Read abua Josua 13 Bible Online

Josua 13 - abua bible

Josua 13

¹AJosua mạkpo asiḍughul-otu phọ ọdi mesiom, kụ Ọmoogh-we phọ ạḅeni nyọdi mọ, “Nạ mạkpo, asiḍughul-otu ạna remuneen, kụ ade dị esugha bọ dị kọsighe ẹbugh ni.

²Ḍịen kụ ade phọ esugha bọ: oomo areelhe phọ ạbuo aFilistia rꞌạbuo aGesurait,

³emiigh kꞌaSihor oten bọ kụ ọteeny Ijipt, ẹghi ẹpe ephunom mọ ẹteeny esi ọku Ẹkron, ḍịphe ogbiom bọ ọloghom Kenan; (odi bọ oogh ạbuo ịtooghi ạbuo aFilistia — bụo aGaza, Ạsdod, Askelon, Gạt rꞌẸkron) rꞌareelhe ạbuo Avim;

⁴emiigh kꞌẹpe ạḍighaagh esoorom mọ, oomo ade phọ aKenan rꞌaMiara, ḍịphe etuman bọ Saidon esiemi ẹpe Afek, ẹsighe esiemi ẹpe ọku ade ạbuo Ạmorait,

⁵rꞌade phọ ḍịphe aGebalait rꞌoomo ạLebanon ẹghi esiemi ẹpe erumuḍio phọ remite ghan bọ, ọḍua sịphe Baal Gạd esoorom Eegum ạHermon ọghi osi Eḍighom ạHamat.

⁶Bụo oomo ạramha phọ ẹpe aroogbolom mọ, emiigh sịphe Lẹbanon ẹghi esiemi ẹpe Misrefot Maim rꞌoomo eelhe phọ aSaidon, oomo phọ ạbidi kụ dị mị kaporogh bọ elhor ạnmuny Ịzirel. Ịdi nạ kaḍighi, sạ ẹlhel kụ ạsighe aḍiemiom de phọ we Ịzirel bịdi ọmoogh ạtuugh ịdipho mị ạlogh bọ ologh ạngo nyịna.

⁷Kụ iḍighi, nyịidipho sịghe de phọ ạḍien adiemi esugha arughunughun phọ, ạḅaram rꞌạpakiri eghun phọ ạManase.”

⁸Eghun aRuben, eghun ạGad rꞌạpakiri eghun ạManase mọmoogh ni ẹlo ạbidi, ḍịphe aMozis ạngo bọ bịdi ẹpe ẹḅeenyom ạJodan ẹpe erumuḍio phọ remite ghan bọ, ịdipho aMozis otelhedom mọ Ọmoogh-we phọ ạngo bọ bịdi.

⁹Emiigh Aroer ḍịphe edi bọ oogbom Eḍiiny Anon, rꞌẹmha phọ ẹpe edi bọ sịphe ogbo ọphiiny phọ, rꞌoomo ẹpe ẹyaghagha bọ ẹpe Medeba ẹghi esiemi Dibon.

¹⁰Rꞌoomo ạramha phọ aSihon ọdaam mọ Ạmorait, ọpo ạda bọ Hesbon ẹsighe esiemi ẹpe ọku ade ạbuo Amon.

¹¹RꞌạGiliad ẹghi esiemi ẹpe ọku ade ạbuo aGesurait rꞌạbuo aMaakatait, rꞌoomo ẹpe Eegum ạHermon, rꞌoomo ạBasan ẹghi esi ẹpe Saleka.

¹²Rꞌoomo areelhe phọ ạOg ẹpe Bạsan, ọpo ạda bọ ẹpe Astarot rꞌEdrei (oniin phọ ọdi bịn kụ asugha sịphe ogbo ạbuo aRefaim). Bụen phọ kụ ạbudi aMozis ạkpar bọ apu aphorogh bịdi ạsighiogh.

¹³Kụ awe phọ Ịzirel úporogh bụo aGesurait rꞌạbuo aMaakatait, kụ awe phọ Ịzirel rꞌạbuo aGesur rꞌạbuo aMaaka ooḍikuan ni otughan kꞌarodon.

¹⁴Eghun aLivai bịn kụ eghun dị aMozis ụ́ngaani bin ẹmoogh, loor esi dị ạrikia mọ ịpe ọphophoghi bọ ologhi ạnian ọngo Ọmoogh-we phọ Ẹnaan phọ Ịzirel kụ abin ạbidi, ịdipho dị ạḅeni bọ nyọdi.

