Read abua Bụo aHibru 10 Bible Online

Bụo aHibru 10 - abua bible

Bụo aHibru 10

¹Iilogh ạbuo aJu phọ ị́kigh ọkaraghi ịpe kꞌạke phọ ịmadan. Eḍighi iigho igey ạraraar phọ retu bọ bịn. Iniin phọ ạrikia phọ kụ ẹdi rọpinyon ghan ni ạlha etum lhạ kꞌagee-pọ. Ika nụun kụ ẹdi iilogh phọ kẹtuan bọ rịkia phọ ịphen phọ eḍighi ịdi awe phọ rotu bọ otuman Ẹnaan koseleman?

²Mọ uwoph ni we phọ rooseeny bọ Ẹnaan esi ịkaraph phọ ạbidi, ọbo bịdi múloghoma mun mọ erugh ịkaraph kepum ni bụno, ḅịle kẹn oomo ọphinyon ạrikia mikunughian ni.

³Kụ ọlo, ịduon phọ edi bọ, ọphinyon ạrikia phọ rẹkiom ghan ologhi we phọ ịlo ịkaraph phọ ạbidi, lhạ etum lhạ.

⁴Ịyaar phọ eḍighi bọ, ịḅaal ilephiri ạsinam rꞌịga kétue rorue ẹetoghion we esi ịkaraph.

⁵Esi ịduon phọ kụ ẹdi mem mọ aKraist rạnyaaghian bọ oru ịsien aḅirini phọ, ọdi ạḅeni bọ Ẹnaan mọ, “Nạ rạ́wa ghan rịkia rꞌịngooghineen, kụ nạ maakolobian ḍizu dị mị kạngo aseere.

⁶Ịnam lọ ọphophoghi ikpom sịphe enmeny ẹkia phọ, rꞌạrikia oselemian aloor, ologhi ạna ị́ḅaal.

⁷Kụ mị ạḅem mọ, ‘Ẹnaan, mị odi ni sịen oḍighi ịpe nạ rạwa bọ mọ mị uḍighi phọ, ịdipho ọge bọ ịlo ạmi sịphe ạḍinya iilogh phọ.’”

⁸Ọdi ạphur ạḅem mọ, “Ạrikia rꞌịngooghineen, rꞌịnam lọ ọphophoghi sịphe enmeny ẹkia phọ, rꞌoselemian aloor, nạ ọ́wa, ḅịle ologhi ạna ị́ḅaal.” Ọdi malhegheri ni mọ ọtuan ghan ni ịdipho iilogh phọ ẹḅem bọ kụ rọpinyon ghan bọ oomo phọ ạrikia phọ ịphen phọ, kụ ạghaaph bọ ni.

⁹Kụ ọdi ạḅile ni ạloghom mọ, “Ẹnaan, mị odi ni sịen oḍighi ịpe nạ rạwa bọ mọ mị uḍighi phọ.” Ịduon phọ, pọ Ẹnaan mẹḅokori ịḅel ạrikia phọ ọgbal, kụ ẹkia phọ ẹpe aKraist mẹsighe esi phọ ạbidi.

¹⁰Ịdipho ạJizos Kraist aḍighi bọ ni ịpe Ẹnaan ẹwa bọ mọ ọdi aḍighi phọ, oomo phọ ayira mọtuan ịdipho ọdi ạsighe bọ ḍizu phọ ọdi ạphighironom ẹkia phọ, mem bịn ḅeer ẹmadan, owopha ịkaraph phọ ayira.

¹¹Tọrobo oyil ạrikia ạbuo aJu phọ rạmeera ghan ni kạphighiron rịkia aḍio etum ḍio kụ kạphinyon iniin phọ ọdo ạrikia phọ ịbadi amem. Kụ ạrikia phọ ịphen kétue rorue ẹetoghion we esi ịkaraph.

¹²AKraist ạphighiron ghụn ni eniin ẹkia dị eḍighi ni ekol kꞌagee-pọ ọotoghionom awe esi ịkaraph, kụ agbi bọ ọrol ude ẹpe kꞌạke ḍịghaagh elhiom mọ Ẹnaan.

¹³Ọdi odi sịphe phọ kụ rakori ghan tụtu ẹteeny mem mọ Ẹnaan kẹsighe bọ bụmulogh-ḍien phọ ọdi eḍighi ịkasi ọkpasaghiom aruwol.

¹⁴Eniin phọ ẹkia phọ ẹphen ọdi ạphighiron bọ meḍighi ịdi bụphe mowopha yogh bọ ịkaraph phọ ạbidi moseleman kꞌagee-pọ.

¹⁵Kụ Uwaloor Iigbia phọ bịn ạkaaph aani ni amitiom ụḅeni iyira. Ạphur ạḅem mọ,

¹⁶“Ọmoogh-we phọ rạḅem ghan mọ ịphen kụ ịyo phọ mị rꞌạbidi kokiran bọ riiḍio phọ ịpe retu bọ. Mị kạsighe iilogh phọ ạmi ạlogh sịphe iloghi phọ ạbidi, kụ ạgeeghi sịphe ịitughian phọ ạbidi.”

¹⁷Kụ ạḅile ạḅem ạloghom mọ, “Mị kạ́atughian mun ịkaraph phọ rꞌạsipioghom mọ ạbidi.”

¹⁸Kụ mem dị mọsar ịphen phọ ọwilenaan, ẹkia ọotoghionom esi ịkaraph kọ́pighironaan ghan mun.

