Read abua Josua 2 Bible Online

Josua 2 - abua bible

Josua 2

¹AJosua ọony phọ ạNon ạḅeni ịyal awe mọ ọḍua sịphe arugbogo ẹpe Akasia ọghi ịlo ịbooghian ọwaaghi ọmiin de phọ aKenan kụ ọkaraghi oḅiligha ẹmha phọ aJeriko. Rọghi rosi ẹmha phọ kụ bịdi ọghi kụ oḍigh kꞌoniin oliom-ẹmha ạnir dị oghol mọ aRehab, kụ ọrol sịphe kꞌọdi.

²Kụ ọghi ọghaaph ọḅeni ọdaam ẹmha phọ aJeriko mọ, “Buniin awe ạbuo Ịzirel uru ni ẹphen ḍughul oḅiligha ade phọ.”

³Kụ ọdi arom dom ạghiom Rehab, “Awe phọ odi bọ kꞌạna otu ọwaaghi olegheri ịlo oomo ẹmha phọ. Sịghe bịdi amitiom.”

⁴Kụ ạnir phọ ạḅem mọ, “Agey ni, awe uru ni kꞌạmi, kụ mị úlegheri ekpisi phọ bịdi ọḍua bọ kụ oru. Bịdi ụḍua emeel ighool erumuḍio kụ ogbi oghughi ọnhu-aḍibuo oghoony ẹmha phọ. Ekpisi phọ bịdi rọki bọ mị úlegheri, kụ elhom elhom iporogh bịdi nyina kẹteeny bịdi.” (Kụ ạri aRehab mạsiinye ịyal phọ awe phọ ạnyu ạgba otu phọ, kụ aakpereghiom bịdi egu ạfalafa ạaghi.)

⁷Awe kꞌọdaam mọ romite bịn kụ oghughi ọnhu-aḍibuo oghoony phọ. Bịdi ọghi ọwa ạbuo iḅiligha Ịzirel osi kꞌesi dị eten phọ ẹḅeeny Jọdan.

⁸Tụtu awe oḅiligha phọ kọmina, bịn ạnir phọ ạghi ạsiiny ẹpe ạnyu phọ kụ ạḅeni bịdi mọ,

⁹“Mị alegheri ni mọ Ọmoogh-we phọ mịngo inyina de phọ ạḍien kụ aruugu anyina rusiph ghan ni iyoor, kụ oomo awe phọ orugh bọ sịen ade phọ mọghooraan ominonom egbodo anyina,

¹⁰ịdi eḍighi bọ yoor ụrol li kụ ọnaghan ịpe Ọmoogh-we phọ ạtuan bọ ẹmhu anyina kụ aḍighi bọ mụum Ọphiiny Igbilha phọ mem mọ nyina rẹḍua bọ ẹpe Ijipt; ịpe nyina ephiemi bọ Sihon rꞌạOg ịyal phọ ạbudaam mọ Ạmorait bụphe ọdi bọ ẹpe ạga emitenom mọ ạJodan.

¹¹Kụ mem dị yoor ọnaghan bọ ịphen phọ bịn iloghi ayoor ẹkonono yogh, oye lọ ạmoogh oḅiom ọ́rol, loor ẹmhu anyina, loor esi dị Ọmoogh-we Ẹnaan phọ anyina, ọdi kụ Ẹnaan phọ edi bọ ẹpe kꞌạke rꞌịsien aḅirini phọ.

¹²Kụ nyịidipho mị rịiḅereghi ni inyina mọ ikol ḍien Ọmoogh-we phọ eghunyian mọ nyina kẹmaar ri ẹpam eghunotu ạmi ịdipho mị ịpham bọ inyina kụ ụngo ịmi eḍeenaan dị mị kaḍuom inyina ologhi.

¹³Iguanaan ịmi mọ nyina kẹpel li ghuḍum ọde phọ ạmi rꞌonhiin phọ ạmi rꞌabumor phọ ạmi, nmạriir rꞌalephiri, rꞌoomo arughunotu phọ ạbidi. Kémeera ụze iyoor.”

