Read abua Josua 11 Bible Online

Josua 11 - abua bible

Josua 11

¹Mem dị aJabin ọdaam mọ aHazor ạnaghan bọ ịphen phọ, ọdi arom ạghiom Jobab ọdaam mọ ạMadon rꞌọdaam ẹmha phọ aSimron rꞌọdaam ẹmha phọ Aksiaf,

²rꞌạraalha ạramha phọ ịpe edi bọ ḍịghaagh ephunom bụphe orughogh bọ ẹpe aroogbolom mọ rꞌẹpe Eḍiiny ạJodan ḍịghaagh esoorom Ọphiiny aGalili rꞌẹpe ade phọ ekpululu bọ, ọku aDor ẹpe erumuḍio phọ remeel ghan bọ.

³Arom ạghiom bụo aKenanait bụo ẹpe erumuḍio phọ remite ghan bọ rꞌẹpe erumuḍio phọ remeel ghan bọ, bụo Ạmorait rꞌạbuo ạHitait rꞌạbuo ạPerezait rꞌạbuo aJebusait ẹpe aroogbolom mọ. Arom ạghiom bụo aHivait ẹpe esoorom bọ ẹpe Eegum ạHermon ẹpe de aMizpa.

⁴Kụ bịdi oḅerenu rꞌoomo awe ẹgham ạbidi. Awe ẹgham mọ ạbidi aḍita ni, dị oḍiza ịdipho ịisaar ọphiiny, rꞌịnam-ạrusu rꞌarughuugh-ude.

⁵Kụ oomo ạbudaam mọ rꞌawe ẹgham mọ ạbidi ọḅophoghan ookpomoghan oru egina esi ẹpe ạrumuum mọ aMerom, kụ ọghi oruphiom ẹgham we Ịzirel.

⁶Ọmoogh-we phọ ạḅeni Josua mọ, “Kákiilaan bịdi. Iḍue ọdo phọ amem mọ ạmuen mị kạngo Ịzirel oomo phọ ạbidi mọ ọze. Nyina keḅonyon ruukum ạrusu phọ ạbidi, ẹḅile ẹsuughi nịan rughuugh-ude phọ ạbidi.”

⁷AJosua rꞌoomo awe ẹgham mọ ọdi ọghi omitenom bịdi ekperenom ẹpe ạrumuum mọ aMerom, kụ ozuom bịdi ẹgham.

⁸Kụ Ọmoogh-we phọ ạḅogh bịdi ạngo we Ịzirel, kụ ọze bịdi, ophorogh bịdi ọghi osiemi kꞌẹpe Ogbogh aSaidon, osiemi ẹpe Misrefot Maim, osiemi ẹpe erumuḍio phọ remite ghan bọ, osiemi kꞌẹpe okol phọ aMizpa kụ ọze bịdi ọmadan rꞌoye úsugheeny.

⁹AJosua ạtuugh ịpe Ọmoogh-we phọ ạḅeni bọ nyọdi aḍighi bịdi, aḅonyon ruukum ạrusu phọ ạbidi kụ ạsighe rughuugh-ude phọ ạbidi aguom nịan.

¹⁰AJosua aḅula ọman mem mọ ạmuphe ạka Hazor kụ ạsighe eḍume elhool ẹgham aghiighom ọolha-ẹmha phọ ạbidi, ịdi eḍighi bọ aHazor kụ ẹkpana ẹmha sịphe areelhe phọ ạbidi.

¹¹Kụ ọsighe elhool ẹgham mọ osomeriom bịdi kụ ọze oomo phọ ạbidi, kụ oomo ạbuphe odi bọ oye úsugheeny, kụ ạsighe nịan ọsu Hazor.

¹²Oomo ạramha ạbudaam mọ ịphen rꞌạbudaam mọ ạbidi, aJosua ạsighe eḍume elhool ẹgham aphiemiom bịdi, ịdipho aMozis otelhedom mọ Ọmoogh-we phọ ạto bọ ạngo nyọdi.

¹³Oomo ạramha phọ ịpe ọsighe bọ ọogha oghoonyom Ịzirel nịan ụ́su; omuton Hazor bịn kụ ẹdi aJosua ạsu nịan.

¹⁴Omuton oomo ạraraar phọ ịpe owum bọ rꞌịnam otu phọ ạbidi bịn kụ ạraraar ịsiphe ẹmha phọ dị Ịzirel ọsighe aani. Bịdi ọsighe eḍume elhool ẹgham ọziom oomo awe ọmadan úsugheeny ọlo rapooghu.

¹⁵Ịpe Ọmoogh-we phọ ạto bọ ạngo Mozis otelhedom mọ ọdi, ịpe phọ kụ ịdi aMozis ạtuugh kẹn ạto ạngo Josua, kụ aJosua ạdaph ịpe phọ kụ aḍighi ghan. AJosua rꞌịyaar ósugheeny esi ịpe Ọmoogh-we phọ ạto bọ ạngo Mozis.

¹⁶AJosua ạsighe oomo ade phọ rꞌaroogbolom mọ rꞌoomo aNegeb rꞌoomo eelhe phọ ẹpe aGosen rꞌẹpe ade phọ esoorom bọ, rꞌẹpe Eḍiiny ạJodan, rꞌẹpe aroogbolom mọ Ịzirel ẹḅaram bọ rꞌẹpe ekpululu bọ;

¹⁷emiigh sịphe Eegum ạHalak ẹghi esiemi ẹpe Idom, ẹsighe esiemi ẹpe Baal Gạd, esiemi Lẹbanon ẹpe ade phọ esoorom bọ ẹpe Eegum ạHermon, kụ ạsighe oomo ạbudaam mọ ạbidi akuphogh ạze.

¹⁸AJosua eenom bụdaam mọ ạbidi ẹgham dị ebia ni.

¹⁹Kụ ẹmha dị rꞌawe phọ Ịzirel ọmoogh mụḅoph ụ́tol, omuton Hivait phọ orugh bọ ẹpe Gịbion. Oomo ạbueri phọ rꞌạbidi eeghi ni rạagham.

²⁰Ọmoogh-we phọ kụ ạkparami bọ iloghi phọ ạbidi ịdi bịdi ọki ozuom ẹgham Ịzirel, ọbo ọze bịdi ophiemi oomo areelhe phọ ạbidi, bịdi kụ́nma bịdi ighirigiir oogulemi bịdi bịn, ịdipho Ọmoogh-we phọ ạto bọ ạngo Mozis.

²¹AJosua ạghi mem mọ ạmuphe phọ kụ aphiemi Anakim mọ ạmadan ẹpe aroogbolom mọ, emiigh Hẹbron ẹghi esi Debir ẹḍua Anab ọghi osi oomo aroogbolom mọ aJuda rꞌỊzirel. AJosua aphiemi bịdi rꞌoomo ạramha phọ ạbidi.

²²Rꞌoniin ọlo Anakim dị osugheeny ẹpe ade phọ awe phọ Ịzirel ọ́rol, omuton ẹpe Gaza, Gạt rꞌẹpe Ạsdod kụ arikpisi dị ẹphurukpu awe osugha.

²³Kụ aJosua ạsighe oomo ade phọ ạbidi, ạdaph oomo ịpe Ọmoogh-we phọ ạghaaph bọ ạḅeni Mozis. Kụ aJosua ạsighe de phọ adiemi we Ịzirel eḍighi ẹlo ạbidi; ọdaph bin mụo eghun rꞌeghun. Kụ ạraagham emuneen, ade phọ ẹpho esi ạraagham.