Read abua 2 Bụo ạTesalonika 1 Bible Online

2 Bụo ạTesalonika 1 - abua bible

2 Bụo ạTesalonika 1

¹ẠPol rꞌạSailas rꞌaTimoti kụ ụge ḍịnya phọ ạḍien riruomaan inyina ạbuo ạsiosi phọ ạTesalonika, bụphe oḍighi bọ bụo Ẹnaan Ọde phọ ayira, rꞌạJizos Kraist Ọmoogh-we phọ.

²Ạḍiseph rꞌẹepho kꞌẸnaan Ọde phọ rꞌạJizos Kraist Ọmoogh-we phọ ịrolonaan inyina.

³Bụo asiya, ẹkpianaan ni dị yoor kighol ghan inyina ọseph Ẹnaan oomo amem. Ịduon phọ ẹnighe ni, loor esi dị omeeraam mọ anyina rapoph ni kạghi ghisigh, ḅịle kẹn ẹphomoghian phọ oniin ạphomoghian bọ nyoniin rẹbugh ni.

⁴Ịphen kụ iḍighi kụ yoor rꞌaloor ayoor riitumaam bọ ni inyina esi ạbuo ạsiosi phọ Ẹnaan. Yoor roboomiom ni ịdipho omeeraam mọ anyina ạmeera bọ ni, nyina ípogh bọ oomo ịgbiphoghom mọ rꞌịminimiin phọ isoorom bọ inyina.

⁵Ịphen phọ kụ imitiom eḍeenaan mọ ịiruen phọ Ẹnaan eeleeny ni esi anyina. Ọdi ragbiighi ghan ọtuan ịminimiin phọ anyina kụ oḍighi ịdi nyina kẹman oḍigh aani ọmar phọ ọdi nyina ẹtuan bọ rẹmiinom.

⁶Ẹnaan ẹmiin mọ ẹkpianaan ni ọmiine ạbuphe ịmiine bọ inyina

⁷rꞌọngo anyina phọ rẹmiinom bọ ophooghian, ḅịle rꞌayoor. Ọdi kaḍighi ịphen phọ mem mọ ạJizos Ọmoogh-we phọ kạḍua bọ ẹpe kꞌạke ạpam igbogh ạruukpaany phọ ọdi atumom.

⁸Ọdi kạsighe nem ạnian kụ anuemom bụphe Ẹnaan úlegheri bọ, rꞌạbuphe rọ́naghanan ghan bọ ooḅi ọghaaph phọ ạJizos Ọmoogh-we phọ ayira.

⁹Bịdi kọmiinom ịminimiin amuphe dị eekuna ílho. Kọgbatan bịdi ọsighe ghisigh Ọmoogh-we phọ rꞌigbogh ịikpo phọ ọdi,

¹⁰ḍio phọ dị katu bọ, mọ oomo awe phọ omeeraam bọ nyịno ọngo nyịno eghuan rꞌeegu phọ. Nyina kẹtolan aani ni bịdi, ịdi eḍighi bọ nyina memeeraam dom mọ yoor ịḅeni bọ inyina.

¹¹Yoor ụtuan ịduon phọ kụ úsoph bọ mem oghol ghan anyina esi ịiḅereghi. Yoor rọlom ghan Ẹnaan phọ ayira mọ aḍighi dị nyina kẹkasian ọrol ạdol phọ ạḍiphe ọdi ạtu bọ kụ ịmagh bọ inyina. Mọ ọdi ạsighe ịikpo phọ ọdi aḍighinom ghan amuneni oomo ịitughian oḍighi igey lọ nyina ẹmoogh, ạḅile amuneni ghan iiḍighi lọ nyina ẹtuan omeeraam mọ anyina kụ reḍighi.

¹²Ịduon phọ kụ ịdi nyina kẹngo eghuan ḍien phọ ạJizos Ọmoogh-we phọ ayira, kụ ọtuan ọghor Ẹnaan phọ ayira rꞌạJizos Kraist Ọmoogh-we phọ, kụ nyina ẹḅile ẹboor aani nyọdi eghuan.