Read abua 1 Timoti 1 Bible Online

1 Timoti 1 - abua bible

1 Timoti 1

¹Mị ạPol phọ ọpo Ẹnaan Ọpelia phọ ayira, rꞌạJizos Kraist oḍuom ologhi phọ ayira, kụ ọma bọ mọ aḍighi otelhedom mọ ạJizos Kraist,

²kụ ụge ḍịnya phọ ạḍien raruomaan nyịna aTimoti, ọkar ọony phọ ạmi esi omeeraam mọ. Ạḍiseph rꞌọnma ighirigiir rꞌẹepho kꞌẸnaan Ọde phọ rꞌạJizos Kraist Ọmoogh-we phọ ayira ẹrolonaan nyịna!

³Mị rạwa ni mọ tọl li ẹpe Ẹfesos, ịdipho mị ạḅeni bọ nyịna ạkpaariom mem mọ ọpo mị rạki bọ Masidonia. Buniin awe odi ni ẹpe rọtughemi ghan imoom ạraraar, kụ nạ kạto ạḅeni bịdi osoph oḍigh phọ ọphon phọ okpere.

⁴Ḅẹni mọ bịdi ọwile sidum rꞌọodoony oḍigh ẹemara etum ẹemara phọ ạbidi, ịdi eḍighi bọ ịphen phọ rẹkom ghan ọogbaghanaan keseere, kpạripe ghụn ni rꞌọloghonaan ạḍighaagh ịlo awe koghol omeeraam, ọmoogh aani pẹleeny phọ Ẹnaan meseere bọ.

⁵Ẹmhu phọ mị ạtu bọ kụ rạkaaph ịphen phọ, ịlo ọghologholomi ẹphomoghian phọ ẹpe rẹḍua ghan bọ ophooph ologhi rꞌigey ịitughian, rꞌomeeraam dị ụ́ḅaram iguegue, kụ kemite.

⁶Buniin awe mọḅitonaan ịphen phọ omeel oḍighanaan eepua ọghaaph kụ mọtuan opiom eten.

⁷Edi ghan iloghi ạbidi ọtughemi ghan iilogh phọ Ẹnaan, kụ ạri bịdi úlegheri ẹmhu ọghaaph phọ, ḅịle rꞌikpo ọnhu phọ bịdi ọsighe bọ oomo iloghi phọ ạbidi, kụ rọkaaphom bọ.

⁸Yira olegheri ni mọ ịyaar lọ eeph sịphe Ologh phọ ílho, eḍighi ịyaar dị ọtuugh ni ịpe ẹnighe bọ kụ ọsighe ghan roḍighinom.

⁹Kụ ẹkpe ni ọghiom ologhi olegheri mọ iilogh phọ ụ́loghoḍinaan bugey awe, ụloghoḍinaan busoroghuom iilogh rꞌabusereghiom sighiton; bụphe Ẹnaan úlegheri bọ rꞌabuḍighinom ịkaraph phọ; bụo ạsipioghom mọ rꞌạbuphe ụ́moogh bọ uwaloor phọ Ẹnaan; bụziom ạburude rꞌaburunhiin phọ ạbidi; rọokom-enu

¹⁰rꞌạbuo ipesi, rꞌạbuminian rịiniom, rꞌạbuo isiphian awe, rꞌạbugbaam ọkpe, rꞌạbulo ọpiom ọphuo, rꞌoomo ạbulo roḍighi ghan ịlo ẹgbatanaan igey ịtughemi phọ

¹¹ịpe edi bọ sịphe ooḅi ọghaaph phọ Egbogh Ẹnaan Ạḍiseph phọ ẹḅogh bọ ẹlhogh ḍịghaagh phọ ạmi ogbeelom ghan phọ.

¹²Mị rạseph ni Jịzos Kraist Ọmoogh-we phọ ayira ụngo bọ ịmi ịnyaam oḍighinom ghan ịphen phọ. Mị rạseph ni nyọdi ịdipho ọdi úpogh bọ igbaany ịkaraph phọ mị aghol ghan bọ ḍien phọ ọdi, rꞌịgbiphoghom mọ, rꞌọnhu phọ mị ạsuom ghan bọ nyọdi, kụ uḍuom bọ ni ịmi ologhi ụma ịmi okumu ghan ọdi. Kụ Ẹnaan ịnma ni ịmi ighirigiir, ịdi eḍighi bọ mị ụrol dọl elegheri rꞌemeeraam.

¹⁴Kụ Ọmoogh-we phọ ayira ụngo ni ịmi ọghor phọ ọdi ạbalabalami, ạḅile ụngoom ịmi omeeraam rꞌẹphomoghian phọ yira phọ mọḅophoghan bọ Jịzos Kraist ọmoogh bọ.

¹⁵Ọphon phọ ogey ọḅem ni, kụ ạkpe ni ọsighe omeeraam, mọ ạJizos Kraist aru sịen aḅirini phọ ọphel abuḍighinom ịkaraph. Mị kụ ụloghori apu oomo phọ ạbidi,

¹⁶kụ Ẹnaan ịkar ghụn ẹtuan ẹmhu ịduon phọ kụ ịnmaanaan bọ ịmi ighirigiir phọ, pịdi ạJizos Kraist ụsighe ịmi aḍeenaan bụphe kọtuan bọ ghuḍum kꞌagee-pọ phọ omeeraam nyọdi, ọdo ọminoghom dị ọdi ạminoghom ịkaraph phọ ạmi eekuna phọ ílho bọ.

¹⁷Eghuan phọ rꞌigbogh phọ ẹrolonaan Ọdaam-ẹmha ọrugh kꞌọrugh phọ rámugh ghan bọ, ḅịle rọ́miin ghan bọ ekpeḍien phọ, Egina Ẹnaan phọ, kꞌagee-pọ kꞌagee-pọ! Ẹrol li ịdipho!

¹⁸Mị ạḅogh ọghaaph phọ ọphon ạlogh ḍịghaagh ạna aTimoti ọony phọ ạmi, ịdipho ọmiinaan bọ nyịna mọ mị uḍighi phọ. Ikpo ọnhu ịmiin phọ kụ eḍighi ịinya phọ nạ kabiom bọ ẹgham aruwaloor phọ.

¹⁹Pạm ni ịpe omeeraam mọ ạḅem bọ ạkananaam, ạmoogh iigbia aḅirini. Buniin awe moghel iigbia aḅirini kụ moḍinyighi omeeraam mọ ạbidi mụum ạrada.

²⁰Ogbo ạbuen phọ, mị mạḅogh Haimenios rꞌẠleksander ạngo Setan, ọbo bịdi olegheri mọ ị́nighe oghol ghan ịkaraph ḍien phọ Ẹnaan.