Read abua 2 Bụo ạTesalonika 3 Bible Online

2 Bụo ạTesalonika 3 - abua bible

2 Bụo ạTesalonika 3

¹Bụo asiya, esi okureriom, ịiḅereghi ghan ịngo iyoor mọ ọghaaph Ọmoogh-we phọ aagborion ni aleeny eleeny, ạmoogh eghuan, ịdipho aḍighi bọ ogbo phọ anyina.

²Mọ Ẹnaan ịphel li iyoor ẹsighe rạghaagh ạbukaraph awe, ịdi eḍighi bọ oomo awe kụ ụ́naghanan bọ dom mọ.

³Ọmoogh-we phọ kaḍighi ni ịphen ọdi aguanaan bọ. Ọdi kịngo ni inyina ịnyaam, ịphel inyina ạsighe ḍịghaagh Eru.

⁴Kụ Ọmoogh-we phọ rụngo ghan ni iyoor oḍuom ologhi esi anyina, mọ nyina reḍighi ni kụ keḍighi ni ịpe yoor ịḅeni bọ inyina ẹkiom ghisigh.

⁵Ọmoogh-we phọ aḍighi dị nyina kelegheri ẹphomoghian phọ Ẹnaan, ẹḅile ẹmoogh ọkparam mọ ọpo aKraist rạngo ghan bọ!

⁶Bụo asiya, esi aḍien phọ ạJizos Kraist Ọmoogh-we phọ ayira, yoor ọto ni rịngo inyina mọ kételhian ghan oomo ạbulo rọgbogholeer ghan sịphe ogbo phọ anyina, bụlo rọ́naghanan ghan ịpe yoor oroma bọ bịdi.

⁷Nyina rꞌaloor anyina bịn elegheri ni mọ ẹkpe ni ọtuughaany ayoor. Mem mọ yira ọrolan bọ, yoor ụ́gbogholeer.

⁸Yoor úle ghan ịyaar oye kụ ọwile dị ikpoki ụ́kpe. Yoor ukumuan ghan ni rꞌọkpar aloor ḍughul rꞌootaany, ọbo oḍighi ikpoki kasoroghuom ghan bọ ọnyo anyina.

⁹Ụ́ḅem mọ yoor ụ́moogh ịikpo opuru ghan anyina ịlo yoor rọwa, kụ yoor ụtu mọ ịtuughaany rọozo phọ ayoor ekumuan aani ghan.

¹⁰Rꞌamem mọ yira ọrolan bọ ni bịn yoor ụto ni ịphen ịḅeni inyina mọ, “Oye lọ ráḍighi ghan ịyaar, kúle ghan eḍien.”

¹¹Yoor rọkaaph ghan ịphen phọ, ịdi eḍighi bọ yoor ọnaghan mọ buniin anyina edi dọl ạrugbogholeer, ịyaar róḍighi ghan, odi ghan oḅiligha ạsidol ạbunon awe bịn.

¹²Esi aḍien phọ ạJizos Kraist Ọmoogh-we phọ, yoor ọto ni rọpurom rụru, ịdo awe phọ ạbuen mọ bịdi osereghian oḍighi ghan oḍighi, ọbo bịdi ọmoogh ghan ịyaar ole.

¹³Bụo asiya, oḍighi ghan igey inyina kị́pher!

¹⁴Iini sịen oye odi ni sịphe ogbo phọ anyina dị kạ́naghanan dom mọ ọge bọ riruomaan inyina sịen ạḍinya phọ ạḍien. Nyina ẹmiin ọdo oye phọ ọpo, ịlogh nyọdi elegh ẹgbatanaan nyọdi, ọbo umugholoor asiph nyọdi.

¹⁵Kẹ́sighenom mọ ọdi ạmulogh-ḍien anyina. Ịpur ghụn nyọdi rụru ịdipho ọnyo asiya anyina.

¹⁶Ọmoogh-we phọ rꞌaloor, ọpo aḍighi bọ zin ẹepho phọ, ịngo ghan inyina ẹepho oomo amem rꞌareten kịrokiro! Ọmoogh-we phọ ạrolonaan oomo phọ anyina!

¹⁷Mị ạPol kụ ụsighe ni ḍịghaagh ạmi ạgeom ẹpe ekureriom mọ: mị ipuru inyina. Ịphen kụ ịdi mị rạdaphari ghan ḍịghaagh ạmi tọrobo ạḍinya lọ mị ạge.

¹⁸Ooḅi ọghor phọ kꞌạJizos Kraist Ọmoogh-we phọ ayira ạrolonaan oomo phọ anyina!