Read abua 2 Timoti 2 Bible Online

2 Timoti 2 - abua bible

2 Timoti 2

¹Kụ nạ ọony phọ ạmi, kpạr ri esi ooḅi ọghor phọ yira phọ ạbuphe mọḅophoghan bọ Jịzos Kraist ọmoogh bọ.

²Sịghe ni ikpo ọnhu phọ ịpe nạ ạnaghan ghan bọ dị mị ạghaaph ghisigh ịbadi awe, ạḅogh ạlogh ḍịghaagh awe lọ nạ aḍuom ologhi, bụlo kotue ni ọtughemi aani bụnon.

³Pin ni bin ọmiinom mọ mụo ạna, ịdipho ogey ọnyo ẹgham kꞌạJizos Kraist.

⁴Ọnyo ẹgham dị odi ḍịikpara adom rạwa ghan oḍighi ịdi kẹḅeeraan uwo ẹmhu phọ ạbidi, ómeeraam mun ooḍikuan oopho awe.

⁵Ạḍighaagh oye dị agbian eghiil rꞌạbunon kéḅetenu, omuton lọ ọdi aako iilogh eghiil phọ.

⁶Ḅịle, oḅephom ozo dị ạḍighaagh ẹkpar kụ ragbi ghan ạya.

⁷Tụutughian ni ịphen mị rạḅem bọ, ịdi eḍighi bọ Ọmoogh-we phọ kạloghonaan ni nyịna ḍịghaagh ọnaghan ạḍughum esi oomo ạraraar.

⁸Tụutughian ni Jịzos Kraist phọ oḅeton bọ sịphe aḍuugh phọ, ọpo aḍighi bọ ọnyo ẹemara ẹemara aDevid. Ịphen phọ kụ ẹmhu ooḅi ọghaaph phọ mị rạkaaph ghan bọ.

⁹Mị ạtuan ni ooḅi ọghaaph phọ rạmiinom, ḅịle mụkasaghiom ni ịmi izime, ịdipho oye lọ asoor ologh. Kụ ikpo ọnhu phọ Ẹnaan rọ́kasaghiom ghan izime.

¹⁰Esi ịphen phọ, mị ạtuan ni ẹmhu awe phọ ạbuphe Ẹnaan mẹsaḅar bọ rạkparam oomo phọ ịminimiin phọ, pịdi bịdi ọmoogh aani pẹleeny phọ ạJizos Kraist kạngo bọ, rꞌeegu kꞌagee-pọ phọ.

¹¹Ọphon phọ ogey ọḅem ni mọ: “Eḍighi ịyaar dị yira omughan rꞌọdi, yira kotughan rꞌọdi.

¹²Eḍighi ịyaar dị yira ọkparam dọl ịminimiin phọ rꞌọdi, yira kọda ni rꞌọdi. Eḍighi ịyaar dị yira ọpharanaan nyọdi, ọdi kụpharanaan kẹn ni iyira.

¹³Eḍighi ịyaar dị yira ụ́kpe oḍuom ologhi, ọdi ạkpe ni oḍuom ologhi, ịdi eḍighi bọ ọdi ọkpe loor ọdi rạ́gbaanaan ghan.”

¹⁴Kịom ghan we phọ ạna ologhi ịphen phọ, ạphur bịdi rụru ạkpaariom ghisigh Ẹnaan mọ bịdi kụ́ukonoghian ghan ikpo ọnhu lọ ẹkpe ọghaaphom. Igey kéḍighi ẹngo, kẹpue ghụn we phọ ạbuphe kọnaghan bọ.

¹⁵Kpạrami ḍịghaagh oḍighi phọ, pịdi Ẹnaan ẹsighenom mọ nạ oye arukumuan dị oḍighi phọ ạna umugholoor rákiilom. Mạar ạaḅeghion ọghaaph igey phọ kꞌẸnaan ạtughemiom ghan we.

¹⁶Káḍighom ọghaaph awe dị ọsighe ḍien phọ Ẹnaan ropeghom ephegh. Ọdo phọ ọghaaph phọ ọphon raporogh ghan ni weye kạkele loor Ẹnaan.

¹⁷Ịtughemi phọ ạbidi ẹkigh ịdipho etokolo ẹko owol dị kele iphulupul aloor phọ. Kụ aHaimenios rꞌaFailitos kụ ịyal ạbutughemia ọdo phọ ịphen phọ.

¹⁸Bịdi mọwile ẹphalaḅaal eten phọ, ọḅile rọḅem ghan mọ yira moḅetenu ni sịphe aḍuugh phọ otene igbaany. Ọghaaph phọ ạbidi radughe yogh omeeraam abuniin awe.

¹⁹Kótue opighemi ephighiom mọ Ẹnaan mephighi bọ, sịphe ọge bọ ikpo ọnhu phọ ịphen mọ, “Ọmoogh-we phọ alegheri ni bụphe oru bọ we phọ ọdi,” ḅịle mọ, “Oye lọ ạḅem mọ ọno ọlo Ọmoogh-we phọ ni, ịkaraph kúḍighi mun!”

²⁰Ogbogh otu, arodo rꞌạrukpa rꞌạsigbagba kịrokiro edi ghan ni. Iniin ọlemom gol, iniin ọlemom silva, iniin ọkaam ireeny, iniin ọlemom ạḅay. Iniin ẹmoogh ni ephigh ịyaar oḍighinom, iniin ịlo erughotu bịn.

²¹Kọmoogh ni ephigh ịyaar oḍighinom oye lọ arue aselemian loor ọdi esi ịkaraph ạraraar phọ ịphen. Motigheri nyọdi rokoriom mọ Ọde-otu phọ ọdi ạsighe nyọdi aḍighinom ịyaar. Moselemi nyọdi oseere oḍighinom ạtorobo egey ịyaar.

²²Kpọrion rạghaagh ịkaraph ạruuphua phọ ugheel ạnmuny phọ odimom ghan bọ. Ḍiiḍikuan bụphe ọsighe bọ ọser-sẹr ologhi kụ rọmagham Ọmoogh-we phọ mọ ạloghonaan bụno ḍịghaagh phọ kụ ẹwa ghan ruukuan, rꞌomeeraam, rꞌẹphomoghian, rꞌẹepho.

²³Kpọrion rạghaagh ịnunuan elologhi rꞌelegheri ịyaar. Nạ alegheri ni mọ ịphen phọ kụ rẹkom ghan bọ sighiton kesereghi.

²⁴Oye arukumu Ọmoogh-we phọ sighiton kụ́wa ghan! Aḍighi ghụn ọopho oye esi oomo awe, ạmaar ịtughemi, ạmoogh ọkparam,

²⁵asooromi loor kụ aromoghiom ghan bụphe rọgbagharan ghan bọ nyọdi, iini sịen Ẹnaan kẹngo ni bịdi eepoogh okiton osoman ọdi olegheri aani igey phọ.

²⁶Ịduon phọ kụ bịdi ologhoma loor okpetenaan ḍiphil phọ Eru esiph bọ bịdi ekpophonom, mọ oḍighi ịpe ịitughian phọ ọno.