Read abua Josua 4 Bible Online

Josua 4 - abua bible

Josua 4

¹Oomo awe phọ rọḅeeny bọ Jọdan rophun kụ Ọmoogh-we phọ ạḅeni Josua mọ,

²“Kịa ạsaḅar ḍioph rꞌịyal awe sịphe awe phọ Ịzirel, eghun eghun, oye oye,

³ạto ạḅeni bịdi mọ, ‘Ịki sịphe ogbo ạJodan ọkar ịsiphe ariil ạrikia phọ ọmeregha bọ, ẹsighe ḍioph rꞌịyal asighiigh erool ẹpham ẹghimom, ẹsighe esereghi esi phọ ẹpe nyina kẹtol bọ ḍughul phọ ạḍien arodon.’”

⁴Kụ aJosua ạmagh ḍioph rꞌịyal awe phọ ạbuphe ọdi mạsaḅar bọ, eghun eghun, oye oye,

⁵kụ ạḅeni bịdi mọ, “Itenom Igbe Ịyo phọ Ọmoogh-we Ẹnaan phọ anyina, ẹghi sịphe ogbo ạJodan, kụ tọrobo ọnyo anyina ạsighe ghan ḍiniin niin aḍighiigh arool ọpha, ẹdaph rughunughun phọ awe phọ Ịzirel.

⁶Ịphen phọ ekori eḍighi rạraar dị kọsighe ghan ọotughianam esi anyina, mem lọ ạnmuny phọ anyina opuru bụrude phọ ạbidi, ḍio-pọ, mọ, ‘Ẹmhu asighiigh phọ ịphen phọ, pọ ika?’

⁷Kụ ẹphagharanaan ghan ẹḅeni bịdi mọ ạmuum mọ ạJodan asophaan ni egbodo Igbe Ịyo phọ Ọmoogh-we phọ, mem dị Igbe Ịyo phọ ẹḅeeny Jọdan ephun. Kụ ọsighe ghan sighiigh phọ ịphen ọotughianam ghan kꞌagee-pọ ịpe emitenaan bọ we phọ Ịzirel sịphe phọ.”

⁸Kụ awe phọ Ịzirel ọtuugh ịpe aJosua ạto bọ ạḅeni bịdi oḍighi, kụ ọghi ọsighe ḍioph rꞌịyal asighiigh sịphe ogbo ạJodan, ịdipho Ọmoogh-we phọ ạghaaph bọ ạḅeni Josua, ọdaph ọnhu arughunughun phọ awe phọ Ịzirel, orool ọpham ọghi osiom esi phọ bịdi odoghoḍi bọ rugbogo phọ kụ osereghi.

⁹Kụ aJosua ạsighe ḍioph rꞌịyal phọ asighiigh ạmeremi yogh sịphe ogbo ạJodan, esi phọ ẹpe aruwol ariil ạrikia phọ ạbuphe orool bọ Igbe Ịyo phọ ọmeregha bọ, kụ edi ghan ni sịphe phọ kꞌarodon.

¹⁰Ạbupinyon rịkia phọ ạbuphe orool bọ Igbe Ịyo phọ ụmeera ogbo ạJodan tụtu oomo ạraraar phọ ịpe Ọmoogh-we phọ ạto bọ ạḅeni Josua mọ ạḅeni we phọ mọ oḍighi yogh phọ emuneen. Bịdi ọdaph oomo iilogh phọ ịpe aMozis ạlogh bọ ạngo Josua. Awe phọ oogborion ọḅeeny oten ophun.

¹¹Kụ oomo awe phọ roten romuneen, kụ Igbe Ịyo phọ Ọmoogh-we phọ rꞌariil ạrikia phọ oten ophun oḍiemiom ghisigh awe phọ.

¹²Kụ awe eghun aRuben rꞌawe eghun ạGad rꞌạpakiri eghun ạManase ọnyaaghian ibura ẹgham kụ otenom we Ịzirel, ịdipho aMozis ạḅeni bọ bịdi.

¹³Ọkiom ni inyadi ọonir awe dị ọnyaaghian ibura ẹgham ụḅeeny ophun Jọdan, ọrol egbodo Ọmoogh-we phọ ọghi ẹgham, ọghi osi ẹpe ẹdala ade phọ aJeriko.

¹⁴Ḍio phọ ạḍiphe Ọmoogh-we phọ aphophe Josua ạbughe risigh oomo awe phọ Ịzirel, kụ bịdi oghiilaan ghan nyọdi ịdipho bịdi oghiilaan ghan bọ Mozis, oomo asiḍughul-otu aghuḍum mọ ọdi.

¹⁵Kụ Ọmoogh-we phọ ạḅeni Josua

¹⁶mọ ọdi ạto ạḅeni bụpinyon rịkia phọ, bụphe orool bọ Igbe Ịyo phọ, mọ bịdi ọḍua sịphe Jọdan ophun.

¹⁷Kụ aJosua ạtuugh ịdipho aḍighi,

¹⁸kụ mem dị ariil ạrikia phọ, bụphe orool bọ Igbe Ịyo phọ, ọḍua bọ sịphe ogbo ạJodan ophun, kụ ophoophe bọ ruwol phọ ạbidi ọsighe ạḍigharaghar ade phọ, bịn ạmuum mọ ạJodan ạḅile amiigh okil kụ ạḅile aḍigh amuza oomo ịpaḅi phọ ịdipho dị ạrol ghan bọ.

¹⁹Awe phọ ụḍua sịphe Jọdan ḍioph aḍughul-otu ọḅel ụnwanyu phọ, kụ odoghoḍi rugbogo sịphe Gịlgal, sịphe ọku ạga emitenom aJeriko.

²⁰Ịsiphe kụ ẹdi aJosua ạsighe ḍioph rꞌịyal asighiigh phọ ịpe bịdi ọsighe bọ pạ Jọdan agimi.

²¹Kụ ọdi ạghaaph ạḅeni we phọ Ịzirel mọ, “Mem lọ ạnmuny anyina opuru bụrude phọ ạbidi, ḍio-pọ, mọ, ‘Ẹmhu asighiigh phọ ịphen phọ rẹḅem ghan mọ eeghe?’

²²nyina kẹḅeni ịpe amem mọ awe phọ Ịzirel ọḅeeny bọ Jọdan ḍịgharaghar ade.

²³Ịḅeni bịdi mọ Ọmoogh-we Ẹnaan phọ anyina ạgharagharami mụum ạJodan phọ ạsighe tụtu nyina ẹḅeeny ephun, ịdipho ọdi aḍighi bọ Ọphiiny Igbilha phọ kụ yira ọḅeeny.

²⁴Loor ịphen phọ oomo awe ịsien aḅirini phọ kolegheri ḍịghaagh phọ Ọmoogh-we phọ mọ ọdi ạbugh ni; ọbo nyina eghiilaan ghan Ọmoogh-we Ẹnaan phọ anyina kꞌagee-pọ.”