¹⁴Kụ awe phọ ọḅeni ạnir phọ mọ, “Aghuḍum mọ kụen ayoor katelhian ni ghuḍum kụphe anyina tụtu yoor omugh, eru mạar dị nạ kạ́kaaph ịpe yoor oru bọ oḍighi phọ amitiom. Kụ ẹteeny mem mọ Ọmoogh-we phọ kụngo bọ iyoor de phọ, pọ yoor kọmaar ri ọpham nyịna.”

¹⁵ARehab ạrol otu dị ọlogh ọkpaariom iikpe oghoony ẹmha phọ kụ ọdi ạkpo oḍigh aḅughe ekulha eghuugh kụ ạkpaaghiom ịyal awe phọ osoore ude.

¹⁶Kụ ạḅeni bịdi mọ, “Ịki ẹpe aroogbolom mọ ọbo bụphe riphorogh bọ inyina kizuan ghan bọ inyina eten, kụ ạaghian ẹpe phọ ịraar aḍughul-otu tụtu bụphe riphorogh bọ inyina oḅula kụ egbi nụun ọghi ẹlo anyina.”

¹⁷Kụ awe phọ ọḅeni ạnir phọ mọ, “Yoor koḍighi ni ịpe yoor oguan bọ omitiom.

¹⁸Ịphen kụ ịdi nạ kaḍighi. Mem dị yoor moru osi sịen ade phọ, kạgh ọtogh-tọgh oḍigh phọ ọphon ekulha eghuugh esi phọ nạ useere bọ iyoor. Mạgh ọde phọ ạna rꞌonhiin phọ ạna rꞌabumor phọ ạna rꞌoomo eghunotu ọde phọ ạna bịdi ookpomoghan otu kꞌạna.

¹⁹Kụ eru mạar dị oniin ọnyo ạbidi kụ ạḍua sịphe otu phọ kụ amite ạghi ẹpe eten, pọ ịḅaal ọdi edi ẹmhu ọdi, pọ yoor kụ ụ́piom. Kụ eru mạar dị oniin ọnyo ayoor kụ aghiigh oye dị odi sịen otu phọ ạna, pọ ịḅaal oye phọ ọpo edi ẹmhu ayoor.

²⁰Kụ eru mạar dị nạ ạghaaph ịpe yoor ọtu bọ kụ oru amitiom, ịpe yoor oru bọ oḍighi phọ, pọ yoor kụ ụ́piom esi iikunya phọ ịpe ụḅeni bọ iyoor mọ yoor oghunyian.”

²¹Kụ ạnir phọ ameera kụ ạḅem mọ, “Ẹrol li ịdipho nyina ẹḅem bọ.” Kụ ọdi ạsighe bịdi amitiom kụ bịdi ogheel. Kụ ạnir phọ agbi ọkagh ọtogh-tọgh oḍigh ekulha eghuugh phọ.

²²Kụ awe iḅiligha phọ ọḍua ọghi ẹpe aroogbolom mọ, bịn ạaghian. Awe ọdaam mọ ọwa bịdi oomo areten esi ịraar aḍughul-otu kụ ụ́miin bịdi, kụ oḅula ẹpe Jeriko.

²³Pọ kụ amem dị ịyal phọ awe phọ ọḍua ẹpe aroogbolom mọ osoor, ọḅeeny ọphiiny phọ kụ ọghi ọteeny Josua ọony phọ ạNon. Bịdi ọḅeni nyọdi oomo ịpe emite bọ.

²⁴Kụ ọḅem mọ, “Agey ni, Ọmoogh-we phọ mạḅogh ni oomo phọ ade phọ ạlogh ḍịghaagh ayira; ịdi etum pạ, loor ẹmhu ayira oomo phọ ạbuphe orugh bọ ẹpe ade phọ mọghooraan ominonom yogh omuneen.”