Read abua Josua 20 Bible Online

Josua 20 - abua bible

Josua 20

¹Ọmoogh-we phọ ạghaaph ạḅeni Josua mọ,

²“Ḅẹni we phọ Ịzirel mọ bịdi ọma omitiom rạmha ọphela aghuḍum dị kosuma ghan, ịpe mị ạghaaph bọ ạḅeni Mozis mọ ịḅeni inyina.

³Ọokom-enu dị úlegheri, úgbiighiom ịlo oghiigh oye asuma ghan ẹpe; eḍighi esi anyina ekpisi dị kosuma ghan okeel, okpetenaan oye phọ ọpo rạle bọ ghẹlhe ịḅaal phọ.

⁴Ọdi aghiil asuma agheel eniin ẹmha sịphe ạramha phọ ịpe phọ. Ọdi ạmeera sịphe eḍighom ẹmha oghoony ẹmha phọ, ạghaaph ịpe emitenaan bọ nyọdi ạḅeni ikumoor awe ẹmha phọ. Bịdi ọsighe nyọdi oḍighom ologhi ẹmha phọ, ọngo nyọdi dọl, kụ dị ạrolan rꞌạbidi.

⁵Kụ eru mạar dị ọpo rạle bọ ghẹlhe ịḅaal phọ aporogh nyọdi, pọ bịdi kụ́ḅogh ọokom-enu phọ ụ́ngo nyọpo rạle bọ ghẹlhe ịḅaal phọ, ịdi eḍighi bọ ọdi ólhegheri kụ aghiigh bọ matuman phọ ọdi, kẹn kạ́mulogh ḍien ọdi kụ ẹteeny bọ ḍio phọ ạḍiphe.

⁶Ọdi ạrol ẹpe ẹmha phọ ẹpe tụtu ẹteeny ḍio ịiruen phọ sịphe ookpomoghan phọ, tụtu ẹteeny ḍio aḍuugh uwo ẹmhu oyil ạrikia phọ odi bọ mem mọ ạmuphe, kụ ọokom-enu phọ agbi oḅula ogheel kꞌọdi, ẹpe ẹmha phọ ạbidi dị ạḍua bọ kụ asuma.”

⁷Kụ bịdi ọgbatan Kedes sịphe Galili ọsighe oseere gem, ẹpe aroogbolom ạNaftalai; Sẹkem ẹpe aroogbolom Ifraim; rꞌạKiriat Arba (ẹphen phọ pọ ạHebron) ẹpe aroogbolom aJuda.

⁸Ạga emitenom erumuḍio phọ ạJodan, ẹpe ẹyaghaghaany ẹdala phọ ạga emitenom erumuḍio phọ aJeriko, bịdi ọma Bezer, ẹlo eghun aRuben; Ramot ẹpe Gịliad, ẹlo eghun ạGad; Golan ẹpe Bạsan, ẹlo eghun ạManase.

⁹Ịphen phọ ạramha phọ ọson bọ oseere ịlo oomo awe phọ Ịzirel rꞌaruuruen phọ rꞌạbidi orughan bọ, mọ tọrobo oye lọ úlegheri kụ aghiigh oye, pọ asuma ghan agheel ẹpe, ọbo ọpo rạle bọ ghẹlhe ịḅaal phọ kakiigh aani bọ nyọdi, tụtu ẹteeny mem dị ọdi kạmeera risigh ạbuo ookpomoghan phọ.