Read abua Bụo aHibru 1 Bible Online

Bụo aHibru 1 - abua bible

Bụo aHibru 1

¹Mem dị meten, Ẹnaan irom ni riil ọdi kụ ọghaaph ghan ịbadi amem reten kịrokiro ọḅeni bụrude ạburude phọ ayira,

²kụ sịen ariiḍio ekureriom mọ, ọdi arom Mọony phọ ọdi kụ ạghaaph bọ ụḅeni iyira. Ẹnaan ịsighe ḍịghaagh ọdi kụ ẹlhemom bọ aḅirini phọ, ẹḅile ẹsaḅar nyọdi mọ ạmoogh oomo ạraraar ruukuna phọ.

³Ọdi rạmuom ghan ḍịḅaal eegu phọ Ẹnaan. Ạroozo phọ ọdi bịn kụ ịkar ẹghigh ịpe Ẹnaan. Ọdi kụ ạsighe bọ ikpo ọnhu ịikpo phọ ọdi rạpamam ghan aḅirini phọ kạmeremi. Ọdi mawoph we phọ ạḅaalami, kụ mạrol ude ḍịghaagh elhiom mọ Ẹnaan Oomo Ịikpo phọ.

⁴Mophophe nyọdi iboom opuemi rụukpaany phọ Ẹnaan, ịdipho aḍien phọ Ẹnaan eghol bọ nyọdi ẹbugh bọ epu ịpe ạbidi.

⁵Ẹnaan rꞌamem ị́ḅem ịlo oniin ọokpaany phọ ọdi mọ, “Nạ Ọony phọ ạmi. Rodon mị mạgba aḍeenaan loor ạmi mọ mị Ọde phọ ạna.” Ẹnaan ị́ḅem kẹn ịlo oniin ọokpaany phọ ọdi mọ, “Mị kaḍighi Ọde ọdi kụ ọdi aḍighi Mọony ạmi.”

⁶Mem mọ Ẹnaan rẹetughian bọ ịlo orom ọkpana Ọony phọ ọdi mọ aru sịen aḅirini phọ, ọdi ạḅem kẹn ni mọ, “Oomo ạruukpaany phọ Ẹnaan kooseeny ni nyọdi.”

⁷Ịphen kụ ịdi Ẹnaan ẹghaaph ịlo ạruukpaany phọ ọdi mọ, “Ẹnaan rẹsighe ghan rụukpaany phọ ọdi kẹghighemi oghim, rẹsighe ghan kẹn bụo oḍighi phọ ọdi kẹghighemi sinem ạnian.”

⁸Kụ ọlo, Ẹnaan ịghaaph ịlo Ọony phọ ọdi mọ, “Ẹnaan, ạgada ọdaam ẹmha phọ ạna kạtol li kꞌagee-pọ kꞌagee-pọ. Ịkpara phọ nạ kạdaam bọ ịlo aruukuan ni.

⁹Nạ mạphomoghian ruukuan phọ kụ ạlogh ḍien ịkaraph. Ịduon kụ iḍighi kụ Ẹnaan, Ẹnaan phọ ạna, ẹsaḅar bọ nyịna ekueni epuemi iigbo phọ ạna ẹngoom nyịna iboom iboh.”

¹⁰Ẹnaan ịḅile kẹn ni ẹḅem mọ, “Emiighom mọ, nạ Ọmoogh-we phọ kụ ụlhem bọ de phọ, kụ ạsighe rạghaagh phọ ạna ạlhemom kẹ phọ.

¹¹Oomo phọ ạbidi kope ni ọmadan, kụ nạ kạtol li. Bịdi koḍighi ni igbaany ịdipho arukpe.

¹²Nạ kakpooghi bịdi ịdipho ạsuoma, kụ aanmeghi bịdi ịdipho oye raanmeeghi ghan bọ rukpe. Kụ ọlo, nạ kạtol li bịn, nạ káḍighi ogbaany.”

¹³Ẹnaan rꞌamem ị́ḅeni nyoniin ọokpaany phọ ọdi mọ, “Tọl ude sịen ḍịghaagh elhiom mọ ạmi, tụtu mị ạsighe bụmulogh-ḍien phọ ạna aḍighi ịkasi dị nạ kạkpasaghiom ruwol.”

¹⁴Bụanhian nụun kụ ạruukpaany phọ Ẹnaan? Oomo phọ ạbidi aruwaloor phọ reḍighi ghan bọ oḍighi phọ kẹngo Ẹnaan, kụ Ẹnaan kụ retom ghan ni bịdi mọ ọloghonaan ghan ḍịghaagh bụphe kọmoogh bọ pẹleeny phọ.