¹⁵AMozis ạngo ni bin eghun aRuben, ọdaph iipolo phọ ạbidi.

¹⁶Ọku ạbidi amiigh ẹpe Aroer ẹpe oogbom Eḍiiny Anon rꞌẹmha phọ ẹpe edi bọ sịphe ogbo ọphiiny phọ, rꞌịsiphe oomo arukpu-ogbo phọ etuman bọ Medeba.

¹⁷Ọḅaram rꞌaHesbon, rꞌoomo ạramha ịpe aruku-ogbo phọ: Dibon, Bamot-Baal, Bẹt Baal Mion,

¹⁸Jahaz, Kedemot, Mefaat,

¹⁹Kiriataim, Sibma, Zeret Sahar ẹpe eegbolom eḍiiny phọ;

²⁰Bẹt Pior, Ạsdod-Pisga, Bẹt Jesimot,

²¹Rꞌoomo ạramha phọ edi bọ ẹpe ạḍiyaghaghaany ade phọ rꞌoomo areelhe phọ aSihon ọdaam mọ Ạmorait ọpo ạda bọ ẹpe Hesbon, ọpo aMozis aghiigh bọ ạḅaram rꞌikpolom awe phọ ạMidian, Evi, Rekem, Zur, Hur rꞌaReba. Bụen kụ ạnmuny aSihon ọdaam mọ dị orughogh sịphe ẹmha phọ.

²²Bẹlam ọony phọ aBior oyil ịmiin phọ, ọdi oniin esi aḍita ạbuphe awe phọ Ịzirel ọze bọ.

²³Ọku ade eghun aRuben, Ọphiiny ạJodan. Sịphe ọku phọ ọpo kụ abin ẹmoogh ẹlo eghun aRuben, ọto atum ọto, rꞌạramha phọ ịpe edi bọ ẹpe, igbogh rꞌịbam.

²⁴AMozis ạngo ni bin ẹmoogh eghun ạGad, ọdaph ropolo phọ ạbidi.

²⁵Ọku ạbidi aJazer rꞌoomo ạramha phọ ạGiliad rꞌạpakiri ade phọ ạbuo Amon ạghi asiemi Aroer oten kụ ọteeny Raba;

²⁶Ẹḍua sịphe Hesbon ẹghi esi Ramat Mizpe rꞌaBetonim, ẹḍua ẹpe Mahanaim ẹghi esi ẹpe ọku aDebir.

²⁷Ẹsighe ẹghi Eḍiiny ạJodan esi Bẹt Haram rꞌạBet Nimra rꞌaSukot rꞌaZafon rꞌịpheri phọ ạramha phọ aSihon ọdaam mọ aHesbon kụ ọku ạbidi, ẹghi esi ẹpe eekuna Ọphiiny aGalili ẹpe ḍịeri phọ ạḍighaagh ạJodan, ẹpe erumuḍio phọ remite ghan bọ.

²⁸Ẹphen kụ ẹmoogh ẹlo eghun ạGad, ọto atum ọto, rꞌạramha phọ ịpe edi bọ ẹpe, igbogh rꞌịbam.

²⁹AMozis ạngo ni bin ẹmoogh ạpakiri eghun ạManase, ọdaph iipolo phọ ạbidi.

³⁰Ọku ạbidi amiigh kꞌẹpe Mahanaim asiemi oomo ạBasan, oomo areelhe phọ Ọdaam Ọg ạBasan, rꞌoomo odiinydi ạramha phọ aJair edi bọ ẹpe Bạsan,

³¹rꞌạpakiri ạGiliad rꞌAstarot rꞌEdrei, ạramha rꞌareelhe ạOg ẹpe Bạsan. Nyẹen ụngo oolemi-odi ọophi kꞌaMakir ọony phọ ạManase, bụo ọto rꞌopolo.

³²Ịphen kụ ạramha phọ aMozis adiemi bọ ịlo ẹmoogh phọ ẹpe ạḍiyaghaghaany ade phọ ạMoab, ẹpe ẹḅeenyom ạJodan, matuman aJeriko ẹpe erumuḍio phọ remite ghan bọ.

³³Kụ eghun nyẹpe kꞌaLivai aMozis ọ́ngo bịdi bin ẹmoogh. Ọmoogh-we phọ Ẹnaan phọ Ịzirel kụ abin ẹmoogh ẹlo ạbidi, ịdipho dị ạḅeni bọ bịdi.