Read abua Josua 24 Bible Online

Josua 24 - abua bible

Josua 24

¹AJosua aakpomoghi oomo arughunughun phọ awe phọ Ịzirel ẹpe Sẹkem, ikumoor awe phọ rꞌạbuo ạrumhu phọ rꞌạbuo ịiruen phọ ạbidi rꞌạbuphe olegheri bọ ọghaaph ịyaar, kụ bịdi oḍeenaan loor ạbidi ghisigh Ẹnaan.

²Kụ aJosua ạḅeni oomo awe phọ mọ, “Ọmoogh-we Ẹnaan phọ Ịzirel ạḅem ịduon mọ, ‘Geediidi ạburude phọ anyina urugh ghan ẹpe ḍịeri phọ ạḍighaagh Ọphiiny aYufratis kụ ooseeny ghan ịnon ạrumugh. Oniin ọnyo ạbidi ughol mọ aTera, ọde phọ Ebraham rꞌaNahor.

³Kụ mị ạsighe Ebraham ẹpe ḍịeri phọ ạḍighaagh Ọphiiny aYufratis kụ ạsighe nyọdi arelhiom oomo ade phọ aKenan. Kụ mị ạbughe ọophi ọdi, kụ mị ạngo nyọdi Ạizik,

⁴kụ mị ạngo Ạizik Jẹkob rꞌỊso, kụ mị ạsighe roogbolom aIdom ạngo Ịso mọ ạmoogh, kụ ạJekob rꞌạnmuny ọdi ogheel Ijipt.

⁵Mị arom Mozis rꞌEeron kụ mị ạsighe rẹezegh asoorom Ijipt rꞌịnon ịdi mị aḍighi yogh sịphe ogbo phọ ạbidi, kụ reten, kụ mị ịsighe inyina ạḍuanam.

⁶Kụ mị ạsighe bụrude phọ anyina ạḍuanam ẹpe Ijipt, kụ nyina ẹghi esi sịphe Ọphiiny Igbilha phọ, kụ awe Ijipt phọ ophorogh bụrude phọ anyina, ọpham ịnam-ạsu rꞌarughuugh-ude, ọghi osi sịphe ọphiiny phọ.

⁷Mem dị ạburude phọ anyina omoghiom Ọmoogh-we phọ, kụ Ọmoogh-we phọ ạsighe ufiri isophoghom inyina rꞌawe phọ Ijipt, kụ aḍighi ịdi ọphiiny phọ aḍigh amuza ạminoghom we phọ Ijipt. Kụ nyina ịmiin ni ịpe mị aḍighi bọ we phọ Ijipt. “‘Kụ nyina ẹrol sịphe ẹdala phọ ẹminighan amem.

⁸Kụ mị ịsighe inyina asiemi ẹpe ade phọ Ạmorait, bụphe orugh bọ ạga emitenom erumuḍio phọ ạJodan; kụ bịdi rꞌanyina eeghi kụ mị ạḅogh bịdi ịngo inyina kụ nyina ạarom bịdi de phọ ạbidi, kụ mị aphiemi bịdi risigh anyina.

⁹Kụ ạBelak ọony phọ aZipor ọolha-ẹmha phọ ạMoab aḅetenu aruphiom ẹgham Ịzirel, kụ arom ạghiom Bẹlam ọony phọ aBior mọ aru iruule inyina.

¹⁰Kụ mị ụ́naghanan Bẹlam, kụ ọdi ạbile bịn ịseph inyina kụ mị ịtagharan inyina ạsighe ḍịghaagh ọdi.

¹¹Kụ nyina ẹḅeeny Jọdan ephun ẹghi esi Jeriko, kụ awe aJeriko izuom inyina ẹgham, ọḅaram kẹn bụo Ạmorait, bụo ạPerezait, bụo aKenanait, bụo ạHitait, bụo aGirgasait, bụo aHivait rꞌạbuo aJebusait, kụ mị ạsighe bịdi ạlogh ḍịghaagh anyina.

¹²Kụ mị arom ạgay iḍiemiom inyina kụ aphorogh ịyal phọ ạraalha-ẹmha phọ Ạmorait risigh anyina. Kélhool ẹgham anyina, ḅịle kẹn kạ́rukumugh anyina.

¹³Kụ mị ịngo inyina de dị nyina ị́miinom, rꞌạramha dị nyina kụ ị́loghoḍi kụ nyina etughogh, kụ nyina rele ghan ibusi rꞌiimuma oreeny-ọliv dị nyina kụ ị́zuphogh.’

¹⁴“Kụ nyịidipho, ikueni Ọmoogh-we phọ eeseeny ghan nyọdi rꞌoomo ologhi anyina rꞌomeeraam. Ịbile rụmugh phọ ịpe ạburude phọ anyina ooseeny ghan bọ ẹpe Mesopotamia rꞌẹpe Ijipt. Iiseeny ghan Ọmoogh-we phọ bịn.

¹⁵Mụghumo eḍighi ni ịkaraph esi anyina ooseeny ghan Ọmoogh-we phọ, pọ rodon ịma nyọpo nyina keeseeny ghan bọ, mụghumo ạrumugh phọ ịpe ạburude phọ anyina ọoḅereghi ghan bọ ẹpe Mesopotamia, mụghumo ạrumugh awe Ạmorait phọ sịen ade phọ ạḍien nyina erugh bọ, kụ mị rꞌọto ạmi kooseeny ghan Ọmoogh-we phọ.”

¹⁶Kụ awe phọ ọphagharanaan kụ ọḅem mọ, “Ịlo ayoor ríḍigh. Ẹnaan kímeera dị yoor kokel Ọmoogh-we phọ, kụ ooseeny ghan ịnon ạrumugh.