¹⁹Bụo asiya, ịduon kụ iḍighi kụ yira ọmoogh bọ ni oḍuom ologhi okuphom owol mọ yira koḍigh ni osi sịphe Ẹphan phọ loor ịḅaal phọ ạJizos ozu bọ.

²⁰Ịdipho ọdi ạsighe bọ ḍizu phọ ọdi ạphighironom ẹkia phọ, pọ ọdi matigh ukpe phọ osophom bọ ughughuronaan iyira emoom eten aghuḍum ọḍua kụ oḍigh.

²¹Yira ọmoogh ni ogbogh oyil ạrikia dị rapogh eghunotu phọ Ẹnaan.

²²Kụ ọtuan ịduon phọ oḍuraan ghan oru otuman Ẹnaan! Ọpham igey iloghi rꞌọokpara omeeraam rꞌiloghi dị mogbuurogh ọḅaalami esi ịitughian apum rꞌasiloor dị owur mụserereeny ạmuum kụ orumom!

²³Ọpham oḍuom ologhi phọ ayira ọkparami ghan, ịdi eḍighi bọ yira omeeraam ni mọ Ẹnaan keḍighi ni ịpe ọdi aguanaan bọ!

²⁴Iipikian ayira eḍighi ghan ịlo oniin kạkologholomi ghan nyoniin esi ẹphomoghian rꞌiiḅi iiḍighi!

²⁵Kúbulamaam ghan ookpomoghan ghan, ịdipho meḍighi bọ ẹeghara abuniin. Oniin ạkuami ghụn aromoghiom ghan nyoniin sịen dị nyina rẹmiin ni mọ aḍio Ọmoogh-we phọ rẹkpulan ni!

²⁶Ịyaar phọ eḍighi bọ, ẹkia dị kẹetoghion we esi ịkaraph ílho mun, eḍighi ịyaar dị yira olegheri ni kụ ụ́bile oḍighi yogh ghan ịkaraph phọ, mem dị mogananami ni igey phọ uḍeenaan iyira.

²⁷Ịiruen phọ rꞌanem ạnian phọ kepiemi bọ bụlo ọgbagharan Ẹnaan kụ isughanaan ghụn iyira ọtuan okaphian oḅio.

²⁸Oye lọ ụ́naghanan iilogh phọ aMozis rokiigh ghan ni, ighirigiir rọ́nma ghan mem dị ịyal mꞌịraar awe kụ ọgbaanaan nyọdi sịagba apum.

²⁹Eeghe nụun kụ kemitenaan oye phọ ọpo ạḅitonaan bọ Mọony phọ Ẹnaan, ụ́maghami bọ ịyaar ịḅaal ịyo phọ Ẹnaan ewophom bọ ịkaraph phọ ọdi ẹsighe, ạsuom bọ ọnhu Uwaloor ọnma ighirigiir phọ? Ịitughian ọdo eephom dị ẹliomom mọ kọliom bọ nyọdi kebeeph.

³⁰Yira olegheri ni oye phọ ạḅem bọ mọ, “Ịikpia phọ ịlo ạmi ni. Mị kaḍighi ni aḅulemian”; ḅịle rꞌọpo ạḅem bọ mọ, “Ọmoogh-we phọ kaagboonaan ni ịiruen we phọ ọdi.”

³¹Eḍighi ni ruugu omeel oḍigh ạraghaagh Ẹnaan phọ edi ghan bọ ni.

³²Ịitughian ịdipho ịrolom bọ inyina mem dị meten. Riiḍio phọ ịpe phọ, mem mọ ạḍiḅaal phọ Ẹnaan misoorom bọ inyina, nyina ịmiinom ni ịbadi ạraraar, kụ oḍula aloor phọ inyina ómeel ophum.

³³Eeni amem ironyon ghan inyina esi ogbo, ịgilaam ghan inyina; kụ eeni amem nyina ịḅophoghan ghan ni bụphe rọmiinom bọ ịduon phọ.

³⁴Nyina ịnma ghan ni ighirigiir bụo ikoli, ḅịle mem lọ owum rạraar anyina ọsighiogh, nyina ịḅaal ghan ni ologhi ẹkparam muphe phọ anyina, ịdi eḍighi bọ nyina ilegheri ni mọ nyina ẹḅile ni ẹmoogh ịyaar dị kẹtol li kꞌagee-pọ, ẹnighe kẹn epu ịpe ephe bọ.

³⁵Loor ịphen phọ, kédughe iloghi anyina, ịdi eḍighi bọ oseenaan ni iboom aruunmo oye lọ ạmoogh ạkpo ologhi.

³⁶Nyina ẹkpe ni ọkparam ghan, pịdi nyina eḍighi ghan ịpe Ẹnaan rẹwa bọ, ẹḅile ạar rạraar phọ dị aguanaan bọ,

³⁷loor esi dị ạḍinya iigbia phọ rẹḅem ghan mọ, “Esughanam mọony ẹnum, bịn ọpo ratu bọ katu ni; ọdi káabinya.

³⁸Kụ ọlo, aweye aruukuan phọ ạmi komeeraam ni ọmoogh ghuḍum; kụ ọnyo ạbidi lọ ạḅile aḅula ọman kạ́ḅaal mun ologhi ạmi.”

³⁹Kụ yira káwe dị koḅula ọman bịn ope. Yira ghụn awe dị momeeraam kụ mọmoogh pẹleeny.