asiya, ị́kpianaan mun ọge oruom anyina ịlo amem rꞌariiḍio dị ịphen phọ kemiteghu bọ.

²Nyina kẹn bịn elegheri ni mọ aḍio phọ Ọmoogh-we phọ katu bọ keḍighi ekperenom ịdipho ọḅa rạki ghan bọ imi ḍughul.

³Mem dị awe rọḅem mọ, “Oomo ariisi mẹphooghi, ḅịle ịiḅaghami ílho,” kụ ekperenom bịn amuphe ạteeny bịdi. Bịdi kókpetenaan, ịdipho ạnir dị mesiom ọmar kụ oghunughun rakun.

⁴Kụ nyina ạbuo asiya phọ ílho dọl ufiri, dị aḍio phọ ạḍiphe keḍighi ekperenom ịdipho ọḅa.

⁵Oomo phọ anyina, ạbuo ẹphalaḅaal rꞌootaany. Yira kạ́buo aḍughul rꞌufiri.

⁶Esi ịduon phọ, yira kụ́naani ghan ịdipho ạbueri phọ, ọsuma yogh ooko loor ayira.

⁷Aḍughul kụ ẹdi awe rọnaani yogh ghan, aḍughul kụ ẹdi amiim rakiigh ghan we.

⁸Kụ yira phọ oḍighi bọ bụo ootaany, ooko loor ayira! Ọkpologhian ghan omeeraam rꞌẹphomoghian ịdipho ạsuoma okorian aloor ayira, kụ ozua oḍuom ologhi ạpeleeny ịdipho eghoony ookpereghiom rụmhu ayira!

⁹Ẹnaan iyira ị́ma ọda ọkaraph ọda ọmiinom ạghelhe phọ ọdi, ẹmha ghụn mọ yira ọtuan Jịzos Kraist Ọmoogh-we phọ ayira kụ ọmoogh pẹleeny.

¹⁰Ọdi aghol ẹmhu ayira kụ amugh bọ, mọ bụlo odi rꞌạbulo momuughu ọḅophoghan ọrolan nyọdi.

¹¹Esi ịduon phọ, ẹkpianaan dị oniin kạkparami ghan ologhi oniin, oniin ạaneghi ghan nyoniin, ịdipho nyina ẹtuugh bọ ni edi nyịidipho.

¹²Bụo asiya, yoor rịlhom ni inyina ọloghoma ạbuphe ọpham bọ iiḍighi sịphe ogbo phọ anyina, bụphe Ọmoogh-we phọ mạma bọ mọ oḍiemiom, ọḅile iromoghiom inyina.

¹³Ịlogh bịdi eboom eegu rꞌeghuan, ẹtuan iiḍighi phọ bịdi ọpham bọ ẹphomoghian bịdi, ẹmoogh ẹepho ogbo phọ anyina.

¹⁴Bụo asiya, yoor rịkpaariom ni inyina mọ ịpur rụru bụo ạrugbogholeer, ẹkparami bụo eepuph, ẹloghonaan ḍịghaagh bụlo modugh, ẹmooghom ọkparam oomo awe phọ.

¹⁵Ọnyo anyina ịkaraph kúḍighi ghan uḅulemian. Oomo amem ịwa ghan oḍighi iiḅi sịphe ogbo phọ anyina rꞌoomo awe.

¹⁶Ịmoogh ghan iboh oomo amem.

¹⁷Késoph ghan mem ọoḅereghi.

¹⁸Tọrobo ịlo ẹrol ịngo ghan ni Ẹnaan ḍịseph. Ịphen kụ ịdi Ẹnaan rẹwa ghan ḍịghaagh anyina, ịdi eḍighi bọ nyina ạbuo kꞌạJizos Kraist.

¹⁹Kéḍime nịan Uwaloor Iigbia phọ.

²⁰Képogh ghan ịmiin esooromi.

²¹Ịiḅeghion ghan oomo ạraraar ephogh, ẹphamanam ịpe ẹnighe bọ,

²²ẹkporion rạghaagh tọrobo ọkal ịkaraph.

²³Yoor rọoḅereghi ghan ni mọ Ẹnaan phọ rịngo ghan bọ iyira ẹepho phọ, ịsighe inyina eḍighi bụo ọdi ẹmadan, kụ eeko ghan uwaloor phọ rꞌologhi phọ rꞌaloor phọ anyina eseere ḍiseleman ạdol, tụtu ẹteeny mem mọ ạJizos Kraist Ọmoogh-we phọ ayira katu bọ.

²⁴Ọpo ịmagh bọ inyina oye rábi ghan, kaḍighi ni ịphen ọdi aguanaan bọ.

²⁵Bụo asiya, ịiḅereghi aani ni ịngo iyoor.

²⁶Ipurunaan iyoor oomo ạbuo asiya phọ eghurughi yogh bịdi.

²⁷Mị ạsighe ḍien Ọmoogh-we phọ kụ righiremi inyina ịyo mọ ịbal li ḍịnya phọ ạḍien ẹḅeni oomo ạbuo ạsiosi phọ.

²⁸Ooḅi ọghor phọ kꞌạJizos Kraist Ọmoogh-we phọ ayira ịrolonaan inyina!