¹⁷Ọmoogh-we Ẹnaan phọ ayira, ọdi kụ ụsighe bọ iyira rꞌạburude phọ ayira ạḍuanam ẹpe ade phọ Ijipt ọḍua esi ạdol ạrebene phọ, ọpo amiteghom bọ iboom areḍeenaan phọ ịpe yira ọmiin bọ, ọpo ụrolonaan bọ iyira oomo erelhe phọ ayira, rꞌogbo esi oomo awe phọ ạbuphe yira oten bọ.

¹⁸Kụ Ọmoogh-we phọ aphorogh oomo awe phọ ạsighiogh esomanan ayira rꞌạbuo Ạmorait phọ orugh bọ sịphe ade phọ, kụ iḍighi kụ yira kooseeny ghan Ọmoogh-we phọ, ịdi eḍighi bọ ọdi kụ Ẹnaan ayira.”

¹⁹AJosua ạḅeni we phọ mọ, “Nyina kétue eeseeny Ọmoogh-we phọ, ịdi eḍighi bọ ọdi phọ Ẹnaan iigbia dị kạ́sar ịwilenaan inyina ọpioman phọ anyina rꞌịkaraph phọ anyina. Ọdi ótiran aroḅopha.

²⁰Eru mạar dị nyina eghel Ọmoogh-we phọ, kụ eeseeny ghan iiruen ạrumugh, pọ ọdi kakiton isoman inyina kụ ịmiine inyina iphiemi inyina, ịdi eḍighi bọ ọdi miḍighi ni inyina ịdi ẹnighe.”

²¹Kụ awe phọ ọḅeni Josua mọ, “Eeye. Yoor kooseeny ghan ni Ọmoogh-we phọ.”

²²Kụ aJosua ạḅeni we phọ mọ, “Nyina kụ mẹgbaanaan ni loor anyina ịpe eru bọ ịne mọ nyina mẹsaḅar Ọmoogh-we phọ, mọ nyina keeseeny ghan nyọdi.” Kụ bịdi ọḅeni nyọdi mọ, “Yoor kụ kọgbaanaan ni loor ayoor ịpe eru bọ ịne.”

²³Kụ ọdi ạḅeni bịdi mọ, “Nyịidipho ịgbatanaan iiruen ạrumugh phọ edi bọ ogbo anyina, eḍuom ghan ologhi Ọmoogh-we Ẹnaan phọ Ịzirel.”

²⁴Kụ awe phọ ọḅeni Josua mọ, “Ọmoogh-we Ẹnaan phọ ayoor kụ ẹdi yoor kooseeny ghan. Yoor kọnaghanan ghan ẹḍogh phọ ọdi.”

²⁵Kụ aJosua rꞌawe phọ oghiran ịyo ḍio phọ ạḍiphe, kụ adoghoḍi iilogh rꞌịtooghi ạngo bịdi ẹpe Sẹkem.

²⁶Kụ aJosua ạge ịphen phọ sịphe ạḍinya Ologh phọ Ẹnaan kụ ạsighe ḍiboom aḍighiigh ạmeremi eeḍian oreeny ạḍiogh phọ etuman bọ dọl iigbia phọ Ọmoogh-we phọ.

²⁷Kụ aJosua ạḅeni oomo awe phọ Ịzirel mọ, “Ipogh mọ aḍighiigh phọ ạḍien kụ kẹgba ghan ịlo ạmi rꞌanyina ịpe eru bọ ịne, ịdi eḍighi bọ dị mạnaghan ni oomo phọ ịpe Ọmoogh-we phọ ạghaaph bọ ụḅeni iyira, dị kụ kạkaaph ghan iphum inyina, ọbo nyina kẹparanaan ghan bọ Ẹnaan phọ anyina.”

²⁸Kụ aJosua ạḅeni we phọ mọ ikeel, tọrobo oye agheel ẹpe abin ẹmoogh phọ ọdi.

²⁹Kụ oomo phọ ịphen phọ reru reten, aJosua ọony phọ ạNon otelhedom mọ Ọmoogh-we phọ amugh. Ọdi ạman bọ oniin okuron rꞌiḍioph ạsia.

³⁰Kụ ọsighe nyọdi oḍi sịphe ọku ade abin ẹmoogh nyẹpe ọdi ẹpe Timnat Seraa, edi ẹpe aroogbolom Ifraim, ẹpe ḍịghaagh ephunom mọ Eegum aGaas.

³¹Kụ awe phọ Ịzirel uuseeny ghan Ọmoogh-we phọ oomo asiḍughul-otu amem mọ aJosua, rꞌoomo asiḍughul-otu ikumoor awe phọ bụphe ọkpo bọ opu Josua, bụphe olegheri bọ oomo iiḍighi phọ ịpe Ọmoogh-we phọ aḍighinaan bọ Ịzirel.

³²Kụ ịḅarara phọ ạJosef ịpe awe phọ Ịzirel ọpham bọ ẹpe Ijipt ọḍuanam uḍi sịphe Sẹkem de phọ ạḍiphe ạJekob agho bọ esi ạnmuny aHamor ọde phọ ạSekem oniin okuron ipoḍi asilva eḍighi bin ẹmoogh ọto ạJosef.

³³Kụ Ẹliazar ọony phọ Eeron amugh kụ bịdi oḍi nyọdi ẹpe Gibia, ẹpe ẹmha ạFinehas ọony phọ ọdi ọngo bọ nyọdi ẹpe aroogbolom Ifraim.