Read abua Josua 5 Bible Online

Josua 5 - abua bible

Josua 5

¹Mem dị ạbudaam mọ Ạmorait bụphe orugh bọ ẹḅeenyom ạJodan ẹpe erumuḍio phọ remeel ghan bọ rꞌoomo ạbudaam mọ aKenanait bụphe orugh bọ sịphe ọgbal Ọphiiny aMeditarenian ọnaghan bọ mọ Ọmoogh-we phọ mạgharagharami mụum ạJodan esomanan awe phọ Ịzirel ạsighe tụtu yira ọḅeeny ophun, bịn iloghi ạbidi ẹkonono yogh bịn uwaloor ạbidi ạḍua loor ạbidi loor ẹmhu awe phọ Ịzirel.

²Mem mọ ạmuphe Ọmoogh-we phọ ạḅeni Josua mọ, “Lẹm sịleke dị eroph, ạsighe ạḅile aḍunoghom we phọ Ịzirel amuneni ịyal amem.”

³Kụ aJosua ạlhem sịleke dị eroph kụ ạsighe aḍunoghom ẹphen ạnyu oodu phọ awe phọ Ịzirel sịphe Eegbolom aGibet-hạralot.

⁴Ịphen kụ iḍighi bọ ịyaar phọ aJosua ạtuan bọ kụ aḍunogh bọ oomo alephiri phọ awe phọ: mem mọ awe phọ Ịzirel ọḍua bọ ẹpe Ijipt omite, oomo alephiri phọ moḍuna yogh ni. Kụ ọlo, mem inyadi ạsia phọ awe phọ Ịzirel orelhe bọ sịphe ẹdala phọ, rꞌoniin olephiri ọony dị oḍun ọ́rol. Ḅịle kẹn, eekuna amem mọ ạmuphe oomo alephiri dị mọman ọki ee ẹgham mem mọ bịdi rọḍua bọ ẹpe Ijipt momugh, loor esi dị bịdi ụ́naghanan ghan Ọmoogh-we phọ. Ịdipho ọdi maghunya bọ, ọdi ómeera bịdi ọmiin de ẹereegh rꞌọninom mọ ạḍiphe ọdi aguanaan bọ bụrude ạburude ạbidi.

⁷Nmụny awe phọ ạbuen kőḍuna ghan, kụ ịsien omoom oghiil phọ ọphon kụ ẹdi aJosua aḍun.

⁸Mem mọ oḍunogh bọ we phọ, oomo eelhe phọ ịrol sịphe arugbogo phọ tụtu ạrelem oḍu phọ egheleghu.

⁹Kụ Ọmoogh-we phọ ạḅeni Josua mọ, “Rodon phọ ạḍien mị magbuurogh umugholoor phọ nyọpo Ijipt ạsighe loor anyina.” Ụtuan ịphen kụ oghol bọ sịphe phọ mọ ạGilgal kꞌarodon.

¹⁰Ịdipho awe phọ Ịzirel ọrol bọ ẹpe Gịlgal sịphe ạḍiyaghaghaany ade phọ etuman bọ Jeriko, bịdi ule ni ẹyaal ọphel otene phọ dulhe aḍioph rꞌinya aḍughul-otu ụnwanyu phọ.

¹¹Ḍịeri phọ aḍio phọ kụ ẹḅel amem dị bịdi olhe eḍien dị oḅeph Kenan: ịphophoghineen ịbiakpa rꞌạbred dị yist ụ́logh.

¹²Bịn ạmana phọ ọ́ghar mun kꞌaḍio phọ ạḍiphe phọ bịdi role bọ ịbiakpa ịsiphe ade phọ; bịn awe phọ Ịzirel ụ́moogh mun mạna.

¹³Kụ aJosua ạtol rapogh Jeriko kụ ọdi aphoophe riḍien ọdi aphogh kụ ạmiin oye dị ạmeera atuman nyọdi ạpam elhool ẹgham ḍịghaagh, kụ aJosua ạghi ạteeny nyọdi, kụ apuru mọ, “Nạ ụtuan iyoor ḍụghum, kụ nạ ụtuan bụmulogh-ḍien phọ ayoor ḍụghum?”

¹⁴Kụ ọdi ạphagharanaan mọ eeye, mọ, “Mị uwo ẹmhu awe ẹgham mọ Ọmoogh-we phọ. Pụruku mị aru ni.” Kụ aJosua ameel ezuemi kụ ạaḅereghi kụ apuru nyọdi mọ, “Ọde-otu ạmi, eeghe kụ ẹdi nạ kụḅeni ịmi otelhedom mọ ạna?”

¹⁵Kụ uwo ẹmhu awe ẹgham Ọmoogh-we phọ ạḅeni Josua mọ, “Kpọronaan rokoro phọ ạna sịphe aruwol phọ ạna, ịdi eḍighi bọ esi phọ nạ ạmeera bọ ade iigbia.” Kụ aJosua ạtuugh ịpe ọḅeni bọ nyọdi aḍighi.